కమ్మని రుచి, అద్భుతమైన సువాసన..నోట్లో వేస్తే కరిగిపోయే రబ్రీ..ఎలా చేసుకోవాలంటే..

మన సంస్కృతిలో స్వీట్లకు ఒక ప్రత్యేకమైన స్థానం ఉంది. పండుగైనా, ఇంట్లో ఏదైనా చిన్న శుభకార్యమైనా స్వీట్ ఉండాల్సిందే. భోజనం పూర్తయిన తర్వాత కాస్తంత తీపి తినడానికి మనలో చాలామంది ఇష్టపడతారు. అలాగే మన ఇంటికి ఎవరైనా బంధువులు లేదా స్నేహితులు వస్తే స్వీట్స్ తీసుకురావడం, భోజనం తర్వాత స్వీట్ వడ్డించడం ఒక అందమైన సంప్రదాయం.

అయితే, అనుకోకుండా ఇంటికి అతిథులు వచ్చినప్పుడు ఇంట్లో ఎలాంటి స్వీట్లు లేకపోతే కంగారు పడాల్సిన అవసరం లేదు. మీ ఇంట్లో పాలు ఉంటే చాలు, ఎంతో రుచికరమైన రబ్రీని చిటికెలో తయారు చేయవచ్చు. ఇంట్లో పాలు మిగిలిపోయినప్పుడు ఆ పాలను ఉపయోగించి కూడా కమ్మని రబ్రీని తయారు చేసుకోవచ్చు. ఇది చేయడం చాలా సులభం, పైగా దీని రుచి అద్భుతంగా ఉంటుంది. ఒక్కసారి మీరు ఇంట్లో చేసిన రబ్రీని రుచి చూశారంటే, మీ వేళ్లు మీరే నాకాల్సిందే. రబ్రీ ఎలా తయారుచేసుకోవాలో ఇక్కడ చూడండి.

తయారీకి కావాల్సిన పదార్థాలు
-పాలు
-పంచదార
-డ్రై ఫ్రూట్స్(బాదం,జీడిపప్పు, పిస్తా)
-యాలకల పొడి
-కుంకుమ పువ్వు

రబ్రీ తయారీ విధానం

-ముందుగా మందపాటి అడుగు ఉన్న ఒక పెద్ద పాన్ లేదా కడాయిని తీసుకోవాలి. అందులో మీకు కావలసిన పరిమాణంలో పాలను పోసి వేడి చేయండి. స్టవ్ మంటను మీడియంలో ఉంచి పాలు అడుగున మాడిపోకుండా గరిటెతో కింద నుండి నెమ్మదిగా కలుపుతూ ఉండాలి.

-పాలు మరుగుతున్నప్పుడు పైన మీగడ కడుతుంది కదా, ఆ మీగడను కడాయి అంచులకు రాస్తూ ఉండాలి. రబ్రీకి అసలైన రుచి, చిక్కదనం వచ్చేది ఈ మీగడ వల్లే.

-పాలు బాగా మరిగి చిక్కటి రబ్రీలా మారుతున్నప్పుడు స్టవ్ మంటను పూర్తిగా తగ్గించాలి. ఇప్పుడు మీ రుచికి తగినట్లుగా అందులో పంచదార వేసి, మంచి సువాసన కోసం కొద్దిగా యాలకుల పొడిని కూడా కలపాలి.

-మీకు డ్రై ఫ్రూట్స్ రుచి ఇష్టమైతే, బాదం, జీడిపప్పు, పిస్తా వంటి వాటిని సన్నగా తరిగి ఈ రబ్రీపై చల్లుకోవచ్చు. ఇవి రబ్రీకి మంచి క్రంచీ రుచిని ఇస్తాయి.

-రబ్రీ చూడటానికి లేత పసుపు రంగులో ఆకర్షణీయంగా కనిపించాలంటే, పాలు మరుగుతున్నప్పుడే అందులో చిటికెడు కుంకుమపువ్వు వేయాలి. ఇలా తయారు చేసిన రబ్రీ.. మార్కెట్లో కొనే స్వీట్ కంటే ఎన్నో రెట్లు రుచిగా ఉంటుంది.

-తయారైన రబ్రీని మట్టి కుండలు లేదా చిన్న మట్టి గిన్నెలలో పోసి చల్లార్చాలి. చల్లటి రబ్రీని మట్టి కుండలో తింటే ఆ రుచికి ఆహా అనాల్సిందే.