Jalebi: స్ట్రీట్ స్టైల్ జిలేబీ..ఇంట్లోనే పర్ఫెక్ట్ గా ఎలా చేసుకోవాలంటే..

జిలేబీ అనేది భారతదేశంలో ఒక ప్రసిద్ధ తీపి వంటకం. దీని ప్రత్యేకమైన తీపి రుచి, కరకరలాడే స్వభావం, సిరప్‌ తో నిండిన లోపలి భాగం ప్రతి ఒక్కరినీ మంత్రముగ్ధులను చేస్తాయి. ముఖ్యంగా స్ట్రీట్ స్టైల్ జిలేబీకి ఉండే ప్రత్యేకమైన రుచి, వాసన ఎంతోమందిని ఆకర్షిస్తాయి. జిలేబీని సాధారణంగా అల్పాహారంగా లేదా స్నాక్ గా తింటారు. రాజస్తాన్, మధ్యప్రదేశ్,యూపీ,గుజరాత్ రాష్ట్రాల్లో పొద్దున్నే బ్రేక్ ఫాస్ట్ లోకి జిలేబీనే ఎక్కువగా తింటారు. మీ ఇంట్లోనే చాలా ఈజీగా స్ట్రీట్ స్టైల్ జిలేబీని ఎలా తయారు చేసుకోవాలొ ఇక్కడ చూడండి.

జిలేబీ తయారీకి కావలసిన పదార్థాలు

-మైదా పిండి: 1 కప్పు
-పుల్లని పెరుగు: 2 టేబుల్ స్పూన్లు
-ఈస్ట్ (డ్రై ఈస్ట్): 1/2 టీస్పూన్
-బేకింగ్ పౌడర్: 1/4 టీస్పూన్
-పసుపు లేదా ఆరెంజ్ ఫుడ్ కలర్: చిటికెడు
-గోరువెచ్చని నీరు: అవసరమైనంత
-చక్కెర: 2 కప్పులు
-నీరు: 1 కప్పు
-యాలకుల పొడి: 1/2 టీస్పూన్
-కుంకుమపువ్వు: కొన్ని
-నిమ్మరసం: 1/2 టీస్పూన్
-నూనె లేదా నెయ్యి: వేగించడానికి సరిపడా

జిలేబీ తయారీ విధానం

-ముందుగా ఒక పెద్ద గిన్నెలో మైదా పిండి తీసుకోండి. ఇందులో పుల్లని పెరుగు, ఈస్ట్ లేదా బేకింగ్ పౌడర్, చిటికెడు పసుపు లేదా ఫుడ్ కలర్ కలపండి.

-కొద్దికొద్దిగా గోరువెచ్చని నీటిని పోసుకుంటూ ఉండలు లేకుండా బాగా కలపండి. ఇది మరీ చిక్కగా, మరీ పల్చగా ఉండకూడదు. దోశ పిండి కంటే కొంచెం చిక్కగా ఉండాలి. ఈస్ట్ వేసినట్లయితే పిండిని బాగా కలిపి కనీసం 6-8 గంటలు వెచ్చని ప్రదేశంలో పులియబెట్టండి. బేకింగ్ పౌడర్ వాడితే 1-2 గంటలు పులియబెడితే సరిపోతుంది. పిండి పులిసిన తర్వాత అది కొద్దిగా పెరిగి, బబుల్స్ వస్తాయి.

-పిండి పులిసిన తర్వాత దాన్ని ఒకసారి నెమ్మదిగా కలపండి.

-తర్వాత ఒక మందపాటి గిన్నెలో చక్కెర, నీరు వేసి పొయ్యి మీద పెట్టండి. పంచదార పూర్తిగా కరిగే వరకు మీడియం మంటపై వేడి చేయండి. పంచదార కరిగిన తర్వాత మంటను తగ్గించి యాలకుల పొడి, కుంకుమపువ్వు, నిమ్మరసం కలపండి.

-సిరప్ కొద్దిగా జిగురుగా మారే వరకు మరిగించండి. తీగ పాకం అవసరం లేదు,కానీ చేతులకు అంటుకునేంత జిగురుగా ఉండాలి. సుమారు 5-7 నిమిషాలు మరిగించాలి.

-సిరప్‌ ను వేడిగా ఉంచడానికి పొయ్యి మీద తక్కువ మంటపై ఉంచండి.

-ఇప్పుడు జిలేబీలు వేయించడానికి ఒక కడాయిలో నూనె లేదా నెయ్యి వేసి మీడియం మంటపై వేడి చేయండి. జిలేబీలు మునిగేంత నూనె ఉండాలి.

-జిలేబీ పిండిని ఒక జిలేబీ మేకర్ లేదా జిప్ లాక్ బ్యాగ్ (చివర చిన్న రంధ్రం చేసి) లేదా మందపాటి వస్త్రం (దాని మధ్యలో రంధ్రం చేసి)లోకి తీసుకోండి.

-నూనె బాగా వేడెక్కిన తర్వాత పిండిని గుండ్రంగా, స్పైరల్ ఆకారంలో నూనెలోకి పిండండి. మీకు నచ్చిన పరిమాణంలో జిలేబీలను వేయవచ్చు. ఒకేసారి ఎక్కువ జిలేబీలను వేయకండి.

-జిలేబీలు ఒక వైపు గోల్డెన్ బ్రౌన్ అయ్యే వరకు వేగించండి. తర్వాత మరోవైపు తిప్పి గోల్డెన్ బ్రౌన్, కరకరలాడే వరకు వేగించండి.

-వేగించిన జిలేబీలను వెంటనే వేడి సిరప్‌ లోకి వేయండి. ప్రతి జిలేబీని 30 సెకన్ల నుండి 1 నిమిషం పాటు సిరప్‌ లో నానబెట్టండి, రెండు వైపులా తిప్పుతూ సిరప్‌ను బాగా పీల్చుకునేలా చూసుకోండి.

-జిలేబీలు సిరప్‌ ను పీల్చుకున్న తర్వాత వాటిని తీసి సర్వింగ్ ప్లేట్‌ లోకి మార్చండి. అంతే రుచికరమైన స్ట్రీట్ స్టైల్ జిలేబీలు రెడీ.

-జిలేబీలో చక్కెర, పిండి పదార్థాలు ఎక్కువగా ఉంటాయి కాబట్టి మితంగా తీసుకోవడం చాలా ముఖ్యం. మధుమేహం ఉన్నవారు లేదా బరువు తగ్గాలనుకునే వారు దీనిని తక్కువగా తీసుకోవాలి.