అడవి బిడ్డల అద్భుత వంటకం..జార్ఖండ్ స్టైల్ సీతాఫలం చట్నీ ఎలా చేయాలంటే..

జార్ఖండ్ రాష్ట్రం ప్రకృతి అందాలకు, అటవీ సంపదకు ఎంత ప్రసిందో, అక్కడి ఆహారపు అలవాట్లు కూడా అంతే ప్రత్యేకమైనవి. అక్కడి గిరిజన సంప్రదాయ వంటకాలు చాలా వరకు అడవిలో లభించే తాజా పండ్లు, కూరగాయలు, ఆకుకూరల మీద ఆధారపడి ఉంటాయి. అందులో ఒక ప్రత్యేకమైన, రుచికరమైన వంటకం సీతాఫల్ చట్నీ.

మనం సాధారణంగా సీతాఫలాన్ని పండులా మాత్రమే తింటాము, కానీ జార్ఖండ్‌ లో దీనిని అన్నం లేదా రోటీలతో తినేలా కమ్మని పచ్చడిలా కూడా చేస్తారు. సీతాఫలం సహజంగానే తీపిగా ఉంటుంది. దీనికి పచ్చిమిర్చి, ఆవనూనె, ఇతర సుగంధ ద్రవ్యాలు జోడించడం వల్ల వచ్చే తీపి, కారం, పులుపు కలగలిసిన రుచి అద్భుతంగా ఉంటుంది. జార్ఖండ్ స్టైల్ సీతాఫల్ చట్నీ మీ ఇంట్లోనే ఎలా చేపుకోవాలో ఇక్కడ చూడండి.

కావలసిన పదార్థాలు
దోరగా పండిన సీతాఫలాలు: 2-3
పచ్చిమిర్చి: 2-3
వెల్లుల్లి రెబ్బలు: 4-5
కొత్తిమీర: ఒక చిన్న కట్ట
పుదీనా: గుప్పెడు
ఆవనూనె: 1 టీస్పూన్
నిమ్మరసం: 1 టీస్పూన్
నల్ల ఉప్పు: రుచికి సరిపడా
సాధారణ ఉప్పు: చిటికెడు
వేయించిన జీలకర్ర పొడి: అర టీస్పూన్

తయారీ విధానం

ముందుగా సీతాఫలాలను బాగా కడిగి, రెండు ముక్కలుగా చేయాలి. ఒక స్పూన్ సహాయంతో లోపలి గుజ్జును గింజలతో సహా ఒక గిన్నెలోకి తీసుకోవాలి.

ఇప్పుడు చేతులతో గానీ లేదా బ్లెండర్లో చాలా తక్కువ స్పీడ్ మీద ఒక్కసారి తిప్పి గానీ గింజలను గుజ్జు నుండి వేరు చేయాలి. గుజ్జు ముద్దగా కాకుండా కొంచెం పలుకులుగా ఉంటే చట్నీ రుచి బాగుంటుంది. గింజలు పూర్తిగా తీసేయాలి.

ఇప్పుడు రోలు లేదా మిక్సీ గిన్నెలో పచ్చిమిర్చి, వెల్లుల్లి, కొత్తిమీర, పుదీనా ఆకులను వేసి కచ్చాపచ్చాగా దంచుకోవాలి. మరీ పేస్ట్‌ లా చేయకూడదు. ఈ మిశ్రమం చట్నీకి మంచి రంగును, ఘాటును ఇస్తుంది.

ఇప్పుడు ఒక వెడల్పాటి గిన్నెలో గింజలు తీసిన సీతాఫలం గుజ్జును తీసుకోండి. దీనికి ముందుగా సిద్ధం చేసుకున్న పచ్చిమిర్చి-వెల్లుల్లి మిశ్రమాన్ని కలపండి.

ఇప్పుడు ఆ మిశ్రమంలో నల్ల ఉప్పు, సాధారణ ఉప్పు, వేయించిన జీలకర్ర పొడి వేయండి.

చివరగా జార్ఖండ్ టచ్ కోసం ఒక టీస్పూన్ పచ్చి ఆవనూనె, నిమ్మరసం వేసి బాగా కలపండి. ఆవనూనె వాడటం ఇష్టం లేనివారు నువ్వుల నూనె వాడవచ్చు, కానీ అసలైన రుచి ఆవనూనెతోనే వస్తుంది. అంతే సీతాఫల్ చట్నీ రెడీ.

ఈ చట్నీని వేడి వేడి అన్నం, జొన్న రొట్టెలు లేదా చపాతీలతో సైడ్ డిష్‌ గా వడ్డించవచ్చు.