బొంబాయి రవ్వతో ఇంట్లోనే హెల్తీ శాండ్‌విచ్‌.. బ్రేక్‌ఫాస్ట్‌, స్నాక్స్‌కి పర్ఫెక్ట్‌ ఛాయిస్‌.!

రెగ్యులర్‌ శాండ్‌విచ్‌ తిని బోర్‌ కొట్టేసిందా.. అయితే బొంబాయి రవ్వతో ఈ సారి కొత్తగా ట్రై చేయండి. సన్న రవ్వని తినడానికి ఇష్టపడని వారు సైతం ఆవురావుమంటూ లాగించేస్తారు. ముఖ్యంగా రెగ్యులర్‌ బ్రేక్‌ఫాస్ట్‌లు, స్నాక్స్‌లతో విసిగిపోయిన వారికి ఈ బొంబాయి రవ్వ శాండివిచ్‌ హెల్తీ ఆప్షన్‌ అనడంలో ఎలాంటి సందేహం లేదు.

బొంబాయి రవ్వ- ఒక కప్పు
పెరుగు- ఒక కప్పు
ఉప్పు- తగినంత
కారం- ఒక టీ స్పూన్‌
ఉల్లిపాయ- ఒకటి
టమాటా- ఒకటి
క్యాప్సికమ్‌- ఒకటి
టొమాటో కెచప్‌
వెన్న

తయారీ విధానం

-ముందుగా ఒక గిన్నె తీసుకుని అందులో బొంబాయి రవ్వ, పెరుగు వేసి బాగా కలపాలి. తర్వాత ఉప్పు, కారం ఉండలు లేకుండా కలియతిప్పాలి. ఇప్పుడు ఉల్లిపాయ, టమాటా, క్యాప్సికమ్‌ ముక్కలను వేసి మొత్తం మళ్లీ ఒకసారి కలుపుకోవాలి. ఇందులో కావాలనుకుంటే కొద్దిగా ఈనో, నీళ్లు కలుపుకోవచ్చు.

-ఇప్పుడు స్టవ్‌పై పెనం పెట్టుకుని వేడయ్యాక కొద్దిగా నూనె రాయాలి. బ్రెడ్‌ ముక్కలను తీసుకుని వాటిపై ఒకవైపు టొమాటో కెచప్‌ అప్లై చేసుకోవాలి. తయారుచేసుకున్న సూజీ మిశ్రమాన్ని దానిపైన సమంగా పరచాలి. అనంతరం పెనంపై వేడి చేసుకోవాలి. బ్రెడ్‌ ముక్కకి మరోవైపు వెన్న రాసి రెండువైపులా గోధుమరంగు వచ్చేవరకు కాల్చుకోవాలి. ఇలా అన్ని బ్రెడ్‌ ముక్కలకి ఇలాగే పేస్ట్‌ అప్లై చేసి కాల్చడమే.. అంతే పది నిమిషాల్లో రుచికరమైన సూజీ శాండ్‌విచ్‌ రెడీ..

-టిఫిన్‌ చేయడానికి టైం లేనప్పుడు ఈ సూజీ శాండ్‌విచ్‌ ఇన్‌స్టంట్‌ హెల్తీ టిఫిన్‌. ఇక సాయంత్రం స్నాక్స్‌ టైంలో లేదా ఇంటికి ఎవరైనా బంధువులు వచ్చినా.. హడావుడి లేకుండా అప్పటికప్పుడు చేసుకోవచ్చు. గ్రీన్‌ చట్నీ లేదా టొమాటో సాస్‌తో తింటే ఆ రుచి అదిరిపోతుంది.