పూరీ, రోటీల్లోకి అదిరిపోయే దమ్ ఆలూ..మీ హోలీ వేడుకలకు స్పైసీ ట్విస్ట్!

హోలీ పండుగ అనగానే మనకు ముందుగా గుర్తొచ్చేది రంగుల కోలాహలం, బంధుమిత్రుల సందడి. హోలీ రోజున ఇంటికి వచ్చే అతిథులకు రకరకాల స్వీట్లు, మిఠాయిలు వడ్డించడం మన సంప్రదాయం. అయితే కేవలం తీపి పదార్థాలే కాకుండా కాస్త ఘాటుగా, కమ్మగా ఉండే వంటకాలు కూడా ఉంటే ఆ పండుగ భోజనం మరింత పరిపూర్ణంగా మారుతుంది.

వేడి వేడి పూరీలు లేదా కరకరలాడే కచోరీలతో పాటు అద్భుతమైన రుచితో కూడిన కూరగాయల వంటకం అందించాలనుకుంటే.. దమ్ ఆలూ మీకు పర్ఫెక్ట్ ఆప్షన్. చిన్న చిన్న బంగాళాదుంపలు (బేబీ పొటాటోస్), ఘుమఘుమలాడే సుగంధ ద్రవ్యాలు, కమ్మని క్రీమీ గ్రేవీ కలయికతో తయారయ్యే ఈ వంటకం ప్రతి ఒక్కరినీ ఇట్టే ఆకర్షిస్తుంది. దమ్ ఆలూ ఎలా తయారుచేసుకోవాలో ఇక్కడ చూడండి.

కావాల్సిన పదార్థాలు

తాజా చిన్న బంగాళాదుంపలు (బేబీ పొటాటోస్) - 500 గ్రాములు
ఉప్పు - మీ రుచికి తగినంత
నూనె - బంగాళాదుంపలను వేయించడానికి
కమ్మటి పెరుగు - 1 కప్పు
ఉల్లిపాయ పేస్ట్ - 2 టీస్పూన్లు
టమోటా పేస్ట్ - 2 టీస్పూన్లు
అల్లం-వెల్లుల్లి పేస్ట్ - 1 టీస్పూన్
జీడిపప్పు పేస్ట్ - 2 టీస్పూన్లు
పచ్చిమిర్చి పేస్ట్ - 1 టీస్పూన్
పసుపు - అర టీస్పూన్
ఎర్ర కారం - 1 టీస్పూన్
ధనియాల పొడి - 1 టీస్పూన్
జీలకర్ర పొడి - అర టీస్పూన్
గరం మసాలా - 1 టీస్పూన్
కసూరి మేథి- 1 టీస్పూన్
ఇంగువ- ఒక చిటికెడు
బిర్యానీ ఆకు - 1
జీలకర్ర - 1 టీస్పూన్
సన్నగా తరిగిన పచ్చి కొత్తిమీర
ఫ్రెష్ క్రీమ్ - 1 టీస్పూన్

తయారీ విధానం

-ముందుగా బేబీ పొటాటోలను ప్రెషర్ కుక్కర్‌ లో వేసి తగినంత నీరు పోసి ఉడకబెట్టండి. ఉడికిన తర్వాత వాటిని బయటకు తీసి, చల్లారాక తొక్క తీయండి. మసాలా అంతా లోపలికి వెళ్లేలా ఒక ఫోర్క్ లేదా కత్తితో బంగాళాదుంపలకు అక్కడక్కడా తేలికగా గుచ్చండి.

-ఇప్పుడు ఒక పాన్‌ లో నూనె పోసి వేడి చేయండి. నూనె కాగాక ఉడికించిన పొటాటోలను అందులో వేసి, తక్కువ మంట మీద అవి బంగారు రంగులోకి మారి, పైన క్రిస్పీగా తయారై మంచి సువాసన వచ్చే వరకు వేయించి పక్కన పెట్టుకోండి.

-గ్రేవీ తయారీ కోసం మరొక మందపాటి పాన్ తీసుకుని అందులో కొద్దిగా నూనె వేడి చేయండి. నూనె వేడెక్కాక జీలకర్ర, బిర్యానీ ఆకు, చిటికెడు ఇంగువ వేసి వేయించండి. ఆ వెంటనే ఉల్లిపాయ పేస్ట్, అల్లంవెల్లుల్లి పేస్ట్, టమోటా పేస్ట్ వేసి బాగా కలపండి. ఈ మిశ్రమం పచ్చివాసన పోయి, నూనె పైకి తేలే వరకు సన్నని మంటపై మసాలాను వేయించాలి.

-తరువాత ఇందులో పసుపు, ఎర్ర కారం, ధనియాల పొడి, జీలకర్ర పొడి, ముందుగా సిద్ధం చేసుకున్న జీడిపప్పు పేస్ట్ వేసి అన్నీ కలిసేలా బాగా కలపండి. మంటను పూర్తిగా తగ్గించి, ముందుగా గిలకొట్టి పెట్టుకున్న పెరుగును కొద్దికొద్దిగా వేస్తూ కలపాలి.

-గ్రేవీ చక్కగా ఉడుకుతున్నప్పుడు అందులో ముందుగా వేయించి పెట్టుకున్న బంగాళాదుంపలు, తగినంత ఉప్పు, గ్రేవీకి తగినట్లుగా కొద్దిగా నీరు, చేతితో నలిపిన కసూరి మేథి వేసి నెమ్మదిగా కలపండి. పాన్‌పై మూతపెట్టి తక్కువ మంట మీద సుమారు 10 నుండి 15 నిమిషాల పాటు ఉడికించండి.

-చివరగా కూర చక్కగా ఉడికిన తర్వాత గరం మసాలా చల్లి, ఫ్రెష్ క్రీమ్, సన్నగా తరిగిన పచ్చని కొత్తిమీరతో అందంగా అలంకరించండి. అంతే రుచికరమైన, కంటికి ఇంపుగా కనిపించే హోలీ స్పెషల్ దమ్ ఆలూ రెడీ.