గర్భిణీల్లో వెన్నునొప్పి!

Pre Natal

oi-Nageswara

By B N Sharma

Published: Thursday, September 15, 2011, 10:27 [IST]

గర్భంతో ఉన్న మహిళల్లో నెలలు నిండుతున్న కొద్ది శరీరంలో వచ్చే మార్పుల వలన వెన్ను నొప్పి సమస్య వారిని పట్టి పీడిస్తుంది. కొందరిలోనైతే భరించరాని వేదన ఉంటుంది. ఈ పరిణామక్రమం మూడో నెల నుంచి ఆరంభమవుతుంది. గర్భంలో మార్పులు వచ్చే కొద్ది, తల్లి శరీరానికి ఇటువంటి తిప్పలు తప్పవు. వీటిలో ప్రధానమైనది వెన్నునొప్పి.

వెన్నునొప్పికి కారణాలు పరిశీలిస్తే....
గర్భిణుల్లో వెన్ను నొప్పికి కారణాలు ఎన్ని ఉన్నా ప్రధానమైనవి కొన్ని మాత్రమే. కవటివలయం నుంచి గర్భాశయం వైపుకు పెరుగుతున్న కొద్ది పొట్ట-కవటివలయం ఎముకలు పెల్వస్‌ బయటకు వచ్చేస్తుంటుంది. ఫలితంగా సైక్రోఐలియాక్ జాయింట్స్‌పై భారంపడుతుంది. ఒక్కొమారు ఇవి బిగుసుకుపోతాయి. ఫలితంగా నొప్పి వస్తుంది. ఈ నొప్పి సాధారణంగా 4 నుంచి 8 నెలల వరకూ ఉంటుంది. దీనివలన ఒకపక్కకు ఒరిగి పడుకుని మరోవైపుకు తిరగాలంటే కష్టమైపోతుంది. ఇండియన్ టాయిలెట్స్‌పై కూర్చోవడం ఇబ్బందికరంగా ఉంటుంది. కూర్చుని లేచే పనులు చాలా కష్టమవుతాయి. నడక, మెట్లు ఎక్కడం, ఎక్కువ సేపు నిలబడడం సాధ్యంకాదు.

దీనికి నివారణ ఏమిటి...?
ఒకవైపు ఒరిగి పడుకున్నపుడు కాళ్ళ మధ్య తలగడ పెట్టుకుని పడుకోవాలి. దాంతో పైనఉండే కాలు మరింత దగ్గరకు వచ్చి నొప్పి పెట్టకుండా ఉంటుంది. కింద కూర్చోవడం, ఇండియన్ టాయిలెట్లు వినియోగించకపోవడం మంచిది. పూర్తిగా వీలు కాకపోతే తగ్గించడం మంచిది.

వ్యాయామాలేమిటి...?
గర్భిణీగా ఉన్నపుడు ఎంత హుషారుగా ఉంటే అంత మంచిది. క్రమం తప్పకుండా నడిస్తే మంచి ఫలితాలు ఉంటాయి. మొదట నిటారుగా పడుకోవాలి. తరువాత రెండుకాళ్ళు ముడుచుకోవాలి. నడుం కింద ఓ చెయ్యి పెట్టుకుని ఒత్తిడి పడేలా నొక్కాలి. అలా ఐదు లెక్కపెట్టి వదలివేయాలి. తరువాత రెండుకాళ్ళు ఒకమారు కుడివైపుకు, మరోమారు ఎడమవైపుకు వంచాలి. దీనివలన కాస్త ఉపశమనం లభిస్తుంది.

నొప్పి రిలీఫ్ పొందాలంటే తేలికైన మసాజ్ మంచిది. అయితే హాట్ బ్యాగ్ వంటివి చేస్తే సత్ఫలితాలనివ్వదు. మందపాటి టవల్ వేణ్ణీళ్ళలో పిండి కాపడం పెట్టాలి. చిన్నపిల్లలకు సేవలు చేసేటప్పుడు కిందకు వంగడం సాధారణం. అందుకు బదులుగా వారినే మంచం, కుర్చీ లేదా ఎత్తయిన ప్రదేశాలలో కూర్చోబెట్టి వంగకుండా ఉంటే బాగుంటుంది.