Annavaram prasadam: నోట్లో పెట్టుకుంటే అమృతంలా ఉండే అన్నవరం ప్రసాదం..ఇంట్లోనే సింపుల్ గా ఇలా చేసుకోండి

తిరుపతి లడ్డూ ఎంత ఫేమస్ అనేది ఎలా చెప్పనవసరం లేదో అలాగే అన్నవరం సత్యనారాయణ స్వామి ప్రసాదం(annavaram satyanarayana swami prasadam) కూడా. తిరుపతి లడ్డూ తరహాలోనే ఈ ప్రసాదానికి చాలా ప్రాముఖ్యత ఉంది. నెయ్యి, యాలకుల వాసనలతో ఘుమఘుమలాడే అన్నవరం ప్రసాదం తింటే..మళ్లీ మళ్లీ అన్నవరం ఆ ప్రసాదం కోసమే వెళ్లేటోళ్లు చాలామంది ఉంటారు. అంతటి రుచికరమైన ప్రసాదాన్ని ఇంట్లో కూడా సులభంగా ప్రిపేర్ చేసుకోవచ్చు. అన్నవరం ప్రసాదం తయారీకి కావాల్సిన పదార్థాలు, తయారీ విధానం ఇక్కడ చూడండి.

అన్నవరం ప్రసాదం తయారీకి కావాల్సిన పదార్థాలు

-గోధుమరవ్వ
-యాలకల పొడి
-కుంకుమ పువ్వు
-పటిక ముక్క
-జాజికాయ ముక్క
-చక్కెర
-బెల్లం తురుము
-నెయ్యి

అన్నవరం సత్యనారాయణ స్వామి ప్రసాదం తయారీ విధానం
-ముందుగా స్వమ్మీద ఓ బాండీ పెట్టి అందులో ఒక కప్పు గోధుమ రవ్వ వేసి తక్కువమంట మీద బాగా కలుపుతూ 10-12 నిమిషాలు వేయించుకోండి.

-రవ్వ బాగా వేగిన తర్వాత దాన్ని ఓ ప్లేట్ లోకి తీసుకొని పక్కనపెట్టండి.

-ఇప్పుడు చిన్న జాజికాయ ముక్క,పావు టీ స్పూన్ అంత పటిక ముక్క,ఒక టీస్పూన్ యాలకల పొడి,2 చిటికెళ్ల కుంకుమ పువ్వు మిక్సీలో లేదా రోట్లో వేసి మెత్తగా దంచుకొని పక్కనపెట్టుకోండి.

-ఇప్పుడు స్టవ్ మీద అడుగుమందంగా ఉంటే బాండీ పెట్టి అందులో 3 కప్పుల నీళ్లు పోసి బాగా మరిగించండి. మంటను మీడియం ఫ్లేమ్ లో ఉంచండి.

-నీళ్లు బాగా తెర్లకాగినప్పుడు అందులో వేయించిన పెట్టుకున్న గోధుమ రవ్వ వేసి మెత్తగా ఉడకనివ్వాలి.

-గోధుమరవ్వ బాగా ఉడికిన తర్వాత అందులో 1 కప్పు చక్కెర వేసి కలిపి మూతపెట్టండి.

-మధ్య మధ్యలో కలుపుతూ దగ్గరపడేంతవరకు ఉడకనివ్వాలి. 20-25 నిమిషాల తర్వాత అది రంగు మారుతుంది.

-అప్పుడు అందులో 1 కప్పు బెల్లం తరుము వేసి కలపాలి.

-బెల్లం పూర్తిగా కరిగిపోయి నీరు వదులుతుంది. అప్పుడు ఇందులో 1/3 కప్పు నెయ్యి పోసి ఏ మాత్రం కలపకుండా మూత పెట్టండి. మంటను సిమ్ లో పెట్టండి.

-5 నిమిషాల తర్వాత మూత తీసి నిదానంగా కలపండి.ఇప్పుడు ఇందులో ముందుగా మిక్సీలో వేసుకున్న సుగంధ ద్రవ్యాల పొడి వేసి బాగా కలిపి మూత పెట్టేసి 5 నిమిషాలు ఉడికించండి.

-నెయ్యి పైకి తేలిన తర్వాత స్టవ్ ఆపేసి బాండీని దించేయండి. అంతే అన్నవరం ప్రసాదం రెడీ.ఈ ప్రసాదం 4 రోజుల పాటు నిల్వ ఉంటుంది.