కేవలం 10 నిమిషాల్లో బేకరీ స్టైల్ స్పాంజి రసగుల్లా..ఇంట్లో ఎలా చేసుకోవాలంటే..

రసగుల్లా పేరు వినగానే చాలా మందికి నోట్లో నీళ్లూరుతాయి. బేకరీలలో లభించే ఆ స్పాంజిలాంటి తీపి ఉండలను ఇష్టపడని వారుండరు. అంతటి ప్రాచుర్యం పొందిన ఈ స్వీట్‌ ను మన ఇంట్లోనే, మన చేతులతో స్వచ్ఛంగా తయారు చేసుకుంటే ఆ అనుభూతే వేరు. ఇంట్లో రసగుల్లా చేయడం కష్టమనుకుంటున్నారా? అస్సలు కాదు. కొన్ని చిన్న చిన్న చిట్కాలు పాటిస్తే బేకరీ కన్నా రుచిగా, మృదువుగా తయారుచేసుకోవచ్చు. అది కూడా జస్ట్ 10 నిమిషాల్లోనే. రసగుల్లా తయారుచేయడానికి కావాల్సిన పదార్థాలు,తయారీ విధానం ఇక్కడ చూడండి.

రసగుల్లా తయారీకి కావలసిన పదార్థాలు

పనీర్- 200 గ్రాములు
చక్కెర - 1 కప్పు
నీళ్లు - రెండున్నర కప్పులు
యాలకుల పొడి - చిటికెడు

తయారీ విధానం

-రసగుల్లా తయారీలో అతి ముఖ్యమైన ఘట్టం పనీర్‌ ను సిద్ధం చేసుకోవడమే. ముందుగా పనీర్‌ ను ఒక వెడల్పాటి ప్లేట్‌ లో తీసుకుని, అందులో ఏమాత్రం గడ్డలు లేకుండా మెత్తగా చేసుకోవాలి.

-మీ అరచేతి అడుగుభాగంతో పనీర్‌ ను బాగా మర్దనా చేస్తున్నట్లుగా వెన్నలాంటి ముద్దగా మారేవరకు కనీసం 8-10 నిమిషాల పాటు నలపాలి. ఈ ముద్ద ఎంతో నునుపుగా, మృదువుగా ఉండాలి.

-ఇప్పుడు ఈ పనీర్ ముద్ద నుండి నిమ్మకాయ సైజులో చిన్న చిన్న ఉండలను చేసుకోవాలి. ఈ ఉండలు చేసేటప్పుడు వాటిపై ఎలాంటి పగుళ్లు లేకుండా, గుండ్రంగా, నునుపుగా ఉండేలా చూసుకోవాలి. పగుళ్లు ఉంటే పాకంలో వేసినప్పుడు విరిగిపోయే ప్రమాదం ఉంది.

-ఆ తర్వాత స్టవ్ మీద ఒక లోతైన గిన్నె లేదా పాన్ పెట్టి అందులో 1 కప్పు చక్కెర, రెండున్నర కప్పుల నీళ్లు పోసి వేడి చేయాలి. చక్కెర పూర్తిగా కరిగి, పాకం మరగడం మొదలైనప్పుడు సువాసన కోసం యాలకుల పొడి వేయండి.

-పాకం బాగా మరుగుతున్నప్పుడు మంటను మీడియంలో ఉంచి మనం సిద్ధం చేసుకున్న పనీర్ ఉండలను ఒక్కొక్కటిగా నెమ్మదిగా పాకంలో వదలాలి. వెంటనే గిన్నెపై మూత పెట్టి సుమారు 10-12 నిమిషాల పాటు ఉడికించాలి. ఈ సమయంలో పనీర్ బాల్స్ ఉబ్బి, వాటి అసలు పరిమాణానికి దాదాపు రెట్టింపు అవుతాయి.

-12 నిమిషాల తర్వాత స్టవ్ ఆఫ్ చేసి, రసగుల్లాలను పాకంతో పాటు పూర్తిగా చల్లారనివ్వండి. అంతే నోట్లో వేసుకోగానే కరిగిపోయే మధురమైన రసగుల్లాలు రెడీ.