సమ్మర్ స్పెషల్..ఎలాంటి కృత్రిమ రంగులు లేని స్వచ్ఛమైన రాజస్థానీ మట్కా కుల్ఫీ..టేస్ట్ కేక!

ఎండాకాలంలో ఉదయం నుంచే భగభగ మండే సూర్యుడు, చెమటలతో శరీరం అలసిపోతుంది. ఏ పని చేసినా వెంటనే నీరసం వచ్చేస్తుంది. ఇలాంటి సమయంలో మనసు ఏదైనా చల్లగా, తీయగా తినాలని ఆరాటపడుతుంది. ఆ సమయంలో అందరికీ గుర్తొచ్చే అద్భుతమైన రుచి కుల్ఫీ. వేసవి తాపం నుండి ఉపశమనం పొందడానికి, మనసును ఉత్తేజపరచడానికి కుల్ఫీ ఒక అమృతంలా పనిచేస్తుంది.

అయితే బయట మార్కెట్లో దొరికే కుల్ఫీల్లో కృత్రిమ రంగులు, కల్తీ పదార్థాలు ఉంటాయనే భయం మనల్ని వెనక్కి లాగుతుంది. మరి అదే కుల్ఫీని, ఎలాంటి కల్తీ లేకుండా స్వచ్ఛంగా ఇంట్లోనే తయారు చేసుకుంటే? అందులోనూ ప్రత్యేకమైన రాజస్థానీ మట్కా కుల్ఫీ అయితే ఆ మజానే వేరు. మట్టి కుండలో తయారైన ఈ కుల్ఫీ అందించే కమ్మటి సువాసన, నోట్లో వేసుకోగానే కరిగిపోయే క్రీమీ రుచి ఎవరినైనా ఇట్టే కట్టిపడేస్తాయి. మట్టి కుండలో గడ్డకట్టడం వల్ల ఆ మట్టికి ఉండే సహజమైన సువాసన కుల్ఫీకి పడుతుంది.

రాజస్థానీ మట్కా కుల్ఫీ తయారీకి కావలసిన పదార్థాలు

ఫుల్ క్రీమ్ పాలు - 1 లీటరు
మావా (కోవా) - 250 గ్రాములు
చక్కెర - అర కప్పు
కస్టర్డ్ పౌడర్ - 4 టీస్పూన్లు
బాదం, జీడిపప్పు, ఎండుద్రాక్ష - ఒక్కొక్క టేబుల్ స్పూన్
యాలకుల పొడి - అర టీస్పూన్

రాజస్థానీ మట్కా కుల్ఫీ తయారీ విధానం

-ముందుగా మందపాటి అడుగున్న గిన్నె తీసుకుని ఫుల్ క్రీమ్ పాలు పోయాలి. మీడియం మంట మీద పాలను వేడి చేస్తూ అందులో చక్కెర, తరిగిన డ్రై ఫ్రూట్స్, యాలకుల పొడి వేయాలి. పాలు అడుగు పట్టకుండా గరిటెతో తిప్పుతూ 15 నిమిషాల పాటు చిక్కబడేలా మరిగించాలి.

-మరుగుతున్న పాల నుండి కొద్దిగా పాలను ఒక కప్పులోకి తీసుకోండి. అందులో కస్టర్డ్ పౌడర్ వేసి, ఎలాంటి ఉండలు లేకుండా మెత్తని మిశ్రమంగా కలుపుకోవాలి.

-ఇప్పుడు స్టవ్ మీద మరుగుతున్న పాలలో మావా వేసి బాగా కలపాలి. తర్వాత ముందుగా సిద్ధం చేసుకున్న కస్టర్డ్ మిశ్రమాన్ని పాలలో కొద్దికొద్దిగా పోస్తూ గరిటెతో తిప్పుతూ ఉండాలి. మిశ్రమం కాస్త చిక్కబడ్డాక స్టవ్ ఆపేయాలి. ఈ మిశ్రమాన్ని పూర్తిగా చల్లారనివ్వాలి.

-చల్లారిన తర్వాత మిక్సీ జార్‌ లో వేసి ఒక్కసారి బ్లెండ్ చేయాలి. ఇలా చేస్తే కుల్ఫీ టెక్స్చర్ చాలా క్రీమీగా, మృదువుగా మారుతుంది. ఇప్పుడు ఈ మిశ్రమాన్ని చిన్న చిన్న మట్టి కుండల్లో (మట్కాల్లో) పోసి, ఫాయిల్‌ తో కవర్ చేసి డీప్ ఫ్రిజ్‌లో 4-5 గంటల పాటు ఉంచాలి.

-కుల్ఫీకి మరింత ఘాటైన రుచి కావాలంటే కొద్దిగా కండెన్స్డ్ మిల్క్ కలపవచ్చు. కాస్త కుంకుమపువ్వు వేస్తే రుచితో పాటు మంచి రంగు వస్తుంది. మట్టి కుండలు లేకపోతే, స్టీల్ గ్లాసులు లేదా ఐస్ క్రీమ్ మౌల్డ్స్ వాడుకోవచ్చు. సర్వ్ చేసేముందు పైన పిస్తా పప్పులు చల్లితే రుచి అదిరిపోతుంది.