Chikkudukaya pachadi: చిక్కుడుకాయ నిల్వ పచ్చడి..ఇలా చేస్తే ఆవకాయని మైమరిపించే టేస్ట్

చిక్కుడుకాయలతో చేసే కూరలు చాలా టేస్టీగా ఉంటాయన్న విషయం మనకు తెలిసిందే. అయితే చిక్కుడుకాయతో చేసే నిల్వ పచ్చడి ఎప్పుడైనా తిన్నారా? లేదు అంటే ఓ సారి ఖచ్చితంగా టేస్ట్ చేసి తీరాల్సిందే. ప‌చ్చ‌డి చేసుకోవ‌డానికి వీలుగా ఉండే కూర‌గాయ‌ల్లో చిక్కుడుకాయ‌లు కూడా ఒక‌టి. చిక్కుడుకాయ‌ల‌తో నిల్వ ప‌చ్చ‌డిని త‌యారు చేయ‌డం చాలా సుల‌భం.

స‌రిగ్గా చేయాలే కానీ ఈ ప‌చ్చ‌డి ఆవకాయ కంటే చాలా రుచిగా ఉంటుంది. చిక్కుడుకాయ‌ల‌తో నిల్వ ప‌చ్చ‌డిని ఎలా త‌యారు చేసుకోవాలో,దీని తయారీకి కావాల్సిన పదార్థాలు ఏవో ఇప్పుడు చూద్దాం.

చిక్కుడుకాయ నిల్వ పచ్చడి తయారీకి కావాల్సిన పదార్థాలు
-మెంతులు
-ఆవాలు
-చిక్కుడుకాయ
-జీలకర్ర
-ఎండుమిర్చి
-కరివేపాకు
-చింతపండు
-ఆయిల్
-వెల్లుల్లి
-కారం
-ఉప్పు
-పసుపు
చిక్కుడుకాయ నిల్వ పచ్చడి తయారీవిధానం
-స్టవ్ మీద పాన్ పెట్టి అందులో 3 టేబుల్ స్పూన్ల ఆవాలు, 1 టేబుల్ స్పూన్ మెంతులు వేసి లో ప్లేమ్ మీద మంచి వాసన వచ్చేవరకు వేయించి తర్వాత వీటిని మిక్సీ గిన్నెలో వేసి మెత్తని పొడిలా గ్రైండ్ చేసుకోండి.

-తర్వాత శుభ్రంగా కడిగిన విత్తనాలు లావుగా ఉండే అరకేజీ చిక్కుడకాయలను పొడిగుడ్డతో తడి లేకుండా తుడిచి కొద్దిసేపు ఫ్యాన్ కింద ఆరబెట్టండి.

-ఇప్పుడు చిక్కుడుకాయల రెండువైపులా ఉండే నారను తీసేసి వాటిని ఓ బౌల్ లోకి తీసుకొని పక్కనపెట్టుకోండి.

-తర్వాత ఒక గిన్నెలో 125 గ్రాముల చింతపండు,1 కప్పు బాగా మరిగించిన నీళ్లను పోసి నానబెట్టుకోండి.

-ఇప్పుడు స్టవ్ మీద పాన్ పెట్టి 250 గ్రాముల నూనె పోసి అది కొంచెం వేడెక్కాక అందులో క్లీన్ చేసి పెట్టుకున్న చిక్కుడుకాయలను వేసి మీడియం ప్లేమ్ మీద వేయించండి. ముక్కలు 30 శాతం దాకా ఉడికితే చాలు వాటిని తీసి ఓ బౌల్ లో వేసి పక్కనపెట్టండి.

-ఇప్పుడు అదే పాన్ లో రెండు టీ స్పూన్ల ఆవాలు, 1 టీస్పూన్ జీలకర్ర, అర టీస్పూన్ మెంతులు,6 ఎండుమిర్చి, కొద్దిగా కరివేపాకు వేసి తాళింపును కొంచెం ఫ్రై చేసిన తర్వాత ఇందులో 40 గ్రాముల తొక్క తీసిన వెల్లుల్లి రెబ్బలు వేసి ఒక నిమిషం తర్వాత కొంచెం ఇంగువ వేసి స్టవ్ ఆఫ్ చేసి పక్కన పెట్టి చల్లారనివ్వండి.

-తాళింపు పూర్తిగా చల్లారిన తర్వాత దానిని ముందుగా ఫ్రై చేసి బౌల్ లో ఉంచిన చిక్కుడుకాయలలో వేసి కలపండి.

-తర్వాత స్టవ్ మీద పాన్ పెట్టి అందులో కొంచెం ఆయిల్ పోసి నానబెట్టిన చింతపండు గుజ్జు మొత్తం తీసి ఆయిల్ లో వేయండి. మంటను మీడియం ప్లేమ్ మీద పెట్టుకొని ఈ చింతపండు గుజ్జు నూనెలో బాగా వేగనివ్వండి. తర్వాత స్టవ్ ఆఫ్ చేసి పాన్ ని పక్కనపెట్టుకోండి.

-ఇప్పుడు ఓ పెద్ద గిన్నె తీసుకొని అందులో చిక్కుకాయముక్కలు తాళింపు మిశ్రమాన్ని,80 గ్రాముల కారం,రుచికి సరిపడా ఉప్పు,అర టీస్పూన్ పసుపు,ముందుగా గ్రైండ్ చేసె పెట్టుకున్న ఆవాలు మెంతుల పొడి వేసి బాగా కలపండి. ఈ పచ్చడిని 2 రోజుల పాటు స్టీల్ గిన్నెలోకానీ,జాడీలోగానీ పెట్టి ఊరనిస్తే చాలు అదిరిపోయే టేస్టీ చిక్కుడకాయ పచ్చడి రెడీ.