శీతాకాలంలో చర్మం మెరవాలా? రోజూ ఒక గ్లాసు ఈ జ్యూస్ తాగండి..ఎలా చేసుకోవాలంటే

శీతాకాలం వచ్చిందంటే చాలు, మార్కెట్లో పచ్చని ఆకుకూరలు కనువిందు చేస్తాయి. అందులోనూ పాలకూర ఈ సీజన్‌ లో విరివిగా లభిస్తుంది. సాధారణంగా మన ఇళ్లలో పాలకూరను పప్పు లేదా వేపుడు రూపంలో తీసుకుంటాం. కానీ పాలకూరలోని పోషకాలను శరీరం వందశాతం గ్రహించాలంటే, దానిని జ్యూస్ రూపంలో తీసుకోవడమే ఉత్తమ మార్గమని ఆరోగ్య నిపుణులు సూచిస్తున్నారు.

ప్రతిరోజూ ఉదయం ఒక గ్లాసు పాలకూర రసం తాగడం వల్ల శరీరంలోని మలినాలు తొలగిపోవడమే కాకుండా, ముఖం కాంతివంతంగా మారుతుందని నిపుణులు చెబుతున్నారు. కేవలం ఆరోగ్యం కోసమే కాకుండా, రుచిగా కూడా ఉండేలా ఈ జ్యూస్‌ను ఎలా తయారు చేసుకోవాలో ఇక్కడ చూడండి.

పాలకూర జ్యూస్ తయారీకి కావలసిన పదార్థాలు
-తాజా పాలకూర ఆకులు
-పుదీనా ఆకులు
-దోసకాయ ముక్కలు
-నిమ్మరసం
-ఉప్పు
-వేయించిన జీలకర్ర పొడి
-నీరు

తయారీ విధానం

-ముందుగా పాలకూర, పుదీనా ఆకులను శుభ్రంగా కడగాలి.

-స్టవ్ మీద నీటిని మరిగించి అందులో పాలకూర ఆకులను వేసి 5-6 నిమిషాల పాటు ఉడికించాలి.

-ఇప్పుడు ఉడికించిన పాలకూర, పుదీనా, దోసకాయ ముక్కలను మిక్సీ జార్‌ లో వేసి మెత్తగా గ్రైండ్ చేసుకోవాలి. అవసరమైతే కొద్దిగా నీరు కలపొచ్చు. పాలకూర జ్యూస్ రెడీ.

-తయారైన రసాన్ని గ్లాసులోకి తీసుకుని దానికి నిమ్మరసం, ఉప్పు, జీలకర్ర పొడి కలిపి వెంటనే తాగేయాలి.

ఇది తప్పక తెలుసుకోండి
పాలకూర ఆరోగ్యానికి మంచిదే అయినప్పటికీ దానిని తీసుకునే విధానం చాలా ముఖ్యం. పాలకూరను ఎప్పుడూ పచ్చిగా జ్యూస్ చేసి తాగకూడదు. పచ్చి పాలకూరలో ఆక్సలేట్లు అధికంగా ఉంటాయి. ఇవి శరీరంలో ఇతర పోషకాల శోషణకు ఆటంకం కలిగిస్తాయి, కిడ్నీలో రాళ్లు ఏర్పడే ప్రమాదాన్ని పెంచుతాయి. అందుకే జ్యూస్ చేయడానికి ముందు పాలకూరను వేడినీటిలో 5-6 నిమిషాలు ఉడికించడం లేదా బ్లాంచ్ చేయడం వల్ల ఆక్సలేట్ల ప్రభావం తగ్గుతుంది. ఇది సురక్షితమైన పద్ధతి.

ప్రయోజనాలు

-పాలకూరలోని శక్తివంతమైన యాంటీఆక్సిడెంట్లు రక్తాన్ని శుద్ధి చేస్తాయి. ఇది శరీరాన్ని నిర్విషీకరణ చేయడమే కాకుండా, మొటిమలను తగ్గించి చర్మానికి సహజమైన మెరుపును అందిస్తుంది.

-ఈ జ్యూస్‌ లో కేలరీలు తక్కువగా ఉండి, ఫైబర్ ఎక్కువగా ఉంటుంది. ఇది జీర్ణక్రియను మెరుగుపరచి, మలబద్ధకం వంటి సమస్యలను దూరం చేస్తుంది. బరువు తగ్గాలనుకునే వారికి ఇది బెస్ట్ ఆప్షన్.

-విటమిన్ సి పుష్కలంగా ఉండే పాలకూర, సీజనల్ వ్యాధుల నుండి మనల్ని రక్షించి, రోగనిరోధక వ్యవస్థను బలోపేతం చేస్తుంది.

-ఇందులోని విటమిన్ ఏ కంటి ఆరోగ్యానికి ఎంతో మేలు చేస్తుంది. రేచీకటి వంటి సమస్యలను దరిచేరనివ్వదు.