హోటల్ స్టైల్ రాయల్ కొబ్బరి చట్నీ.. ఈ ఒక్క సీక్రెట్ పదార్థం కలిపితే రుచి అదుర్స్!

ఉదయాన్నే వేడి వేడి ఇడ్లీలు లేదా క్రిస్పీ దోశలు తింటున్నప్పుడు.. దానికి సరైన జోడీ పక్కనే ఉంటే ఆ అల్పాహారం రుచే మారిపోతుంది. మనం ఇంట్లో ఎన్ని రకాల స్నాక్స్, టిఫిన్స్ చేసినా.. హోటళ్లలో వడ్డించే ఆ తెల్లటి, మృదువైన, కమ్మటి కొబ్బరి చట్నీ రుచిని ఎవరూ మర్చిపోలేరు. హోటల్ వాళ్లు తమ చట్నీని అంత అద్భుతంగా చేయడానికి వాడే ఆ రహస్య పదార్థం ఏంటో అందరికీ ఆసక్తిగానే ఉంటుంది.

సాధారణంగా మనం ఇంట్లో కొబ్బరి, పచ్చిమిర్చి, పుట్నాల పప్పు (వేపిన శనగపప్పు) వేసి చట్నీ చేస్తుంటాం. కానీ, అది హోటల్ చట్నీలా తెల్లగా రాదు, ఆ కమ్మని రుచీ రాదు. దీనికి కారణం హోటల్ నిర్వాహకులు వాడే ఒక రహస్య పదార్థం.. అదే జీడిపప్పు. పుట్నాల పప్పును కాస్త తగ్గించి, కొన్ని జీడిపప్పులను జోడించడం వల్ల చట్నీకి ఆ రాయల్ లుక్, కమ్మటి రుచి వస్తాయి.

హోటల్ స్టైల్ రాయల్ కొబ్బరి చట్నీ తయారీకి కావలసిన పదార్థాలు

తాజాగా తురిమిన కొబ్బరి - అర కప్పు
పుట్నాల పప్పు (వేపిన శనగపప్పు) - 1 టేబుల్ స్పూన్
జీడిపప్పు - 6
పచ్చిమిర్చి - కారానికి తగినట్లుగా (2-3)
చింతపండు - ఒక చిన్న రెబ్బ
ఉప్పు - రుచికి సరిపడా
నీళ్లు - తగినంత
పోపు కోసం: నూనె, ఆవాలు (అర టీస్పూన్), కరివేపాకు (రెండు రెమ్మలు)

హోటల్ స్టైల్ రాయల్ కొబ్బరి చట్నీ తయారీ విధానం

-ముందుగా ఒక శుభ్రమైన మిక్సీ జార్ తీసుకోండి. అందులో తాజాగా తురిమిన కొబ్బరి, పుట్నాల పప్పు, జీడిపప్పులు, చిన్న చింతపండు రెబ్బ, పచ్చిమిర్చి మరియు రుచికి సరిపడా ఉప్పు వేయండి.

-ఇక్కడే మీరు ఒక చిన్న ట్రిక్ ఫాలో అవ్వాలి. మొదట్లోనే నీళ్లు పోయకూడదు. ముందుగా ఈ పదార్థాలన్నింటినీ నీళ్లు లేకుండా పొడిపొడిగా మిక్సీ పట్టుకోవాలి. ఇలా చేయడం వల్ల అన్నీ సమానంగా నలిగి, చట్నీ ఎంతో మృదువుగా వస్తుంది.

-ఆ తర్వాత, కొద్దికొద్దిగా నీళ్లు కలుపుతూ మెత్తని పేస్ట్‌లా రుబ్బుకోవాలి. హోటల్ స్టైల్ చట్నీ మరీ నీళ్లలా కాకుండా, కాస్త చిక్కగా ఉంటేనే ఆ రుచి వస్తుంది. కాబట్టి నీళ్లను చూసుకుంటూ పోయండి.

-చట్నీ రెడీ అయ్యాక, ఒక చిన్న కడాయిలో నూనె వేడి చేసి ఆవాలు, కరివేపాకు వేసి పోపు పెట్టండి. ఆవాలు చిటపటలాడాక, ఈ పోపును చట్నీలో వేసి బాగా కలపండి. అంతే.. మీ నోరూరించే 'రాయల్' కొబ్బరి చట్నీ రెడీ.

-మీ చట్నీ అచ్చం హోటల్ చట్నీలా మల్లెపూవులా తెల్లగా రావాలంటే, పచ్చిమిర్చిని మధ్యలోకి కోసి లోపల ఉన్న గింజలను తీసేసి వాడండి. అలాగే జీడిపప్పు వాడటం వల్ల చట్నీకి చాలా క్రీమీ టెక్స్చర్ వస్తుంది. ఇందులో వేసే చిన్న చింతపండు ముక్క చట్నీకి అద్భుతమైన తీపి-పులుపు రుచిని అందిస్తుంది.