ఆగ్రా ఫేమస్ పేఠా స్వీట్.. ఇంట్లోనే సులభంగా తయారు చేసుకోండిలా..

భారతీయ సాంప్రదాయ తీపి వంటకాల గురించి మాట్లాడుకుంటే, ముందుగా గుర్తుకొచ్చే వాటిలో ఆగ్రా పేఠా కచ్చితంగా ఉంటుంది. బూడిద గుమ్మడికాయ, పంచదార పాకంతో తయారయ్యే ఈ స్వీట్.. పైన కరకరలాడుతూ, లోపల జ్యూసీగా ఉండి నోట్లో వేసుకుంటే కరిగిపోయేలా ఉంటుంది. ఆగ్రా నగరానికి పర్యాయపదంగా మారిన ఈ పేఠా, చాలా కాలం పాటు నిల్వ ఉంటుంది. కాలానుగుణంగా పేఠా తయారీలో కుంకుమపువ్వు, చాక్లెట్, పాన్ వంటి ఎన్నో కొత్త రుచులు వచ్చి చేరాయి. మరి ఇంట్లోనే సులభంగా తయారు చేసుకోగలిగే 5 రకాల పేఠా వెరైటీలు ఇక్కడ చూడండి.

ఆగ్రా స్పెషల్ వైట్ పేఠా తయారీ విధానం(సంప్రదాయ పద్ధతి)

-ముందుగా గుమ్మడికాయను చెక్కు తీసి, గింజలు తొలగించి చిన్న ముక్కలుగా కోసుకోవాలి. ఆ ముక్కలను వంట సున్నం కలిపిన నీళ్లలో 4-5 గంటల పాటు నానబెట్టాలి. ఆ తర్వాత సున్నం పోయేలా ముక్కలను శుభ్రమైన నీటితో 3-4 సార్లు బాగా కడగాలి.

-ఒక పాత్రలో నీరు మరిగించి, ఈ ముక్కలను మెత్తబడేవరకు ఉడికించాలి. మరోవైపు పంచదార పాకం పట్టుకుని, అందులో ఉడికించిన పేఠా ముక్కలను వేసి 6-8 గంటల పాటు నాననివ్వాలి. పాకం ముక్కల లోపలికి ఇంకిన తర్వాత చల్లగా వడ్డించాలి.

కుంకుమపువ్వు పేఠా (కేసర్ పేఠా) తయారీ విధానం

-గుమ్మడికాయను చెక్కు తీసి గింజలు తొలగించి ముక్కలను ఉడికించుకోవాలి. ఆ ముక్కలను వంట సున్నం కలిపిన నీళ్లలో 4-5 గంటల పాటు నానబెట్టాలి. ఆ తర్వాత సున్నం పోయేలా ముక్కలను శుభ్రమైన నీటితో 3-4 సార్లు బాగా కడగాలి. ఒక పాత్రలో నీరు మరిగించి, ఈ ముక్కలను మెత్తబడేవరకు ఉడికించాలి.

-పంచదార పాకం తయారుచేసే సమయంలో దానికి కాస్త కుంకుమపువ్వు, యాలకుల పొడి కలపాలి. ఇది పాకానికి అద్భుతమైన సువాసనను, రంగును ఇస్తుంది. ఈ పాకంలో ఉడికించిన ముక్కలను 5-6 గంటల పాటు నానబెట్టాలి. కమ్మటి సువాసనతో, బంగారు వర్ణంలో మెరిసిపోయే కేసర్ పేఠా రెడీ.

చాక్లెట్ పేఠా తయారీ విధానం

-ముందుగా సాంప్రదాయ పద్ధతిలో తయారు చేసుకున్న వైట్ పేఠా ముక్కలను పాకం నుంచి తీసి పక్కన పెట్టుకుని చల్లారనివ్వాలి. ఆ తర్వాత వాటిపై చాక్లెట్ సిరప్ వేయాలి లేదా కోకో పౌడర్‌ను చల్లాలి. చాక్లెట్ ఫ్లేవర్ ముక్కలకు బాగా పట్టేలా కలిపి, కాసేపు ఫ్రిజ్‌లో ఉంచండి. పిల్లలు ఈ వెరైటీని ఎంతో ఇష్టంగా తింటారు.

పాన్ ఫ్లేవర్ పేఠా తయారీ విధానం

- ఈ వెరైటీ కోసం పంచదార పాకంలో కొద్దిగా పాన్ ఎసెన్స్, గుల్కంద్ కలుపుకోవాలి. ఉడికించిన గుమ్మడి ముక్కలను ఈ పాకంలో వేసి 4-5 గంటల పాటు వదిలేయాలి. తమలపాకు రుచి, గుల్కంద్ తీపితో అచ్చం స్వీట్ పాన్ తిన్న అనుభూతిని ఇది ఇస్తుంది.

ఎక్కువకాలం నిల్వ ఉండే డ్రై పేఠా తయారీ విధానం

-ముందుగా ఉడికించిన ముక్కలను పంచదార పాకంలో బాగా నానబెట్టాలి. ముక్కలు పాకాన్ని పూర్తిగా పీల్చుకున్న తర్వాత, వాటిని బయటకు తీసి గాలికి కొద్దిసేపు ఆరబెట్టాలి. ముక్కల తడి ఆరిన తర్వాత, పైన కొద్దిగా కార్న్ స్టార్చ్ లేదా పొడి చక్కెరను చల్లాలి. ఇలా చేయడం వల్ల పేఠా పొడిగా మారి, ఎక్కువ కాలం నిల్వ ఉంటుంది. ప్రయాణాల్లో తీసుకెళ్లడానికి ఇది బెస్ట్ ఆప్షన్.