ఫైవ్ స్టార్ రెస్టారెంట్ రుచితో.. ఇంట్లోనే సులభంగా క్రీమీ కోకోనట్ చికెన్ కర్రీ..ఎలా చేసుకోవాలంటే..

ప్రతిసారి ఒకే రకమైన చికెన్ కూర తిని మీకు బోర్ కొట్టిందా? మీ నాలికకు కొత్త రుచిని పరిచయం చేస్తూ, ఏదైనా క్రీమీగా, భిన్నంగా ట్రై చేయాలని ఉందా? అయితే కొబ్బరి(కోకోనట్)చికెన్ కర్రీ ట్రై చేయండి. మృదువైన ఆకృతి, కొద్దిపాటి పులుపు,సుగంధ ద్రవ్యాల ఘాటు కలగలిసిన ఈ కూర రుచి వర్ణనాతీతం.

దక్షిణ భారత వంటకాల్లో కొబ్బరి, కరివేపాకు చేసే మ్యాజిక్ అంతా ఇంతా కాదు. వేడి నూనెలో ఆవాలు చిటపటలాడుతుంటే, కరివేపాకు సువాసన ఇల్లంతా వ్యాపిస్తుంటే, దానికి కొబ్బరి పాల కమ్మదనం తోడైతే.. ఇంట్లో చేసిన సాధారణ చికెన్ కర్రీ కూడా ఫైవ్ స్టార్ రెస్టారెంట్ రుచిని తలపిస్తుంది. వంట రాని వారు కూడా అద్భుతంగా కోకోనట్ చికెన్ కర్రీ ఎలా చేసుకోవచ్చో ఇక్కడ చూడండి.

కోకోనట్ చికెన్ కర్రీ కావలసిన పదార్థాలు

-అర కిలో చికెన్‌
-2 కప్పుల చిక్కటి కొబ్బరి పాలు
-1 టేబుల్ స్పూన్ చింతపండు గుజ్జు
-2 ఉల్లిపాయలు
-1 టేబుల్ స్పూన్ అల్లంవెల్లుల్లి పేస్ట్
-2 పచ్చిమిర్చి,
-10 కరివేపాకులు
-అర టీస్పూన్ ఆవాలు
-దాల్చినచెక్క
-లవంగాలు
-యాలకులు
-పసుపు
-కారం
-ధనియాల పొడి
-జీలకర్ర పొడి
-ఉప్పు
-2 టేబుల్ స్పూన్ల కొబ్బరి నూనె

కోకోనట్ చికెన్ కర్రీ తయారీ విధానం

-ముందుగా కడిగిన చికెన్‌ లో పసుపు, కారం, అల్లంవెల్లుల్లి పేస్ట్, కొద్దిగా ఉప్పు వేసి ముక్కలకు బాగా పట్టించండి. మూతపెట్టి అరగంట పాటు పక్కన పెడితే మసాలాలు లోపలికి ఇంకి, చికెన్ మృదువుగా, జ్యూసీగా మారుతుంది.

-ఒక మందపాటి గిన్నెలో కొబ్బరి నూనె వేడి చేయండి. ఆవాలు వేసి చిటపటలాడాక, కరివేపాకు, నిండు మసాలా దినుసులు వేయండి.మసాలాలు మాడకుండా చూసుకోండి.

-ఇప్పుడు అందులో సన్నగా తరిగిన ఉల్లిపాయలు, పచ్చిమిర్చి వేసి తక్కువ మంటపై దోరగా వేయించండి. అవి లేత బంగారు రంగులోకి మారాక ధనియాల పొడి, జీలకర్ర పొడి వేసి పచ్చివాసన పోయేలా తేలికగా వేయించండి.

-ఇప్పుడు పక్కన ఉంచుకున్న చికెన్ ముక్కలను వేసి పెద్ద మంటపై 5-7 నిమిషాలు వేయించండి. ఇలా చేయడం వల్ల చికెన్ రంగు మారి, మసాలాలు ముక్కలకు బాగా పడతాయి.

-మంటను సిమ్‌ లో పెట్టి, కొబ్బరి పాలు, చింతపండు గుజ్జు వేసి నెమ్మదిగా కలపండి. గ్రేవీ విరిగిపోకుండా ఉండాలంటే మంట తక్కువగా ఉండాలి. మూతపెట్టి ఓ 15-20 నిమిషాల పాటు ఉడికించండి. మధ్యమధ్యలో కలుపుతూ ఉంటే గ్రేవీ వెల్వెట్ లాగా మారుతుంది.

-చికెన్ మెత్తగా ఉడికి, గ్రేవీ క్రీమీగా చిక్కబడ్డాక కొత్తిమీర చల్లి స్టవ్ ఆపేయండి. అంతే గుమగుమలాడే కొబ్బరి కోకోనట్ కర్రీ రెడీ. దీన్ని వేడి వేడి అన్నం లేదా కేరళ స్టైల్ అప్పంతో కలిపి తింటుంటే ప్రతి ముద్దకు ప్రాణం లేచి వస్తుంది.