సెలబ్రిటీల ఫేవరెట్ ధం ఇడ్లీ..అదిరిపోయే రుచి..ఇంట్లో ఈజీగా ఎలా చేసుకోవాలంటే

భారతీయ బ్రేక్ ఫాస్ట్ లిస్ట్ లో ఇడ్లీకి ఒక ప్రత్యేక స్థానం ఉంది. తేలికగా జీర్ణమవ్వడం, ఆవిరిపై ఉడకడం,నూనె లేకుండా తయారవ్వడం వంటి కారణాల వల్ల ఇది ఆరోగ్యకరమైన అల్పాహారంగా ప్రపంచవ్యాప్తంగా గుర్తింపు పొందింది. అయితే రోజూ తినే సాధారణ ఇడ్లీకి భిన్నంగా, సరికొత్త రుచితో, మరింత పోషకాలతో నిండిన ఒక అద్భుతమైన వంటకం ఉంది. అదే ధం ఇడ్లీ. ధం అనే పదం వినగానే మనకు బిర్యానీ గుర్తొస్తుంది. అయితే ధం ఇడ్లీ మాత్రం కొద్దిమందికి మాత్రమే తెలిసిన వంటకం.

ధం ఇడ్లీ కేవలం అల్పాహారం మాత్రమే కాదు, ఒక సంపూర్ణ భోజనంగా కూడా తినవచ్చు. దీనికి ప్రత్యేకంగా సైడ్ డిష్‌ లు కూడా అవసరం లేదు. ధం ఇడ్లీ అనేది సంప్రదాయ ఇడ్లీకి ఆధునికతను, అదనపు రుచిని, పోషకాలను జోడించే ఒక అద్భుతమైన వంటకం. ఇది పిల్లల నుండి పెద్దల వరకు అందరినీ ఆకట్టుకుంటుంది. ఉదయం అల్పాహారంగా, మధ్యాహ్నం భోజనంగా లేదా రాత్రి తేలికపాటి డిన్నర్‌ గా కూడా ఇది బాగుంటుంది. చాలామంది సెలబ్రీలు దీన్ని బ్రేక్ ఫాస్ట్ లోకి ఇష్టపడుతుంతారు. టాలీవుడ్ హీరోయిన్ వర్ష బొల్లమ్మ ఓ ఇంటర్వ్యూలో హీరో నితిన్ ఇంట్లో ఉండే వంటమనిషి చేసే ధం ఇడ్లీని తాను షూటింగ్ స్పాట్స్ లో తినేదాన్నని అది తనకు భలే నచ్చుతుందని కూడా చెప్పారు. సెలబ్రిటీలు సైతం మెచ్చే ధం ఇడ్లీ ఎలా తయారుచేసుకోవాలో ఇక్కడ చూడండి.

ధం ఇడ్లీ తయారీకి కావాల్సిన పదార్థాలు
-4 ఇడ్లీ
-4 గరిటల సాంబార్
-1 టేబుల్ స్పూన్ నెయ్యి
-1 టేబుల్ స్పూన్ కందిపొడి
-2 వడలు
-1 టేబుల్ స్పూన్ మామిడికాయ పచ్చడి

ధం ఇడ్లీ తయారీ విధానం

-ముందుగా ఉడికించి చల్లారిన ఇడ్లీలను చిన్న చిన్న చిన్న ముక్కలుగా కట్ చేసుకోవాలి.

-తర్వాత వడలను కొంచెం పెద్ద పెద్ద ముక్కలుగా తుంచుకోండి.

-తర్వాత స్టవ్ మీద అడుగు మందంగా ఉండే కడాయి లేదా గిన్నె పెట్టి అందులో సాంబార్ పోయండి. ఇందులోనే కట్ చేసిన ఇడ్లీ, వడ ముక్కలు, మామిడికాయ పచ్చడి, కందిపొడి,నెయ్యి వేసి మీడియం మంట మీద కలుపుతూ ఉడకనివ్వాలి.

-5-6 నిమిషాల తర్వాత సాంబార్ చిక్కగా ఉంది అనిపిస్తే ఒకటిన్నర కప్పు నీళ్లను కొద్ది కొద్దిగా పోసుకుంటూ గరిటతో ఇడ్లీ, వడ ముక్కలను మెదిపినట్లు చేస్తుండండి.

-2-3 పొంగులు వచ్చాక అందులో 1 టేబుల్ స్పూన్ నెయ్యి, కొద్దిగా కొత్తిమీర తరుగు వేసి కలిపి స్టవ్ ఆఫ్ చేసేయండి. అంతే ధం ఇడ్లీ రెడీ.