5 నిమిషాల్లో టేస్టీ బ్రేక్‌ ఫాస్ట్..బరువు తగ్గాలనుకునే వారికి బెస్ట్

ప్రస్తుత ఉరుకుల పరుగుల జీవితంలో ఉదయం వేళ ఆరోగ్యకరమైన వంట చేసుకోవడానికి సమయం దొరకడమే కష్టంగా మారింది. ముఖ్యంగా గంటల తరబడి కూర్చుని పనిచేసే డెస్క్ జాబ్ ఉద్యోగులకు, శారీరక శ్రమ తక్కువగా ఉండే వారికి తీసుకునే ఆహారం చాలా తేలికగానూ, పోషకరితంగానూ ఉండాలి. మరి రుచికి రుచి, ఆరోగ్యానికి ఆరోగ్యం అందించే అల్పాహారం ఏదైనా ఉందా అంటే.. అదే ఓట్స్ పోహా.

సాధారణంగా మనం బియ్యం అటుకులతో పోహా చేసుకుంటాం. అందులో కార్బోహైడ్రేట్లు ఎక్కువగా ఉంటాయి. కానీ ఓట్స్‌లో ఫైబర్, బీటా గ్లూకాన్ పుష్కలంగా ఉంటాయి. ఇవి రక్తంలో చక్కెర స్థాయిలను నియంత్రించడంలో, చెడు కొలెస్ట్రాల్‌ను తగ్గించడంలో అద్భుతంగా పనిచేస్తాయి. కేవలం 5 నిమిషాల్లో తయారయ్యే ఓట్స్ పోహా బరువు తగ్గాలనుకునే వారికి ఒక వరం లాంటిది. ఓట్స్ పోహా ఎలా తయారు చేసుకోవాలో ఇక్కడ చూడండి.

కావలసిన పదార్థాలు
ఓట్స్ - ఒకటిన్నర కప్పు
కూరగాయలు - ఒకటిన్నర కప్పు ( క్యారెట్, బఠానీలు, బీన్స్, ఉల్లిపాయ)
పచ్చిమిర్చి - 3
కరివేపాకు - 2 రెమ్మలు
ఆవాలు - అర టీస్పూన్
ఇంగువ - చిటికెడు
నూనె - 1 టేబుల్ స్పూన్
పసుపు - చిటికెడు
నిమ్మరసం - 1 టీస్పూన్
ఉప్పు - రుచికి సరిపడా
కొత్తిమీర - గార్నిష్ కోసం

తయారీ విధానం

-ముందుగా ఓట్స్‌ ను ఒక జల్లెడలో వేసి నీటితో ఒక్కసారి కడిగి వెంటనే నీరంతా వార్చేయాలి. ఓట్స్ మరీ మెత్తగా కాకుండా పొడిపొడిగా ఉండేలా చూసుకోవాలి. నీటిలో ఎక్కువసేపు నానబెట్టకూడదు.

-నీరు వార్చిన ఓట్స్‌ లో రుచికి సరిపడా ఉప్పు, చిటికెడు పసుపు, కొద్దిగా నిమ్మరసం వేసి చేతితో మెల్లగా కలపాలి. దీనివల్ల ఓట్స్‌ కు మసాలా బాగా పడుతుంది.

-స్టవ్ వెలిగించి పాన్ పెట్టి నూనె వేడి చేయాలి. నూనె కాగాక ఆవాలు, చిటికెడు ఇంగువ వేసి చిటపటలాడించాలి. తర్వాత కరివేపాకు, పచ్చిమిర్చి, సన్నగా తరిగిన కూరగాయ ముక్కలు,ఉల్లిపాయ, క్యారెట్, బఠానీలు వేసి వేయించాలి. కూరగాయలు త్వరగా ఉడకడానికి కొద్దిగా నీళ్లు చల్లి, మూతపెట్టి 2 నిమిషాలు సన్నని మంటపై మగ్గనివ్వాలి.

-కూరగాయలు మెత్తబడిన తర్వాత పక్కన పెట్టుకున్న మసాలా ఓట్స్ మిశ్రమాన్ని పాన్‌ లో వేయాలి. మంటను సిమ్‌ లో ఉంచి, కూరగాయల మిశ్రమంతో ఓట్స్ కలిసేలా మెల్లగా కలపాలి.

-ఓట్స్ వేడెక్కి, మెత్తబడే వరకు మరో 2 నిమిషాలు ఉంచి స్టవ్ ఆఫ్ చేయాలి. చివరగా సన్నగా తరిగిన కొత్తిమీర చల్లి, వేడివేడిగా సర్వ్ చేసుకోవాలి. కావాలంటే తినేటప్పుడు మరికొద్దిగా నిమ్మరసం పిండుకోవచ్చు.

-అంతే ఎంతో రుచికరమైన, ఆరోగ్యకరమైన ఓట్స్ పోహా రెడీ.