చపాతీ,రోటీలోకి అదిరిపోయే సైడ్ డిష్..చికెన్ భిండి ఎలా చేసుకోవాలంటే..

సాధారణంగా మనం చికెన్ కూరని లేదా బెండకాయ వేపుడుని విడివిడిగా తింటూ ఉంటాం. కానీ ఈ రెండింటిని కలిపి వండితే వచ్చే రుచి అద్భుతం అని మీకు తెలుసా?అదే చికెన్ భిండి. మెత్తటి చికెన్ ముక్కలు, రుచికరమైన బెండకాయలు, చిక్కటి పెరుగు గ్రేవీతో కలిసి నోరూరించే ఈ వంటకం మీ లంచ్ లేదా డిన్నర్ కు సరైన ఎంపిక.

గరం మసాలా ఘాటు, అల్లం-వెల్లుల్లి సువాసన, పెరుగు పుల్లదనం.. అన్నీ సమపాళ్లలో కలిసి ఈ కూరను చాలా స్పెషల్ గా మారుస్తాయి. ఇది మరీ కారంగా ఉండదు కాబట్టి, పిల్లల నుండి పెద్దల వరకు అందరూ ఇష్టపడతారు. రుచికరమైన చికెన్ భిండి వంటకాన్ని తయారు చేయడానికి కావాల్సిన పదార్థాలు,తయారీ విధానం ఇక్కడ చూడండి.

కావలసిన పదార్థాలు
బోన్ లెస్ చికెన్-అర కిలో
లేత బెండకాయలు -అర కిలో
ఉల్లిపాయ - 1
టమోటాలు - 2
అల్లంవెల్లుల్లి పేస్ట్ - 1 టేబుల్ స్పూన్
గరం మసాలా - 1 టీస్పూన్
ధనియాల పొడి - 1 స్పూన్
జీలకర్ర పొడి - 1 స్పూన్
కారం - 1 స్పూన్
పసుపు -అర స్పూన్
ఎండు మిరపకాయలు - 6
నూనె - 4 టేబుల్ స్పూన్లు
పెరుగు -అర కప్పు
ఉప్పు-రుచికి సరిపడా
కొత్తిమీర-కొద్దిగా
కరివేపాకు-కొద్దిగా
జీలకర్ర-కొంచెం

తయారీ విధానం

-ముందుగా ఒక వెడల్పాటి బాండీలో నూనె వేడి చేయండి. అందులో జీలకర్ర, ఎండు మిరపకాయలు, కరివేపాకు వేసి చిటపటలాడనిచ్చాక తరిగిన ఉల్లిపాయ ముక్కలు వేసి, అవి బంగారు రంగులోకి వచ్చేవరకు వేయించండి. ఇప్పుడు అల్లం వెల్లుల్లి పేస్ట్ వేసి పచ్చి వాసన పోయేలా వేయించాలి.

-ఇప్పుడు శుభ్రం చేసి పెట్టుకున్న చికెన్ ముక్కలను పాన్‌ లో వేసి కలపండి. వెంటనే తరిగిన టమోటా ముక్కలను కూడా జతచేసి బాగా కలపాలి. మూతపెట్టి సుమారు 3 నుండి 4 నిమిషాల పాటు మీడియం మంటపై ఉడికించండి. చికెన్ కాస్త మెత్తబడిన తర్వాత, ఈ మిశ్రమాన్ని పక్కన పెట్టుకోండి.

-మరొక సాస్ పాన్ లేదా కడాయిలో కొద్దిగా నూనె వేడి చేసి, తరిగిన బెండకాయ ముక్కలను వేయాలి. బెండకాయల్లోని జిగురు పోయి, అవి చక్కగా వేగేవరకు వేయించండి.

-ఇప్పుడు వేగుతున్న బెండకాయలలో ఉప్పు, గరం మసాలా, ధనియాల పొడి, జీలకర్ర పొడి, ఎర్ర కారం, పసుపు వేసి ముక్కలకు మసాలా బాగా పట్టేలా కలిపాక ఇందులో ముందుగా సిద్ధం చేసి పెట్టుకున్న చికెన్ మిశ్రమాన్ని వేసి కలపండి.

-చివరిగా అర కప్పు పెరుగు, కూర ఉడకడానికి సరిపడా నీళ్లు పోసి కలపండి. మంటను తగ్గించి సుమారు 10 నిమిషాల పాటు ఉడికించండి. నూనె పైకి తేలుతున్నప్పుడు స్టవ్ ఆఫ్ చేయండి. పాన్ లో సన్నగా తరిగిన కొత్తిమీరతో అలంకరించండి.

-అంతే వేడి వేడి చికెన్ భిండి రెడీ. దీనిని రోటి, చపాతీ, నాన్ లేదా వేడి అన్నంతో వడ్డిస్తే ఆ రుచి గురించి ఎంత చెప్పినా తక్కువే.