మండే ఎండలకు చెక్.. ఇంట్లో ఉండే పండ్లతోనే చల్లటి, క్రీమీ ఐస్ క్రీమ్ తయారీ!

వేసవి కాలం రాగానే మనందరికీ ముందుగా గుర్తొచ్చేది చల్లని ఐస్ క్రీమ్. అయితే మార్కెట్లో దొరికే ఐస్ క్రీమ్‌ లలో తరచుగా హానికరమైన ప్రిజర్వేటివ్‌ లు, కృత్రిమ రంగులు, ఆర్టిఫిషియల్ ఫ్లేవర్లు, మోతాదుకు మించిన చక్కెర ఉంటాయి. ఇవి నాలుకకు రుచిని ఇస్తాయి కానీ, మన ఆరోగ్యానికి ఏమాత్రం మేలు చేయవు. ఇంట్లోనే సహజమైన తాజా పండ్లతో ఐస్ క్రీమ్ తయారు చేసుకోవచ్చు.

ఫ్రూట్ ఐస్ క్రీమ్ అనేది రుచి, ఆరోగ్యం, పోషకాల అద్భుతమైన కలయిక. మీకు ఇష్టమైన పండ్లను ఎంచుకుని, ఎలాంటి రసాయనాలు లేకుండా స్వచ్ఛమైన రుచిని ఆస్వాదించవచ్చు.

మామిడి ఐస్ క్రీమ్
బాగా పండిన, తీయటి మామిడి పండ్లను తీసుకుని వాటి గుజ్జును తీసి మిక్సీలో మెత్తగా బ్లెండ్ చేయండి. ఇప్పుడు దానికి తాజా క్రీమ్ (ఫ్రెష్ క్రీమ్), కొద్దిగా పాలు, మీ రుచికి సరిపడా తేనె లేదా పంచదార కలపండి. ఈ మిశ్రమాన్ని ఒక గాలి చొరబడని (ఎయిర్ టైట్) డబ్బాలో పోసి డీప్ ఫ్రీజర్‌లో 6 నుండి 8 గంటల పాటు ఉంచండి. అయితే మధ్యలో ఒకటి లేదా రెండు సార్లు బయటకు తీసి మళ్ళీ మిక్సీ పడితే ఐస్ క్రీమ్ మరింత క్రీమీగా, మృదువుగా వస్తుంది. ఈ సహజమైన మామిడి ఐస్ క్రీమ్ తింటుంటే అచ్చం నాచురల్ బ్రాండ్ ఐస్ క్రీమ్ తిన్న అనుభూతి కలుగుతుంది.

స్ట్రాబెర్రీ ఐస్ క్రీమ్
ముందుగా తాజా స్ట్రాబెర్రీలను శుభ్రంగా కడిగి, ముక్కలుగా కోసి, కొద్దిగా చక్కెరతో కలిపి మెత్తటి ప్యూరీలా రుబ్బుకోవాలి. దీనికి ఫ్రెష్ క్రీమ్, అలాగే కొద్దిగా గడ్డ పెరుగు కలపాలి. పెరుగు కలపడం వల్ల ఐస్ క్రీమ్‌ కు అద్భుతమైన క్రీమీ ఆకృతితో పాటు, తేలికపాటి పులుపు తోడై రుచి రెట్టింపు అవుతుంది. ఈ మిశ్రమాన్ని బాగా కలిపి, ఫ్రీజర్‌లో పెట్టాలి. కొన్ని గంటల తర్వాత తీసి, మళ్లీ బ్లెండ్ చేసి గడ్డకట్టనివ్వాలి. అంతే ఎంతో ఫ్రెష్‌గా, సహజమైన రుచితో ఉండే స్ట్రాబెర్రీ ఐస్ క్రీమ్ రెడీ.

అరటిపండు-చాక్లెట్ ఐస్ క్రీమ్
అరటిపండ్లను కోసి ఫ్రీజర్‌ లో 2 నుండి 3 గంటల పాటు ఉంచాలి. అవి గడ్డకట్టిన తర్వాత బయటకు తీసి బ్లెండర్‌ లో వేయాలి. అందులో కొద్దిగా కోకో పౌడర్, తీయదనం కోసం కొద్దిగా తేనె, కాస్త పాలు పోసి మెత్తని పేస్ట్‌లా అయ్యేవరకు రుబ్బాలి. ఆ తర్వాత ఒక పాత్రలో పోసి 4 నుండి 5 గంటల పాటు ఫ్రీజ్ చేయాలి. ఎలాంటి ఆర్టిఫిషియల్ ఫ్లేవర్స్ లేని ఈ చాక్లెట్ ఐస్ క్రీమ్ రుచికి పిల్లలే కాదు, పెద్దలు కూడా ఫిదా అవ్వాల్సిందే.