తమిళనాడు స్పెషల్ గ్రేవీతో గుత్తి వంకాయ కర్రీ..తింటే నోట్లో బ్లాస్ట్!

ఎప్పుడూ చేసుకునే వంకాయ కూర, వేపుడు కాకుండా, తమిళనాడు సంప్రదాయ రుచులతో ఘుమఘుమలాడే గుత్తి వంకాయ కూరతో మీ భోజనాన్ని ఒక పండుగలా మార్చేయవచ్చు.

ఈ కూర ప్రత్యేకత..ఇంట్లోనే అప్పటికప్పుడు వేయించి నూరుకున్న ఒక మసాలా పొడి. ఈ పొడి సువాసన, రుచి ఈ కూరకి ప్రాణం పోస్తుంది. దీని రుచి చూస్తే మళ్ళీ మళ్ళీ కావాలని అడుగుతారు.

కావలసిన పదార్థాలు
లేత వంకాయలు - పావు కిలో
సాంబార్ ఉల్లిపాయలు- 100 గ్రాములు
వెల్లుల్లి రెబ్బలు - 10
చింతపండు - పెద్ద నిమ్మకాయంత
పసుపు - అర టీస్పూన్
ఇంగువ - పావు టీస్పూన్
కరివేపాకు - రెండు రెమ్మలు
బియ్యప్పిండి - 1 టీస్పూన్
నువ్వుల నూనె- 3 టేబుల్ స్పూన్లు
ఉప్పు - రుచికి సరిపడా
ఆవాలు - 1 టీస్పూన్
మినపప్పు - 1 టీస్పూన్
శనగపప్పు - 1 టీస్పూన్
ఎండు మిరపకాయలు - 7
ధనియాలు - 2 టేబుల్ స్పూన్లు
శనగపప్పు - 1 టేబుల్ స్పూన్
కందిపప్పు - 1 టీస్పూన్
మెంతులు - అర టీస్పూన్
జీలకర్ర - 1 టీస్పూన్

తయారీ విధానం

-ముందుగా మసాలా పొడిని రెడీ చేసుకోవాలి. ఇందుకోసం స్టవ్ మీద బాండీ పెట్టి అందులో ఎండు మిరపకాయలు, ధనియాలు, శనగపప్పు, కందిపప్పు, మెంతులు, జీలకర్ర వేసి నూనె లేకుండానే మంచి సువాసన వచ్చేదాకా దోరగా వేయించి స్టవ్ ఆపేయాలి.

-వేయించినవి చల్లారిన తర్వాత మిక్సీ జార్‌ లో వేసి మెత్తని పొడిగా గ్రైండ్ చేసి పక్కన పెట్టుకోండి.

-ఇప్పుడు ఒక గిన్నెలో చింతపండు వేసి, ఒక కప్పు గోరువెచ్చని నీళ్లు పోసి పది నిమిషాలు నానబెట్టండి. తర్వాత బాగా పిసికి, చిక్కటి రసాన్ని తీసి, పిప్పిని పడేయండి.

-ఇప్పుడు వంకాయలను కడిగి, తొడిమలు తీయకుండా నాలుగు భాగాలుగా గాట్లు పెట్టండి. చిన్న ఉల్లిపాయలను పొట్టు తీసి సిద్ధంగా ఉంచుకోండి. వెల్లుల్లిని కొద్దిగా దంచుకోండి.

-ఇప్పుడు స్టవ్ మీద బాండీ లేదా మందపాటి గిన్నె పెట్టి అందులో నూనె వేయండి. నూనె వేడెక్కాక ఆవాలు, మినపప్పు, శనగపప్పు వేసి బంగారు రంగులోకి వచ్చేవరకు వేయించండి.

-ఇప్పుడు అందులో వెల్లుల్లి, కరివేపాకు, చిన్న ఉల్లిపాయలు వేసి, ఉల్లిపాయలు మెత్తబడే వరకు వేయించాలి. ఆ తర్వాత పసుపు, ఇంగువ వేసి ఒకసారి కలపండి.

-ఇప్పుడు గాట్లు పెట్టిన వంకాయలను అందులో వేసి అవి కొద్దిగా మగ్గేవరకు ఐదు నిమిషాల పాటు మీడియం మంట మీద వేయించండి.

-వంకాయలు కొద్దిగా రంగు మారిన తర్వాత చింతపండు రసం, రుచికి సరిపడా ఉప్పు, తయారు చేసుకున్న మసాలా పొడి వేసి బాగా కలపండి. మూత పెట్టి నూనె పైకి తేలేంత వరకు 10-15 నిమిషాలు చిన్న మంట మీద ఉడికించండి. పచ్చి వాసన పోయి, కూర చిక్కబడుతుంది.

-చివరగా ఒక చిన్న గిన్నెలో బియ్యప్పిండి తీసుకుని, రెండు టేబుల్ స్పూన్ల నీళ్లు పోసి ఉండలు లేకుండా కలిపి ఆ మిశ్రమాన్ని ఉడుకుతున్న కూరలో పోసి కలపి మరో రెండు నిమిషాలు ఉడికించి స్టవ్ ఆఫ్ చేయండి.

-అంతే ఘుమఘుమలాడే, కమ్మనైన గుత్తి వంకాయ కర్రీ రెడీ.