నిమ్మకాయ పచ్చిమిర్చి ఊరగాయ..పెరుగన్నంలోకి అదిరిపోయే కాంబినేషన్

భారతీయ వంటకాల్లో ముఖ్యంగా తెలుగు వారి భోజనంలో ఊరగాయకు ఉన్న స్థానం ఎంతో ప్రత్యేకం. ఏ కూర ఉన్నా, లేకపోయినా, వేడి వేడి అన్నంలో కాస్త నెయ్యి, పక్కన ఊరగాయ ఉంటే ఆ తృప్తే వేరు. మన సంప్రదాయ ఊరగాయలలో నిమ్మకాయ పచ్చిమిర్చి ఊరగాయ చాలా రుచికరమైనది, ఆరోగ్యకరమైనది కూడా.

నిమ్మకాయలోని పులుపు, పచ్చిమిర్చిలోని ఘాటు కలిసి దీనికి అద్భుతమైన రుచిని ఇస్తాయి. ఆవకాయలో నూనె ఎక్కువగా ఉంటుంది, కానీ ఈ పచ్చడిని చాలా తక్కువ నూనెతో లేదా నూనె లేకుండా కూడా చేసుకోవచ్చు. నిమ్మకాయ పచ్చిమిర్చి ఊరగాయ కొన్ని నెలల పాటు నిల్వ ఉండేలా ఎలా చేసుకోవాలో ఇక్కడ చూడండి.

కావలసిన పదార్థాలు
నిమ్మకాయలు: 10 - 12
పచ్చిమిరపకాయలు: 100-150 గ్రా
కల్లు ఉప్పు: 3-4 టేబుల్ స్పూన్లు
పసుపు: 1 టీస్పూన్
ఆవాలు: 1 టీస్పూన్
వేయించి పొడి చేసిన మెంతి పిండి: అర టీస్పూన్
ఇంగువ: చిటికెడు.
నూనె: 2 టేబుల్ స్పూన్లు
నిమ్మరసం: అదనంగా 3-4 నిమ్మకాయల రసం

తయారీ విధానం

-ముందుగా నిమ్మకాయలను, పచ్చిమిరపకాయలను నీటితో శుభ్రంగా కడిగాక ఒక పొడి వస్త్రంతో తడి లేకుండా తుడవాలి. తుడిచిన తర్వాత ఒక గంట పాటు ఫ్యాన్ కింద ఆరబెట్టండి.

-ఇప్పుడు నిమ్మకాయలను చిన్న చిన్న ముక్కలుగా కోసుకోవాలి.

-పచ్చిమిరపకాయల తొడిమలు తీసేసి వాటిని నిలువుగా చీల్చుకోవాలి.

-ఇప్పుడు ఒక పొడి గాజు సీసా లేదా జాడీని తీసుకోండి. అందులో కోసి ఉంచుకున్న నిమ్మకాయ ముక్కలు, పచ్చిమిర్చి ముక్కలు వేయాలి. దీనిపై పసుపు, ఉప్పు వేసి బాగా కలపాలి.

-ఈ మిశ్రమంలో అదనంగా తీసి పెట్టుకున్న 3-4 నిమ్మకాయల రసాన్ని పిండాలి. ఈ రసం వల్ల ముక్కలు త్వరగా మెత్తబడతాయి, పచ్చడి జ్యూసీగా ఉంటుంది.

-ఇప్పుడు మూత పెట్టి ఈ సీసాను 3- 4 రోజుల పాటు పక్కన పెట్టాలి. రోజుకు ఒకసారి లేదా రెండుసార్లు పొడి గరిటెతో ముక్కలను పైకి కిందకి కలుపుతూ ఉండాలి. దీనివల్ల ఉప్పు, పులుపు ముక్కలకు బాగా పడుతుంది. 3 రోజుల తర్వాత నిమ్మకాయ తొక్క మెత్తబడుతుంది.

-కొంతమంది దీనిని ఇలాగే తింటారు. కానీ రుచిని పెంచడానికి పోపు(తాలింపు) పెట్టుకోవచ్చు. ఇందుకోసం ఒక చిన్న బాండీలో నూనె వేడి చేయాలి.

-నూనె వేడయ్యాక ఆవాలు వేసి చిటపటలాడించాలి. తర్వాత ఇంగువ వేసి స్టవ్ ఆఫ్ చేయాలి. ఈ నూనె పూర్తిగా చల్లారిన తర్వాత అందులో మెంతి పొడి వేసి ఊరిన పచ్చడిలో కలపాలి.

-ఇప్పుడు రుచికరమైన, ఘాటైన నిమ్మకాయ పచ్చిమిర్చి ఊరగాయ రెడీ. దీనిని పెరుగన్నంతో గానీ, ఉప్మాతో గానీ తింటే రుచి అద్భుతంగా ఉంటుంది.