చికెన్ లవర్స్‌ కు పండుగే.. రెండు రకాల సాస్‌ లతో అదరగొట్టే బ్యాంగ్ బ్యాంగ్ చికెన్..

మీరు చికెన్ లవర్సా? ఎప్పుడూ రొటీన్‌గా తినే చికెన్ వంటకాలతో బోర్ కొట్టిందా? అయితే ప్రముఖ చెఫ్ రణ్‌వీర్ బ్రార్ పంచుకున్న ప్రత్యేకమైన వంటకం బ్యాంగ్ బ్యాంగ్ చికెన్ మీ ఇంట్లో ట్రై చేయండి. దీన్నే చిల్లీ చికెన్ అని కూడా అంటారు. పైన కరకరలాడుతూ, లోపల ఎంతో మృదువుగా, జ్యూసీగా ఉండే ఈ చికెన్ రుచి చూస్తే ఎవరైనా ఫిదా అవ్వాల్సిందే. చికెన్ మరింత క్రిస్పీగా రావాలంటే, మ్యారినేషన్ సమయంలో కొద్దిగా కార్న్‌స్టార్చ్ (మొక్కజొన్న పిండి) కలుపుకోవచ్చని చెఫ్ బ్రార్ సలహా ఇస్తున్నారు. నోరూరించే బ్యాంగ్ బ్యాంగ్ చికెన్, దానికి అదిరిపోయే కాంబినేషన్‌గా రెండు రకాల సాస్‌ లు ఎలా తయారు చేయాలో ఇక్కడ చూడండి.

బ్యంగ్ బ్యాంగ్ చికెన్ తయారీకి కావలసిన పదార్థాలు

చికెన్ తొడ ముక్కలు (బోన్‌ లెస్) - 500 గ్రాములు
అల్లం-వెల్లుల్లి పేస్ట్ - 1 టేబుల్ స్పూన్
నూనె - 1 టీస్పూన్
ఎర్ర కారం పొడి- 1 టేబుల్ స్పూన్
దంచిన మిరియాల పొడి - అర టీస్పూన్
తురిమిన వెల్లుల్లి రెబ్బలు - 2 లేదా 3
ఉప్పు - రుచికి సరిపడా

అమెరికన్ స్టైల్ సాస్ తయారీకి కావాల్సినవి

మయోన్నైస్ - 2-3 టేబుల్ స్పూన్లు
హాట్ సాస్ - 2 టేబుల్ స్పూన్లు
స్వీట్ చిల్లీ సాస్ - 1 టేబుల్ స్పూన్
టొమాటో కెచప్ - 1 టేబుల్ స్పూన్

షెజ్వాన్ స్టైల్ సాస్ తయారీకి కావాల్సినవి

తెల్ల నువ్వులు - 2 టేబుల్ స్పూన్లు
చిల్లీ ఆయిల్ - 1-2 టీస్పూన్లు
వేయించిన వేరుశెనగలు - ముప్పావు కప్పు
డార్క్ సోయా సాస్ - 1-2 టీస్పూన్లు
కొద్దిగా నీరు

పేస్ట్ కోసం కావాల్సినవి

1 పచ్చిమిర్చి
2 టేబుల్ స్పూన్ల ఉల్లికాడలు (స్ప్రింగ్ ఆనియన్స్)
2 టేబుల్ స్పూన్ల కొత్తిమీర
అర అంగుళం అల్లం
1-2 టీస్పూన్ల మాల్ట్ వెనిగర్
1-2 టీస్పూన్ల సోయా సాస్
1-2 టేబుల్ స్పూన్ల చిల్లీ ఆయిల్
2 టేబుల్ స్పూన్ల నూనె.
వేయించడానికి సరిపడా నూనె

అలంకరణ కోసం

దోసకాయ ముక్కలు
నువ్వులు
కొత్తిమీర
చిల్లీ ఆయిల్

అమెరికన్ సాస్ తయారీ విధానం

-ముందుగా ఒక గిన్నె తీసుకుని అందులో మయోన్నైస్, హాట్ సాస్, స్వీట్ చిల్లీ సాస్, టొమాటో కెచప్ వేసి బాగా కలపాలి. క్రీమీగా ఉండే ఈ సాస్ రెడీ. దీనిలోంచి ఒక టేబుల్ స్పూన్ సాస్ తీసి పక్కన పెట్టుకోండి, ఇది చికెన్ మ్యారినేషన్ కు అవసరం.

చికెన్ మ్యారినేషన్
-శుభ్రం చేసిన చికెన్ ముక్కలకు మసాలా పట్టేలా చిన్న చిన్న గాట్లు పెట్టండి. ఒక పెద్ద గిన్నెలో చికెన్ ముక్కలు తీసుకుని, అందులో అల్లం వెల్లుల్లి పేస్ట్, నూనె, ఎర్ర కారం పొడి, నల్ల మిరియాల పొడి, తురిమిన వెల్లుల్లి, రుచికి సరిపడా ఉప్పు వేయాలి. దీనికి ముందుగా సిద్ధం చేసుకున్న అమెరికన్ సాస్‌ లో ఒక టేబుల్ స్పూన్ వేసి, ముక్కలకు బాగా పట్టేలా కలపాలి.

షెజ్వాన్ స్టైల్ సాస్ తయారీ
-ఒక గిన్నెలో తెల్ల నువ్వులు, చిల్లీ ఆయిల్, వేయించిన వేరుశెనగలు, డార్క్ సోయా సాస్, కొద్దిగా నీరు పోసి కలుపుకోవాలి. ఇప్పుడు మిక్సీ జార్‌ లో పచ్చిమిర్చి, ఉల్లికాడలు, అల్లం, మాల్ట్ వెనిగర్, సోయా సాస్, చిల్లీ ఆయిల్, కొత్తిమీర వేసి మెత్తని పేస్ట్‌లా రుబ్బుకోవాలి. ఈ పేస్ట్‌ ను ముందుగా కలిపి పెట్టుకున్న వేరుశెనగల మిశ్రమంలో వేసి బాగా కలిపి పక్కన పెట్టుకోవాలి.

చికెన్ వండే విధానం

-స్టవ్ మీద పాన్ పెట్టి, షాలో ఫ్రైకి సరిపడా నూనె వేడి చేయాలి. నూనె కాగాక మ్యారినేట్ చేసిన చికెన్ ముక్కలను వేసి, రెండు వైపులా 4 నుండి 5 నిమిషాల పాటు వేయించాలి. చికెన్ లోపల మెత్తగా ఉడికి, పైన కరకరలాడుతూ తయారవ్వాలి.

-వేడివేడి బ్యాంగ్ బ్యాంగ్ చికెన్‌ ను ఒక సర్వింగ్ ప్లేట్‌ లోకి తీసుకుని, దానిపై సన్నగా తరిగిన దోసకాయ ముక్కలు, తెల్ల నువ్వులు, కొత్తిమీర, చిల్లీ ఆయిల్‌ తో అందంగా అలంకరించుకోవాలి. షెజ్వాన్ సాస్‌ లో అద్దుకుని తింటే దీని రుచి మాటల్లో చెప్పలేం.