ఆన్‌ లైన్ ఆర్డర్స్ వద్దు.. కరకరలాడే జ్యూసీ కొరియన్ ఫ్రైడ్ చికెన్‌ ఇంట్లోనే ఇలా ఈజీగా చేసుకోండి

బయట రెస్టారెంట్లలో దొరికే క్రిస్పీ, జ్యూసీ కొరియన్ ఫ్రైడ్ చికెన్ తినాలనిపిస్తోందా? ఫుడ్ యాప్స్‌ లో ఆర్డర్ చేసే పని లేకుండా, అచ్చం రెస్టారెంట్ రుచితో, అతి తక్కువ సమయంలో మీ ఇంట్లోనే కొరియన్ ఫ్రైడ్ చికెన్ తయారు చేసుకోవచ్చు. తీయగా, కారంగా, వెల్లుల్లి ఘాటుతో నోరూరించే ఈ కొరియన్ స్టైల్ స్టిక్కీ హనీ గార్లిక్ చికెన్ చేయడం చాలా తేలిక. 15 నిమిషాల్లోనే దీనిని ఈజీగా తయారుచేసుకోవచ్చు. పిల్లలైనా, పెద్దలైనా దీన్ని లొట్టలేసుకుంటూ తింటారు.

కొరియన్ ఫ్రైడ్ చికెన్ తయారీకి కావాల్సిన పదార్థాలు

-2 పెద్ద చికెన్ బ్రెస్ట్ ముక్కలు
-1 టీస్పూన్ ఉప్పు
-1 టీస్పూన్ మిరియాల పొడి
-3 టేబుల్ స్పూన్ల కార్న్‌ఫ్లోర్
-1 టీస్పూన్ వెల్లుల్లి పొడి
-2 టేబుల్ స్పూన్ల నూనె
-2 టేబుల్ స్పూన్ల టొమాటో పేస్ట్
-1 టేబుల్ స్పూన్ వెల్లుల్లి
-1 టేబుల్ స్పూన్ నువ్వుల నూనె
-1/3 కప్పు సోయా సాస్
-2 టేబుల్ స్పూన్ల వెనిగర్
-1 టేబుల్ స్పూన్ తేనె
-1/3 కప్పు నీళ్లు
-కొద్దిగా నువ్వులు
-సన్నగా తరిగిన ఉల్లికాడలు (స్ప్రింగ్ ఆనియన్స్)

View this post on Instagram

A post shared by Mehwish Wilson (@healthy_lifestyle0023)

కొరియన్ ఫ్రైడ్ చికెన్ తయారీ విధానం

-ముందుగా కట్ చేసి పెట్టుకున్న చికెన్ ముక్కలను ఒక గిన్నెలో వేసుకోండి. అందులో ఉప్పు, మిరియాల పొడి వేసి బాగా కలపాలి. ఆ తర్వాత కార్న్‌ ఫ్లోర్ వేసి, ప్రతి చికెన్ ముక్కకు పిండి బాగా పట్టేలా కోట్ చేసి పక్కన పెట్టుకోండి.

-ఒక పెద్ద పాన్‌ లో నూనె వేసి మీడియం మంట మీద వేడి చేయండి. ఇప్పుడు చికెన్ ముక్కలను ఒకదానికొకటి అంటుకోకుండా పాన్ అంతా పరుచుకునేలా వేయండి. పాన్ చిన్నదైతే రెండు సార్లు వేయించండి. ముక్కలు లోపల మెత్తగా ఉడికి, బయట బంగారు రంగు వచ్చేలా ప్రతి వైపు 3-4 నిమిషాల పాటు వేయించి ఒక ప్లేట్ లోకి తీసి పక్కన పెట్టుకోండి.

-చికెన్ వేయించిన పాన్‌ లోనే టొమాటో పేస్ట్, ప్రెష్ అల్లంవెల్లుల్లి పేస్ట్ వేసి పచ్చివాసన పోయి మంచి సువాసన వచ్చే వరకు 30 సెకన్ల పాటు తక్కువ మంట మీద వేయించండి. ఇప్పుడు అందులో నువ్వుల నూనె, సోయా సాస్, వెనిగర్, తేనె, నీళ్లు పోసి బాగా కలపండి. ఈ మిశ్రమాన్ని ఒక నిమిషం పాటు ఉడకనిస్తే సాస్ కొద్దిగా చిక్కబడుతుంది.

-ఇప్పుడు ఆ చిక్కటి సాస్ లో ముందుగా వేయించి పెట్టుకున్న చికెన్ ముక్కలను వేయండి. సాస్ ప్రతి ముక్కకూ పట్టి, చికెన్ ముక్కలు నిగనిగలాడుతూ అద్భుతంగా కనిపించే వరకు బాగా టాస్ చేయండి. అంతే చికెన్ రెడీ.

-ఒక బౌల్‌ లో వేడి వేడి అన్నం పెట్టుకుని, దానిపై ఈ స్టిక్కీ హనీ గార్లిక్ చికెన్ వేసుకోండి. పైన కొద్దిగా నువ్వులు, సన్నగా తరిగిన ఉల్లికాడలు చల్లి తింటుంటే ఆ మజానే వేరు.