కండరాలకు బలాన్నిచ్చే నేచురల్ ప్రోటీన్ పౌడర్..ఇంట్లోనే చేసుకోండిలా..

ఈ ఉరుకుల పరుగుల ఆధునిక జీవితంలో కూడా చాలామంది తమ ఆరోగ్యం, ఫిట్‌ నెస్ పట్ల ఎంతో శ్రద్ధ వహిస్తున్నారు. జిమ్‌ లో చెమటోడ్చే వారైనా, యోగా చేసే వారైనా లేదా ఆరోగ్యంగా బరువు తగ్గాలని ప్రయత్నిస్తున్న వారైనా.. అందరి దృష్టీ ఇప్పుడు ప్రోటీన్ పైనే ఉంది. మన శరీర నిర్మాణానికి, కండరాల బలానికి ప్రోటీన్ ఎంత కీలకమో ప్రత్యేకంగా చెప్పనవసరం లేదు.

అయితే, ఈ ప్రోటీన్ అవసరాలను తీర్చుకునేందుకు చాలామంది మార్కెట్లో దొరికే రంగు రంగుల డబ్బాల్లోని ప్రోటీన్ సప్లిమెంట్లను ఆశ్రయిస్తున్నారు. కానీ మన వంటగదిలోని పోషకాలతో ఇంట్లోనే అద్భుతమైన ప్రోటీన్ పౌడర్‌ ను సులభంగా తయారు చేసుకోవచ్చు. ఈ పౌడర్ ఆరోగ్యానికి మేలు చేయడమే కాకుండా, చాలా పొదుపుగా కూడా ఉంటుంది. మీ శరీరానికి కావలసిన సంపూర్ణ పోషకాలను ఇది అందిస్తుంది.

ప్రోటీన్ పౌడర్‌ తయారీకి కావలసిన పదార్థాలు

వేయించిన శనగలు (పుట్నాలు) - 1 కప్పు
బాదంపప్పులు - 1 కప్పు
వేయించిన వేరుశెనగలు (పల్లీలు) - 1 కప్పు
ఓట్స్ - అర కప్పు
అవిసె గింజలు - పావు కప్పు
గుమ్మడికాయ గింజలు - పావు కప్పు
యాలకుల పొడి - 2 టీస్పూన్లు

ప్రోటీన్ పౌడర్‌ తయారీ విధానం

-ముందుగా స్టవ్ వెలిగించి ఒక మందపాటి పాన్ పెట్టుకోండి. అందులో బాదం, ఓట్స్, అవిసె గింజలు, గుమ్మడి గింజలను విడివిడిగా, సన్నని మంటపై దోరగా వేయించుకోవాలి. (పల్లీలు, శనగలు పచ్చివి అయితే వాటిని కూడా వేయించుకోవాలి).

-వేయించుకున్న వాటన్నింటినీ ఒక ప్లేట్‌ లోకి తీసుకుని పూర్తిగా చల్లారనివ్వాలి. ఏమాత్రం వేడి ఉన్నా పౌడర్ ముద్దగా మారిపోతుంది. గింజలన్నీ బాగా చల్లారిన తర్వాత, వాటిని మిక్సీ జార్‌ లో వేసి మెత్తటి పౌడర్‌ లా గ్రైండ్ చేసుకోవాలి. చివరగా అందులో యాలకుల పొడిని వేసి బాగా కలుపుకోవాలి.

అంతే ఎంతో శక్తివంతమైన పౌడర్ రెడీ. దీనిని గాలి చొరబడని డబ్బాలో భద్రపరుచుకుంటే చాలా రోజుల పాటు నిల్వ ఉంటుంది.

ఈ హోమ్‌ మేడ్ ప్రోటీన్ పౌడర్ వల్ల ప్రయోజనాలు

-మీరు వ్యాయామం చేసినప్పుడు, కండరాల కణజాలాలకు చిన్నపాటి ఒత్తిడి, నష్టం కలుగుతాయి. ఈ ప్రోటీన్ పౌడర్ ఆ కణజాలాలను త్వరగా నయం చేసి, కండరాల పరిమాణాన్ని, బలాన్ని పెంచడంలో అద్భుతంగా సహాయపడుతుంది.

-ప్రోటీన్‌ ను మన శరీరం జీర్ణం చేసుకోవడానికి ఎక్కువ సమయం పడుతుంది. దీనివల్ల పదేపదే ఆకలి వేయదు, ఎక్కువసేపు కడుపు నిండిన భావన ఉంటుంది. ఇది మీరు అనవసరమైన చిరుతిళ్లు తినకుండా ఆపి, సులభంగా బరువు తగ్గడానికి ఉపకరిస్తుంది.

-రోజూ ఒక గ్లాసు పాలలో ఈ పౌడర్‌ ను కలుపుకుని తాగడం వల్ల కండరాల నొప్పులు తగ్గి, శరీరానికి విశ్రాంతి, తక్షణ శక్తి అందుతాయి.