High Protein Dosa: ప్రోటీన్ కావాలంటే ఇలాంటి దోశ తినాలి.. ఇంట్లోనే సింపుల్‌గా ఎలా చేసుకోవాలంటే?

దోశలు చాలా మందికి ఫెవరెట్. కొందరైతే ప్రతిరోజూ దోశలు తినమన్నా తింటారు. దోశలో ఉండే ఆ రుచి, ఆ క్రిస్పీనెస్‌కి చాలా మంది అభిమానులు అయిపోతుంటారు. అలానే దోశలో చాలా రకాల దోశలు కూడా ఉన్నాయి. అందులో ఒకటి పుష్కలంగా పోషకాలు ఇచ్చే హై ప్రోటీన్ దోశ. దీనిని తినడం వల్ల రుచితో పాటు ప్రోటీన్ పుష్కలంగా దొరుకుతుంది. వివిధ చిరుధాన్యాలు కలిపి చేసే ఈ దోశను చేసుకోవడం కూడా చాలా సులభం. ఈ దోశను ఎలా చేసుకోవాలి? దానికి కావాల్సిన పదార్థాలు ఏంటి? అనే అన్ని విషయాల గురించి మనం ఈ స్టోరీలో తెలుసుకుందాం రండి.

హై ప్రోటీన్ దోశ తయారీకి కావాల్సిన పదార్థాలు

1. రెండు కప్పుల రేషన్ బియ్యం
2. ఒక కప్పు రాగులు
3. ఒక కప్పు జొన్నలు
4. ఒక కప్పు మినపప్పు
5. ఒక కప్పు పెసలు
6. అర టీస్పూన్ మెంతులు
7. ఒక టీస్పూన్ జీలకర్ర
8. రుచికి సరిపడా ఉప్పు
9. కొంచెం నూనె

హై ప్రోటీన్ దోశ తయారీ విధానం

ముందుగా బియ్యం, రాగులు, జొన్నలు, మినపప్పు, పెసలు, మెంతులను బాగా కడుక్కోవాలి. అందులోని మురికి అంతా పోయే విధంగా బాగా శుభ్రంగా ఒక నాలుగు సార్లు కడుక్కోవాలి. ఇప్పుడు అందులోనే కొంచెం నీళ్లు పోసి సుమారు ఎనిమిది గంటల పాటు నానబెట్టుకోవాలి. ఎనిమిది గంటల వరకు నానిన తరువాత బియ్యం, జొన్నలు, రాగులు, మినపప్పు, పెసలు, మెంతులను.. ఒక మిక్సీలో వేసుకొని మెత్తగా రుబ్బుకోవాలి.

మెత్తగా రుబ్బుకున్న ఆ పిండిని ఓ గిన్నెలో తీసుకొని సుమారు ఆరు నుంచి ఎనిమిది గంటల పాటు పక్కన పులియనివ్వాలి. ఆరు నుంచి ఎనిమిది గంటల పాటు పిండి పులిసిన తరువాత.. అందులో రుచికి తగినంత ఉప్పు, అలాగే జీలకర్ర కూడా వేసుకొని బాగా మిక్స్ చేసుకోవాలి. ఆ పిండిని అలా పక్కన పెట్టేయాలి.

ఇప్పుడు స్టవ్ ఆన్ చేసి.. దోశ పెనం వేసుకోవాలి. పెనం వేడయ్యాక దానిపై నూనె పూసుకోవాలి. ఇప్పుడు ఆ పెనం వేడయ్యాకా.. మనం దోశలు వేసుకోవాలి. దోశ కాలుతున్నప్పుడు దోశ అంచుల వెంట, అలాగే దోశ మధ్యలో కొంచెం నూనె పూసుకొని.. గోల్డెన్ కలర్‌లో వచ్చేంత వరకు కాల్చుకోవాలి. కొందరికి దోశను రెండు వైపులా కాల్చడం ఇష్టం ఉంటుంది. అలాంటి వ్యక్తులు దోశను తిప్పి రెండు వైపులా కాల్చుకోవచ్చు. ఇప్పుడు ఆ దోశలను ఓ ప్లేట్‌లోకి తీసుకుంటే ఎంతో రుచికరమైన, ఆరోగ్యకరమైన హై ప్రోటీన్ దోశ సిద్ధమైనట్లే.

ఈ దోశను కొబ్బరి చట్నీ, అల్లం చట్నీ, సాంబార్‌తో కూడా తినొచ్చు. ఇది అమోఘమైన రుచితో పాటు అద్భుతమైన ఆరోగ్య ప్రయోజనాలను కూడా అందిస్తుంది. ప్రతిరోజూ ప్రోటీన్ తినాలనుకునే వ్యక్తులు ఈ దోశను తినొచ్చు.