మహారాష్ట్ర వంటల సీక్రెట్ ఇదే..కూరల రుచిని రెట్టింపు చేసే గోదా మసాలా..ఎలా చేసుకోవాలంటే..

భారతీయ వంటకాల్లో మసాలాలకు ఉన్న ప్రాముఖ్యత మనందరికీ తెలిసిందే. సాధారణంగా మనం కూరల్లో గరం మసాలాను వాడుతుంటాం. కానీ మీకు మహారాష్ట్ర వంటకాల రుచి, ఆ ప్రత్యేకమైన సువాసన కావాలంటే మాత్రం మీ వంటగదిలో తప్పకుండా ఉండాల్సినది గోదా మసాలా.

సాధారణ గరం మసాలా ఘాటుగా ఉంటే, గోదా మసాలా రుచి చాలా భిన్నంగా ఉంటుంది. మరాఠీల ఇళ్లలో ప్రతి రోజూ దీని వినియోగం ఉంటుంది. శాకాహారం నుండి మాంసాహారం వరకు అన్నింటిలోనూ దీనిని వాడతారు. సూప్‌ లు, పరాఠాలలో కూడా దీనిని వాడితే రుచి అమోఘంగా ఉంటుంది. ప్రముఖ చెఫ్ సరాంశ్ గోయిలా సూచించిన పక్కా కొలతలతో, ఇంట్లోనే ఈ మసాలాను ఎలా తయారు చేసుకోవాలో ఇక్కడ చూడండి.

కావలసిన పదార్థాలు
గసగసాలు: 2 టీస్పూన్లు
తురిమిన ఎండు కొబ్బరి: 2 టీస్పూన్లు
తెల్ల నువ్వులు: ఒకటిన్నర టీస్పూన్
నూనె: 2 టీస్పూన్లు
బిర్యానీ ఆకులు: 2
దాల్చిన చెక్క: 1 ముక్క
లవంగాలు: 8
ధనియాలు: 4 టీస్పూన్లు
వాము: అర టీస్పూన్
మిరియాలు: 1 టీస్పూన్
జీలకర్ర: 1 టీస్పూన్
కసూరి మేథి: 1 టీస్పూన్
రాతి పువ్వు: 1 చిన్న ముక్క
ఉప్పు: 1 టీస్పూన్
కారం పొడి: 1 టీస్పూన్
పసుపు: అర టీస్పూన్
ఇంగువ: చిటికెడు

తయారీ విధానం

-ముందుగా స్టవ్ వెలిగించి ఒక పాన్ పెట్టుకోండి. అందులో నూనె వేయకుండా తెల్ల నువ్వులు, గసగసాలను మంచి సువాసన వచ్చే వరకు వేయించండి. చివరగా ఎండు కొబ్బరి తురుము కూడా వేసి దోరగా వేయించి పక్కన పెట్టుకోండి.

-ఇప్పుడు అదే పాన్ లో 2 టీస్పూన్ల నూనె వేడి చేయండి. నూనె కాగాక మిరియాలు, జీలకర్ర, వాము, బిర్యానీ ఆకులు, దాల్చిన చెక్క, లవంగాలు, ధనియాలు వేసి వేయించండి.

-మసాలా దినుసులన్నీ వేగి మంచి వాసన వస్తున్నప్పుడు అందులో కసూరి మేథి వేసి కొద్దిగా వేయించి స్టవ్ ఆపేయండి. ఈ మిశ్రమాన్ని ఒక ప్లేట్ లోకి తీసుకుని చల్లారనివ్వండి.

-ఇప్పుడు వేయించి పెట్టుకున్న మసాలా దినుసులు, నువ్వులు కొబ్బరి మిశ్రమాన్ని మిక్సీ జార్ లోకి తీసుకోండి. వీటితో పాటు రాతి పువ్వు, కారం, పసుపు, ఇంగువ, ఉప్పు జతచేయండి. అన్నింటినీ మెత్తని పొడిలా గ్రైండ్ చేసుకోండి.

-అంతే ఘుమఘుమలాడే మహారాష్ట్ర స్పెషల్ గోదా మసాలా రెడీ.

-తయారు చేసుకున్న మసాలాను గాలి చొరబడని గాజు సీసాలో భద్రపరుచుకోండి. ఇలా చేయడం వల్ల మసాలా సువాసన పోకుండా ఎక్కువ కాలం నిల్వ ఉంటుంది.