కొవ్వు తక్కువ,ఆరోగ్యం ఎక్కువ..శక్తినిచ్చే మఖానా చాట్ ఎలా చేసుకోవాలంటే..

మఖానా అనేది భారతదేశంలో ప్రసిద్ధి చెందిన ఒక చిరుతిండి. ఇది ఆరోగ్యకరమైనది, తేలికైనది, శక్తినిచ్చేది. మఖానాను ఉపయోగించి తయారుచేసే మఖానా చాట్ ఒక రుచికరమైన, క్రంచీ, ఆరోగ్యకరమైన స్నాక్. మఖానా ఎన్నో ఆరోగ్య ప్రయోజనాలను కలిగి ఉన్న శక్తివంతమైన ఆహారం. మఖానాలో కొవ్వు, కేలరీలు చాలా తక్కువగా ఉంటాయి, కానీ పోషకాలు సమృద్ధిగా ఉంటాయి. బరువు తగ్గాలనుకునే వారికి ఇది ఒక ఆదర్శవంతమైన స్నాక్. మఖానా చాట్ ని చాలా సులభంగా ఎలా తయారుచేసుకోవచ్చో ఇక్కడ చూడండి.

మఖానా చాట్ తయారీకి కావాల్సిన పదార్థాలు

-మఖానా
-నెయ్యి
-ఉప్పు
-కారం
-పసుపు
-ఆమ్చూర్ పొడి
-జీలకర్ర పొడి
-పసుపు
-చాట్ మసాలా
-పల్లీలు
-పచ్చిమిరపకాయ
-ఉల్లిపాయ
-టమాటో
-కొత్తిమీర

మఖానా చాట్ తయారీ విధానం

-ముందుగా స్టవ్ మీద పాన్ పెట్టి అందులో 2 కప్పుల మఖానా వేయండి. క్రిస్పీగా అయ్యేవరకు మఖానా వేయించి పక్కకు తీసి పెట్టుకోండి.

-ఇప్పుడు అదే పాన్ లో 1 టేబుల్ స్పూన్ నెయ్యి వేసి వేడి చెయ్యాలి. నెయ్యి వేడెక్కాక అందులో అర టేబుల్ స్పూన్ ఎర్ర కారం పొడి, పావు టీస్పూన్ పసుపు, పావు టీస్పూన్ జీలకర్ర పొడి, ఆమ్చూర్ పొడి పావు టీస్పూన్, రుచికి సరిపడా ఉప్పు వేసి అన్నింటిని బాగా కలపాలి.

-ఇప్పుడు అందులో వేయించిన మఖానా వేసి బాగా కలుపుకోవాలి. మఖానాకి అన్నీ బాగా పట్టేలా కలుపుకొని స్టవ్ ఆపేసి మఖానా మొత్తాన్ని ఓ గిన్నెలోకి తీసుకోండి.

-ఇప్పుడు ఓ బౌల్ లో అరకప్పు సన్నని ఉల్లి తరుగు, 1 టమాటో తరుగు, సన్నగా తరిగిన కొత్తిమీర, 1 పచ్చిమిరపకాయ సన్నని తరుగు, పావు టీస్పూన్ కారం, రుచికి సరిపడా ఉప్పు వేసి మొత్తం బాగా కలుపుకోవాలి.

-ఇప్పుడు ఉల్లిపాయ,టమాటో ముక్కలు కలిపిన మిశ్రమంలో పక్కన ఉంచుకున్న మఖానా, వేయించిన పల్లీలు, అర టేబుల్ స్పూన్ చాట్ మసాలా వేసి స్పూన్ తో మొత్తాన్ని బాగా కలుపుకోవాలి. అంతే టేస్టీ, హెల్తీ మఖానా చాట్ రెడీ.

ప్రధాన ఆరోగ్య ప్రయోజనాలు
బరువు తగ్గడానికి సహాయం : మఖానాలో ఫైబర్ అధికంగా ఉండటం వలన ఎక్కువ సేపు కడుపు నిండుగా ఉన్న అనుభూతిని ఇస్తుంది. తక్కువ కేలరీలు మరియు కొవ్వు కారణంగా, ఇది అనవసరమైన కేలరీలు లేకుండా ఆకలిని తీర్చడానికి సహాయపడుతుంది.

గుండె ఆరోగ్యం: ఇందులో తక్కువ సోడియం, మెగ్నీషియం అధికంగా ఉండటం వల్ల, ఇది అధిక రక్తపోటు ఉన్నవారికి మంచిది. మెగ్నీషియం రక్తనాళాలను ఆరోగ్యంగా ఉంచడంలో సహాయపడుతుంది.

జీర్ణక్రియ మెరుగుదల: అధిక ఫైబర్ కంటెంట్ జీర్ణక్రియను సులభతరం చేస్తుంది, ప్రేగు కదలికలను క్రమబద్ధీకరించడంలో సహాయపడుతుంది.

ఎముకల బలం (Bone Strength): మఖానాలో కాల్షియం, ఇతర ఖనిజాలు ఉన్నందున, ఇది ఎముకలను దృఢంగా ఉంచడంలో, ఆర్థరైటిస్ వంటి సమస్యలను నివారించడంలో కొంతవరకు సహాయపడుతుంది.