సాంబార్,పప్పుచారుకు బెస్ట్ కాంబినేషన్..కరకరలాడే కుర్ కురే బెండీ..ఎలా చేసుకోవాలంటే

బెండాకాయ తింటే లెక్కలు బాగా వస్తాయి..తెలివితేటలు పెరుగుతాయి అని పెద్దలు మన చిన్నప్పటి నుంచి చెబుతూనే ఉంటారు. అయినా కూడా చాలామందికి బెండకాయ అంటే చాలు అబ్బా వేరే కూర లేదా అంటుంటారు. బెండకాయతో పులుసు,ఫ్రై,పచ్చడి వంటి రకరకాల వెరైటీలు తయారుచేస్తుంటారు. అయితే మీరెప్పుడైనా కుర్ కురే బెండీ తిన్నారా? స్నాక్‌గా లేదా సైడ్ డిష్‌గా దీనిని ఆస్వాదించవచ్చు. సాయంత్రం వేళ టీతో పాటు స్నాక్‌ గా తినడానికీ, పప్పుచారు లేదా సాంబార్‌ తో తినడానికీ కుర్ కురే బెండీ మంచి ఛాయిస్. దీనిని తయారు చేయడం కూడా చాలా సులభం.

పేరులో ఉన్నట్టుగానే ఇది కుర్ కురేలా కరకరలాడుతూ, బెండకాయ రుచిని ఇస్తుంది. కుర్ కురే బెండీ ఇంట్లో తయారు చేసుకోవడం ద్వారా బయటి స్నాక్స్ కంటే శుభ్రంగా,ఆరోగ్యంగా ఉంటుంది. పిల్లల నుంచి పెద్దల వరకు అందరూ ఇష్టపడే ఈ వంటకాన్ని ఎలా తయారు చేయాలో ఇక్కడ చూడండి.

కుర్ కురే బెండీ తయారీకి కావాల్సిన పదార్థాలు

-బెండకాయలు: 250 గ్రాములు
-శనగ పిండి: 3 టేబుల్ స్పూన్లు
-జీలకర్ర పొడి: 1 టేబుల్ స్పూన్
-కారం: 1 టీ స్పూన్ (మీ రుచికి తగ్గట్టు)
-పసుపు: 1/4 టీ స్పూన్
-చాట్ మసాలా: 1 టీ స్పూన్
-ఉప్పు: తగినంత
-నిమ్మరసం: 1 టీ స్పూన్
-ఆవనూనె: 1 టేబుల్ స్పూన్
-నూనె: వేయించడానికి సరిపడా

తయారీ విధానం

-ముందుగా లేత బెండకాయలను శుభ్రంగా కడిగి, పొడి గుడ్డతో తుడవాలి. వాటికి అస్సలు తడి ఉండకూడదు..లేకపోతే బెండకాయలు జిగటగా మారతాయి.

-బెండకాయల చివరలను కట్ చేసి ఒక్కో బెండకాయను నిలువుగా నాలుగు భాగాలుగా చీల్చుకోవాలి. మధ్యలో ఉండే గింజలను తీసేయవచ్చు, అప్పుడు బెండకాయలు మరింత కరకరలాడతాయి.

-ఒక పెద్ద బౌల్‌ లో సన్నగా చీల్చుకున్న బెండకాయ ముక్కలను తీసుకోండి. అందులో శనగ పిండి, కారం, జీలకర్ర పొడి, పసుపు, చాట్ మసాలా, తగినంత ఉప్పు వేసి బాగా కలపాలి. ఇందులోనే 1 టేబుల్ స్పూన్ ఆవనూనె,అరచెక్క నిమ్మరసం కూడా వేసి బాగా కలుపుకోవాలి. నిమ్మరసం వేయడం వల్ల బెండకాయలు కరకరలాడడమే కాకుండా రుచి కూడా పెరుగుతుంది.

-ఇప్పుడు స్టవ్ మీద ఒక కడాయి పెట్టి ఒక కడాయిలో లేదా డీప్ ఫ్రైయింగ్ పాన్‌ లో నూనెను వేసి బాగా వేడి చేయాలి. నూనె మరీ పొగలు వచ్చేంత వేడిగా ఉండకూడదు, కానీ వేడిగా ఉండాలి.

-నూనె వేడయ్యాక కొద్దికొద్దిగా బెండకాయ ముక్కలను వేసి మీడియం మంటపై గోల్డెన్ బ్రౌన్ రంగు వచ్చేవరకు, కరకరలాడేంత వరకు వేయించాలి. ఒకేసారి అన్నింటినీ వేయకుండా రెండు లేదా మూడు వాయిలుగా వేయిస్తే బాగా వేగుతాయి.

-వేగిన బెండకాయ ముక్కలను టిష్యూ పేపర్‌పై తీసి అదనపు నూనెను పీల్చుకోవడానికి అనుమతించాలి. వేడి వేడిగా వడ్డిస్తే కుర్ కురే బెండీ రుచిని సంపూర్ణంగా ఆస్వాదించవచ్చు.

-కుర్ కురే బెండీ రుచిగా ఉన్నప్పటికీ ఇది డీప్ ఫ్రై చేసిన వంటకం కాబట్టి మితంగా తీసుకోవడం మంచిది. అధికంగా నూనెలో వేయించడం వల్ల కొన్ని పోషకాలు కోల్పోవచ్చు. అయితే బెండకాయలో ఉండే సహజమైన పోషకాలు మాత్రం శరీరానికి లభిస్తాయి.