ఆంధ్రా స్టైల్ చింత చిగురు చికెన్ కర్రీ.. ఇలా వండితే ఒక్కో ముద్ద అమృతంలా..

ఆదివారం మాంసాహార ప్రియుల ఇళ్లల్లో కోడి కూర ఘుమఘుమలాడాల్సిందే. చికెన్ ఫ్రై, చికెన్ కర్రీ, బిర్యానీ.. ఇలా ఎన్నెన్నో రకాలుగా వండుకుని వీకెండ్ ని ఆస్వాదిస్తుంటారు. అయితే రెగ్యులర్ రుచులకు భిన్నంగా, మీ నాలుకకు ఒక కొత్త అద్భుతాన్ని పరిచయం చేయాలనుకుంటున్నారా? అయితే చింత చిగురు చికెన్ కర్రీ ట్రై చేయండి.

చింతచిగురు వంటకానికి అద్భుతమైన పులుపును, సువాసనను మాత్రమే కాదు, ఎన్నో ఆరోగ్య ప్రయోజనాలను కూడా అందిస్తుంది. ఇది రక్తాన్ని శుద్ధి చేయడంతో పాటు, జీర్ణ సంబంధిత సమస్యలను దరిచేరనివ్వదు. కీళ్ల నొప్పుల నుంచి ఉపశమనం ఇస్తుంది. శరీరంలోని చెడు కొవ్వును కరిగించడంలోనూ ఇది మేటి. ఫైబర్, విటమిన్లు, మినరల్స్ పుష్కలంగా ఉండే చింత చిగురు, చికెన్‌ లోని ప్రోటీన్‌ తో కలిస్తే అటు రుచికి రుచి, ఇటు ఆరోగ్యానికి ఆరోగ్యం లభిస్తుంది.

చింత చిగురు చికెన్ కర్రీ తయారీకి కావాల్సిన పదార్థాలు

శుభ్రం చేసిన చికెన్ - 1కేజీ
లేత చింత చిగురు - 200 గ్రాములు
ఉల్లిపాయలు-2
పచ్చిమిర్చి-కారానికి తగినంత
అల్లం వెల్లుల్లి పేస్ట్ - ఒకటిన్నర టీస్పూన్లు
కారం-సరిపడా
ఉప్పు -సరిపడా
పసుపు - పావు టీస్పూన్
ధనియాలు,జీలకర్ర పొడి- 1 టీస్పూన్
గరం మసాలా - అర టీస్పూన్
వంట నూనె - తగినంత

చింత చిగురు చికెన్ కర్రీ తయారీ విధానం

-ముందుగా స్టవ్ వెలిగించి, మందపాటి కడాయి పెట్టుకుని తగినంత నూనె వేయాలి. నూనె వేడెక్కాక తరిగిన ఉల్లిపాయ ముక్కలు, పచ్చిమిర్చి వేసి దోరగా రంగు మారేదాకా మీడియం మంటపై వేయించుకోవాలి.

-ఉల్లిపాయలు వేగాక పసుపు, తాజాగా నూరిన అల్లం వెల్లుల్లి పేస్ట్ వేయాలి. పచ్చి వాసన పోయి, కమ్మటి సువాసన వచ్చే వరకు కలుపుతూ వేయించాలి.

-ఇప్పుడు శుభ్రంగా కడిగి పెట్టుకున్న చికెన్ ముక్కలను కడాయిలో వేయాలి. చికెన్‌ లో ఊరే నీరంతా ఇగిరిపోయే వరకు రెండు, మూడు నిమిషాల పాటు బాగా మగ్గనివ్వాలి. ఆ తర్వాత రుచికి సరిపడా కారం, ధనియాలు-జీలకర్ర పొడి వేసి ముక్కలకు పట్టేలా కలపాలి.

-ముక్కలు మునిగేలా సుమారు ఒకటిన్నర నుంచి రెండు గ్లాసుల నీళ్లు పోసి, తగినంత ఉప్పు వేసుకోవాలి. హై ఫ్లేమ్‌ లో కూరను బాగా మరగనివ్వాలి. కూర మరుగుతున్నప్పుడు మూతపెట్టి మంటను తగ్గించి 15 నుంచి 20 నిమిషాల పాటు ఉడికించాలి. చికెన్ మెత్తబడి, నూనె పైకి తేలే సమయానికి కూర దాదాపు సిద్ధమైనట్లే.

-కూర ఉడికేలోపు చింత చిగురును శుభ్రం చేసుకుని ముదురు కాడలు తీసేయాలి. రెండు చేతులతో ఆకులను సున్నితంగా నలుపుకోవాలి. కూరలో వేసే ముందు మాత్రమే ఆకులను నలపాలి. ముందుగానే నలిపి ఉంచితే కూరకు పసరు వాసన వస్తుంది. కాస్త పులుపు ఇష్టపడేవారు చిగురును కాస్త ఎక్కువ వేసుకోవచ్చు.

-ఉడుకుతున్న కూరలో నలిపి పెట్టుకున్న చింత చిగురును వేసి కలపాలి. మూతపెట్టి మరో 5 నిమిషాలు ఉడికించాలి. అప్పుడే ఆకులోని పులుపు చికెన్ ముక్కలకు పర్ఫెక్ట్‌ గా పట్టి కూర చిక్కబడుతుంది.

-చివరగా గరం మసాలా చల్లి, ఉప్పు సరిచూసుకుని ఒక్క నిమిషం పాటు ఉంచి దించేసుకుంటే చాలు.. కమ్మటి సువాసనలు వెదజల్లే చింత చిగురు కోడి కూర రెడీ. వేడి వేడి అన్నంలో ఈ చింత చిగురు చికెన్ ఇగురు కలుపుకుని తింటుంటే ఒక్కో ముద్దా అమృతంలా అనిపిస్తుంది.