సంక్రాంతి వేళ కొత్త రుచి..నోట్లో వెన్నలా కరిగిపోయే కొబ్బరి పాల రవ్వ లడ్డు

భారతీయ సంస్కృతిలో సంక్రాంతి పండుగకు ఒక ప్రత్యేక స్థానం ఉంది. ఇది కేవలం పంటల పండుగ మాత్రమే కాదు కుటుంబాల కలయికకు, ఆనందానికి,ఆరోగ్యకరమైన ఆహారానికి వేదిక. చలికాలంలో వచ్చే ఈ పండుగలో శరీరానికి శక్తినిచ్చే, వేడిని కలిగించే ఆహార పదార్థాలను తీసుకోవడం మన ఆచారం. అందులో భాగంగానే నెయ్యి, బెల్లం లేదా పంచదార, రవ్వ, కొబ్బరితో చేసిన లడ్డులకు ఎంతో ప్రాముఖ్యత ఉంది.

సాధారణంగా మనం పాలు లేదా పంచదార పాకంతో రవ్వ లడ్డు చేస్తాం. కానీ ఈసారి సంక్రాంతికి కొంచెం వైవిధ్యంగా, మరింత కమ్మగా ఉండేలా కొబ్బరి పాలతో రవ్వ లడ్డు ట్రై చేయండి. ఈ లడ్డులు నోట్లో వేసుకోగానే కరిగిపోయేలా మృదువుగా ఉండటమే కాకుండా, కొబ్బరి పాల వల్ల అదనపు పోషకాలను కూడా అందిస్తాయి. కొబ్బరి పాల రవ్వ లడ్డు ఇంట్లోనే ఈజీగా ఎలా తయారుచేసుకోవాలో ఇక్కడ చూడండి.

కావలసిన పదార్థాలు
బొంబాయి రవ్వ : 2 కప్పులు
పంచదార: ఒకటిన్నర కప్పు
కొబ్బరి తురుము: అర కప్పు
చిక్కటి కొబ్బరి పాలు: ముప్పావు కప్పు
స్వచ్ఛమైన నెయ్యి: 5 టేబుల్ స్పూన్లు
యాలకుల పొడి: అర టీస్పూన్
డ్రై ఫ్రూట్స్: జీడిపప్పు, కిస్మిస్
పచ్చ కర్పూరం: చిటికెడు

తయారీ విధానం

-స్టవ్ వెలిగించి ఒక మందపాటి పాన్ లేదా కడాయి పెట్టుకోండి. అందులో 2 టేబుల్ స్పూన్ల నెయ్యి వేసి వేడెక్కాక, జీడిపప్పును వేసి బంగారు రంగు వచ్చేవరకు వేయించండి. ఆ తర్వాత కిస్మిస్ వేసి అవి ఉబ్బిన వెంటనే పక్కకు తీసి ఒక గిన్నెలో పెట్టుకోండి.

-అదే పాన్‌ లో మిగిలిన నెయ్యి వేసి బొంబాయి రవ్వను వేసి మాడిపోకుండా కలుపుతూనే రంగు కొద్దిగా మారే వరకు వేయించాలి. రవ్వ ఎంత బాగా వేగితే లడ్డు అంత రుచిగా ఉంటుంది, అలాగే జిగట లేకుండా పొడిపొడిగా వస్తుంది.

-రవ్వ వేగిన తర్వాత అందులో తాజా కొబ్బరి తురుమును వేసి మరో 2-3 నిమిషాలు వేయించి స్టవ్ ఆపేసి మిశ్రమాన్ని ఒక వెడల్పాటి ప్లేట్ లోకి తీసుకోండి.

-ఇప్పుడు పంచదారను మిక్సీ జార్‌ లో వేసి మెత్తటి పొడిలా చేసుకోవాలి. ఈ పంచదార పొడిలో యాలకుల పొడిని కూడా కలిపి మిక్సీ పట్టొచ్చు.

-ఇప్పుడు వేయించిన రవ్వ మిశ్రమంలో పంచదార పొడి, వేయించి పెట్టుకున్న డ్రై ఫ్రూట్స్, చిటికెడు పచ్చ కర్పూరం వేసి బాగా కలపాలి. రవ్వ వేడిగా ఉన్నప్పుడే పంచదార పొడి వేస్తే, అది కొద్దిగా కరిగి మిశ్రమం దగ్గరపడుతుంది.

-ఇప్పుడు చిక్కటి కొబ్బరి పాలను గోరువెచ్చగా చేసుకోవాలి. మొత్తం పాలను ఒక్కసారే పిండిలో పోయకూడదు. కొద్ది కొద్దిగా పాలను రవ్వ మిశ్రమంలో పోస్తూ కలపాలి. చేతికి నెయ్యి రాసుకుని, మిశ్రమం లడ్డు చుట్టడానికి వీలుగా వచ్చినప్పుడు గట్టిగా ఒత్తుతూ గుండ్రని లడ్డులా చుట్టాలి.

-ఇవి కొబ్బరి పాలతో చేసినవి కాబట్టి, సాధారణ రవ్వ లడ్డుల కంటే తక్కువ రోజులు నిల్వ ఉంటాయి. బయట ఉంచితే 2-3 రోజులు, ఫ్రిజ్ లో పెడితే 1 వారం వరకు బాగుంటాయి.