టమాటో ఆమ్లెట్ ఇలా చేశారంటే..మళ్లీ మళ్లీ కావాలనడం ఖాయం!

ఉల్లిపాయలు, మిరపకాయలతో వేసే అదే రొటీన్ ఆమ్లెట్ తిని బోర్ కొట్టిందా? అయితే కొత్తగా స్టఫ్డ్ టమాటా ఆమ్లెట్ ప్రయత్నించాల్సిందే. ఇది కేవలం రుచిలో మాత్రమే కాదు, చూడ్డానికి కూడా ఎంతో ఆకర్షణీయంగా ఉంటుంది.

పండిన ఎర్రటి టమోటాల లోపల గుడ్డు మిశ్రమాన్ని నింపి చేసే ఈ వంటకం మీ బ్రేక్ ఫాస్ట్ కి ఒక కొత్త కళను తీసుకువస్తుంది. ఇది కేవలం రుచికరమైనది మాత్రమే కాదు, ఆరోగ్యానికి కూడా ఎంతో మేలు చేస్తుంది. గుడ్డు నుండి లభించే ప్రోటీన్‌తో పాటు, టమోటాల నుండి లభించే లైకోపీన్, విటమిన్ సి పుష్కలంగా ఉంటాయి. దీనిని ఆవిరిలో ఉడికించడం వల్ల చాలా తక్కువ నూనెతో ఆరోగ్యకరంగా తయారు చేసుకోవచ్చు.

టమాటో ఆమ్లెట్ తయారీకి కావలసిన పదార్థాలు
పెద్ద సైజు టమోటాలు - 2
గుడ్డు - 2
ఉల్లిపాయ - సగం
క్యాప్సికమ్ - సగం
పచ్చిమిర్చి - 2
మిరియాల పొడి లేదా కారం - అర చెంచా
కొత్తిమీర - ఒక చెంచా
ఉప్పు - రుచికి తగినట్లుగా
నూనె లేదా వెన్న - రెండు చెంచాలు

తయారీ విధానం

-ముందుగా పెద్దగా, గట్టిగా ఉన్న టమోటాలను శుభ్రంగా కడగాలి.

-టమోటా పైభాగం కత్తిరించి, ఆ ముక్కను మూతలాగా పక్కన పెట్టండి.

-ఇప్పుడు ఒక చెంచా సహాయంతో టమోటా లోపల ఉన్న గుజ్జును, విత్తనాలను జాగ్రత్తగా బయటకు తీసి ఒక గిన్నెలో వేయండి. ఇప్పుడు టమోటా లోపల ఖాళీగా ఉండి ఒక కప్పు లాగా తయారవుతుంది.

-మనం పక్కన పెట్టిన టమోటా గుజ్జు గిన్నెలోనే గుడ్డును పగలగొట్టి పోయాలి. అందులో సన్నగా తరిగిన ఉల్లిపాయ, క్యాప్సికమ్, పచ్చిమిర్చి, కొత్తిమీర, మిరియాల పొడి, రుచికి సరిపడా ఉప్పు వేయాలి. ఈ మిశ్రమాన్ని నురగ వచ్చేలా బాగా గిలకొట్టాలి.

-ఇప్పుడు ఈ గుడ్డు మిశ్రమాన్ని ఖాళీగా చేసిన టమోటా కప్పుల్లో చెంచాతో జాగ్రత్తగా పోయాలి. మరీ నిండుగా కాకుండా కొంచెం వెలితిగా ఉంచండి, ఉడికేటప్పుడు పొంగుతుంది. ముందుగా కట్ చేసి పెట్టుకున్న టమోటా పైభాగం ముక్కను దీనిపై మూతలాగా పెట్టండి.

-స్టవ్ వెలిగించి ఒక పాన్ లేదా వోక్ పెట్టుకుని అందులో నూనె లేదా వెన్న వేసి వేడి చేయండి. స్టఫ్ చేసిన టమోటాలను జాగ్రత్తగా పాన్ మీద ఉంచండి. మంటను సిమ్ లో ఉంచి, పాన్ పై మూత పెట్టండి. ఇది ఆవిరిపై నెమ్మదిగా ఉడకాలి.

-టమోటా లోపల ఉన్న గుడ్డు మిశ్రమం ఉడికిన తర్వాత (సుమారు 5-7 నిమిషాలు), టమోటాలను చాలా జాగ్రత్తగా రెండో వైపుకు తిప్పండి. టమోటా మెత్తగా అయ్యి, లోపల ఆమ్లెట్ గట్టిపడే వరకు అన్ని వైపులా కాల్చండి.

-చివరగా, స్టవ్ ఆఫ్ చేసి టమోటాలను ప్లేట్‌ లోకి తీసుకోండి. దీనిని మధ్యలోకి నిలువుగా కట్ చేస్తే.. బయట ఎర్రటి టమాటా, లోపల రుచికరమైన ఆమ్లెట్ పొరలు అందంగా కనిపిస్తాయి.

-పైన కొత్తిమీర చల్లుకుని, టమాటా కెచప్ లేదా పుదీనా చట్నీతో వేడివేడిగా సర్వ్ చేయండి.