బజ్జీలు, పకోడీలు బోర్ కొట్టాయా? అయితే ఈ హాట్ పనీర్ మంచూరియన్ ట్రై చేయండి

సాయంత్రం వేళ మనసు వేడివేడిగా, కాస్త ఘాటుగా ఉండే ఆహారాన్ని కోరుకోవడం సహజం. వేడి టీ లేదా కాఫీతో పాటు ఏదైనా రుచికరమైన స్నాక్ ఉంటే ఆ ఆనందమే వేరు. సాధారణంగా మనం బజ్జీలు లేదా పకోడీలు చేసుకుంటాం. కానీ, ఈసారి కాస్త వెరైటీగా, రెస్టారెంట్ రుచిని తలపించేలా పనీర్ మంచూరియన్ ట్రై చేయండి.

పనీర్ అంటేనే మెత్తదనం, దానికి మంచూరియన్ సాస్‌ ల ఘాటు తోడైతే రుచి అద్భుతంగా ఉంటుంది. కేవలం అరగంటలోనే ఇంట్లో ఉండే పదార్థాలతోనే ఈ రెసిపీని ఎలా తయారు చేసుకోవాలో ఇక్కడ చూడండి.

కావలసిన పదార్థాలు
-800 గ్రాముల పనీర్
-1 టీస్పూన్ కార్న్ స్టార్చ్
-1 అంగుళం అల్లం
-5 వెల్లుల్లి రెబ్బలు
-1 ఉల్లిపాయ
-4 పచ్చిమిర్చి
-అర కప్పు స్ప్రింగ్ ఆనియన్స్
-కొత్తిమీర
-2 టేబుల్ స్పూన్ల కార్న్ స్టార్చ్ ద్రావణం
-2 టేబుల్ స్పూన్ల సోయా సాస్
-2 టేబుల్ స్పూన్ల టొమాటో కెచప్
-1 టేబుల్ స్పూన్ షెజ్వాన్ సాస్
-1 స్పూన్ వెనిగర్
-1 స్పూన్ పంచదార
-అర స్పూన్ నల్ల మిరియాల పొడి
-అర కప్పు నీళ్లు

తయారీ విధానం

-మంచూరియన్ రుచి మొత్తం దాని సాస్‌ లోనే ఉంటుంది. ముందుగా ఒక గిన్నెలో సోయా సాస్, టొమాటో కెచప్, షెజ్వాన్ సాస్, వెనిగర్, పంచదార, నల్ల మిరియాల పొడి, నీళ్లు పోసి బాగా కలపాలి. ఈ మిశ్రమాన్ని పక్కన పెట్టుకోండి.

-ఇప్పుడు స్టవ్ ఆన్ చేసి ఒక వెడల్పాటి పాన్ పెట్టుకుని అందులో నూనె వేడి చేయండి. నూనె వేడెక్కాక, పనీర్ ముక్కలకు కొద్దిగా కార్న్ స్టార్చ్ పట్టించి పాన్‌ లో వేయండి. పనీర్ ముక్కలు రెండు వైపులా బంగారు రంగు వచ్చే వరకు వేయించాలి.

-పనీర్ వేగిన తర్వాత సన్నగా తరిగిన అల్లం, వెల్లుల్లి వేసి 2-3 నిమిషాలు వేయించాలి. ఆ తర్వాత ఉల్లిపాయ ముక్కలు, పచ్చిమిర్చి, కొత్తిమీర కాండాలు వేసి దోరగా వేయించాలి. ఉల్లిపాయలు బంగారు రంగులోకి మారుతున్నప్పుడు వచ్చే సువాసన మీ ఆకలిని రెట్టింపు చేస్తుంది.

-ఇప్పుడు ముందుగా సిద్ధం చేసుకున్న సాస్ మిక్స్‌ ను పాన్‌ లో వేయండి. సాస్ కొద్దిగా మరిగి బుడగలు వస్తున్నప్పుడు వేయించిన పనీర్ ముక్కలను అందులో వేసి కలపండి. గ్రేవీ చిక్కగా కావాలనుకుంటే, ముందుగా సిద్ధం చేసుకున్న కార్న్ స్టార్చ్ ద్రావణాన్ని కొద్దికొద్దిగా పోస్తూ కలపండి. సాస్ పనీర్ ముక్కలకు బాగా పట్టేలా టాస్ చేయండి.

-చివరగా సన్నగా తరిగిన స్ప్రింగ్ ఆనియన్స్, తాజా కొత్తిమీరను చల్లి స్టవ్ ఆఫ్ చేయండి. అంతే వేడి వేడి, కారంగా ఉండే పనీర్ మంచూరియన్ రెడీ.

-దీన్ని సర్వింగ్ బౌల్‌ లోకి తీసుకుని, పైన మరికొన్ని ఉల్లికాడలతో అలంకరించి వేడిగా వడ్డించండి.