గర్భవతి ధరించే దుస్తులు ఎంత ఆహ్లాదంగా వుండాలి?

Pre Natal

oi-Nageswara Sharma

By B N Sharma

Published: Wednesday, August 24, 2011, 10:09 [IST]

ఆధుని ఫ్యాషన్ పరిశ్రమ అవసరాలకు తగినట్లు దుస్తులు తయారు చేస్తోంది. ఏ అవసరానికి తగిన దుస్తులు వాడినా వాడకపోయినా గర్భవతిగా వున్న స్త్రీ మాత్రం శారీరకంగాను, మానసికంగాను ప్రశాంతతను ఇచ్చి హాయిగొల్పే దుస్తులు వేసుకుంటే ఆ అనుభూతి ఆమెకు ఎంతో ఆహ్లాదాన్నిస్తుంది. ఆరోగ్యంగా వుంటుంది. అందుకుగాను ఆమె దుస్తులు ఎలా వుండాలో చూద్దాం.

అసలు గర్భవతి సౌకర్యవంతమైన దుస్తులు ఎందుకు ధరించాలి?
మొదటగా, ఆమెకు హాయిని గొల్పేటందుకు! ప్రెగ్నెన్సీ సమయంలో ఎన్నో అసౌకర్యాలుంటాయి. కనీసం ఆమె వేసుకున్న దుస్తులైనా ఆమెకు హాయినివ్వాలి. మొదటి త్రైమాసికంలో ఉదయం వేళ వాంతులు చేసుకోవడం తలనొప్పి మొదలైనవి వుంటాయి. కొంత అజీర్ణం కూడా వుంటుంది. అటువంటపుడు నడుముచుట్టూతా టైట్ గా వుండే దుస్తులు అసౌకర్యంగా వుంటాయి. పొట్ట ఇబ్బంది పెడుతూ వుంటుంది. చాలామంది మహిళలు ప్రెగ్నెన్సీ సమయంలో వేడిగా వుందంటారు. హార్మోన్లు అధికంగా ఖర్చు అయిపోతూంటాయి. శరీరం వేడెక్కపోతూంటుంది. కనుక మరింత వేడిని కలిగించే దుస్తులు ఎంతో అసౌకర్యానికి గురిచేస్తాయి. రెండో త్రైమాసికం వచ్చేసరికి కొద్దిపాటి బరువు పెరుగుతారు. లావైన శరీరానికి మూడో త్రైమాసికం వరకు అంటే డెలివరీ వరకు సరిపోయే దుస్తులు అవసరముంటుంది.

గర్భవతి స్త్రీ ఏ రకమైన దుస్తులు ధరించాలి?
సాధారణంగా గర్భవతి ధరించేది ఏ ఆకారమూ లేని ఒక గౌను వంటిది. ఆ మాదిరిగానే వుండాల్సిన అవసరం లేదు. మరి కొంచెం సౌకర్యవంతమైన ఫ్రాకులు, స్కర్టులు, లూజు గౌనులు మొదలైనవి విస్తరిస్తున్న పొట్టపై తేలికగా సౌకర్యవంతంగా వుండేవిగా వుండాలి. అధికంగా లూజు వున్నవి వాడకండి. అవి తగినట్లు మీకు ఫిట్ కాకపోయినా అసౌకర్యం వుంటుంది. కొంచెం అజాగ్రత్తగా వుంటే తొలగిపోయే ప్రమాదం వుంది. పేంట్లు బదులుగా స్కర్టులు, గౌనులు మొదలైనవి వాడండి. బరువు పెరిగే కొలది తొడలు ఒకదానికి ఒకటి ఒరుసుకొని ర్యాషస్ వచ్చే అవకాశం కూడా వుంది. స్కర్టులు వేస్తే గాలి తగిలి హాయిగా వుంటుంది. చీర కట్టేటట్లయితే, పెట్టికోట్ తాడు టైట్ గా కట్టకండి. రక్తప్రసరణ సాఫీగా జరగాలి. గర్భవతి వేసే దుస్తులు ఒక సారి వేస్తే ఎంతో హాయిగా వుందనిపించేలా వుండాలి.