వీకెండ్ స్పెషల్ గా ఇంట్లో ఇది చేస్తే..ఎగబడి తింటారు..ఎలా చేసుకోవాలంటే..

వడలు అంటే ఇష్టం లేని తెలుగువాళ్లు ఎవరుంటారు చెప్పండి. అయితే ఏదో గ్యాస్ట్రిక్ సమస్యలతో కొందరు వడలకు దూరంగా ఉంటారు కానీ వడలపై ఇష్టం మాత్రం తగ్గదు. అయితే శరీరానికి అనేక ఆరోగ్య ప్రయోజనాలను అందించే కొత్తిమీర వడ ఎప్పుడైనా తిన్నారా? ఇది రుచికరమైన, ఆరోగ్యకరమైన చిరుతిండి.

కొత్తిమీరలో విటమిన్లు A, C, K, ఇనుము, కాల్షియం, యాంటీఆక్సిడెంట్లు పుష్కలంగా ఉంటాయి. ఇవి శరీరాన్ని ఆరోగ్యంగా ఉంచడానికి సహాయపడతాయి. కొత్తిమీర జీర్ణక్రియను మెరుగుపరుస్తుంది, కడుపు ఉబ్బరాన్ని తగ్గిస్తుంది. అలాంటి కొత్తిమీరతో వడలు ఎలా చేయాలి,దీని తయారీకి ఏమేం పదార్థాలు కావాలో ఇక్కడ చూడండి.

కొత్తిమీర వడ తయారీకి కావలసిన పదార్థాలు

-కొత్తిమీర - 1 కట్ట
-శనగపిండి - 1 కప్పు
-బియ్యప్పిండి - 1/2 కప్పు
-ఉల్లిపాయ - 1 (సన్నగా తరిగిన)
-జీలకర్ర - 1/2 టీస్పూన్
-ధనియాల పొడి - 1/2 టీస్పూన్
-గరం మసాలా - 1/4 టీస్పూన్
-పచ్చిమిర్చి - 3 (సన్నగా తరిగిన)
-అల్లం - 1/2 అంగుళం (సన్నగా తరిగిన)
-ఉప్పు
-ఆయిల్

కొత్తిమర తయారీ విధానం

-కొత్తిమీరను శుభ్రంగా కడిగి సన్నగా తరుగుకోవాలి.

-ఒక గిన్నెలో బియ్యప్పిండి, శనగపిండి, ధనియాల పొడి, గరం మసాలా, పచ్చిమిర్చి, అల్లం, ఉల్లిపాయ, జీలకర్ర, ఉప్పు వేసి బాగా కలపాలి.

-తరిగిన కొత్తిమీరను పిండి మిశ్రమంలో వేసి బాగా కలపాలి. పిండిని మరీ పలుచగా చేయకూడదు కొంచెం గట్టిగా ఉండాలి.

-అందులోనే కొద్దిగా నీళ్లు పిండిని వడల పిండిలా కలుపుకోవాలి.

-ఇప్పుడు స్టవ్ మీద బాండీ పెట్టి ఆయిల్ వేడి చేసి పిండిని చిన్న చిన్న వడలుగా వేసి బంగారు రంగు వచ్చే వరకు వేయించాలి. మంటను మీడియం ఫ్లేమ్‌లో ఉంచాలి.

-వేడి వేడి కొత్తిమీర వడలు రెడీ.
.
-కొత్తిమీర వడను టొమాటో కెచప్ లేదా నచ్చిన చట్నీతో కలిపి తింటే అద్భుతంగా ఉంటుంది.