నిమిషంలో రెడీ అయ్యే స్వీట్..ప్రయోజనాలు మాత్రం బోలెడు..ఎలా చేసుకోవాలో చూడండి

గోధుమపిండి హల్వా భారతదేశంలో, ముఖ్యంగా ఉత్తర భారతంలో అత్యంత ప్రజాదరణ పొందిన సంప్రదాయ తీపి వంటకాల్లో ఒకటి. దీనిని హిందీలో అట్టా హల్వా అని పిలుస్తారు. ఇది తయారుచేయడం చాలా సులభం, తక్కువ పదార్థాలతో, తక్కువ సమయంలోనే చేసుకోవచ్చు. సాధారణంగా ప్రసాదంగా, పండుగ సమయాల్లో లేదా అకస్మాత్తుగా ఏదైనా తీపి తినాలని అనిపించినప్పుడు దీనిని తయారు చేస్తారు.

నెయ్యి, గోధుమపిండి, బెల్లం కలయికతో తయారుచేసే ఈ హల్వా నోట్లో పెట్టుకోగానే కరిగిపోయే అద్భుతమైన రుచిని కలిగి ఉంటుంది. చల్లని వాతావరణంలో లేదా ఒత్తిడికి గురైనప్పుడు ఈ హల్వా తినడం వల్ల శరీరానికి వెచ్చదనం, మనస్సుకు సంతృప్తి లభిస్తుంది. నోరూరించే,క్షణాల్లో ఈ స్వీట్ ని ఎలా తయారుచేసుకోవాలో ఇక్కడ చూడండి.

గోధుమపిండి హల్వా తయారీకి కావాల్సిన పదార్థాలు

-గోధుమపిండి
-బెల్లం తురుము
-నీళ్లు
-నెయ్యి
-డ్రై ఫ్రూట్స్ తురుము

గోధుమపిండి హల్వా తయారీ విధానం

-ముందుగా స్టవ్ మీద పాన్ పెట్టి అందులో అర కప్పు బెల్లం తురుము, అరకప్పు నీళ్లు పోసి బెల్లాన్ని పూర్తిగా కరగనిచ్చి పాన్ ని పక్కన పెట్టుకోవాలి.

-మరో పాన్ ని స్టవ్ మీద పెట్టి అందులో అరకప్పు నెయ్యి వేసి వేడి అయ్యాక ఇందులో 1 కప్పు గోధుమ పిండి వేసి 2 నిమిషాలు కలుపుతూ వేయించుకోవాలి.

-తర్వాత అందులో పక్కన సిద్దంగా ఉంచుకున్న బెల్లం పాకాన్ని వడకట్టి పోసుకోవాలి. 5 నిమిషాలు తక్కువ మంట మీద ఉడకనివ్వాలి. అంతే హెల్తీ గోధుమ పిండి హల్వా రెడీ.

-రెడీ అయిన స్వీట్ మీద డ్రై ఫ్రూట్స్ తరుగు చల్లుకొని కలిపి తింటే సూపర్ టేస్టీగా ఉంటుంది.

ప్రయోజనాలు
గోధుమపిండి హల్వా కేవలం రుచికే కాదు, శరీరానికి శక్తిని ఇచ్చే ఆరోగ్యకరమైన లక్షణాలను కూడా కలిగి ఉంది. గోధుమపిండిలో సంక్లిష్ట కార్బోహైడ్రేట్లు ఉంటాయి, ఇవి జీర్ణమైన తర్వాత గ్లూకోజ్‌ గా మారి శరీరానికి తక్షణ, దీర్ఘకాలిక శక్తిని అందిస్తాయి. ముఖ్యంగా శారీరక శ్రమ చేసిన తర్వాత, శక్తిని పునరుద్ధరించడానికి ఈ హల్వా సహాయపడుతుంది. హల్వాలో ప్రధానంగా వాడే నెయ్యి ఆరోగ్యకరమైన కొవ్వులకు మూలం. నెయ్యిలో ముఖ్యంగా బ్యుట్రిక్ ఆమ్లం ఉంటుంది, ఇది పేగు ఆరోగ్యానికి, జీర్ణవ్యవస్థ పనితీరుకు చాలా మంచిది. నెయ్యిలో విటమిన్ A, D, E, మరియు K వంటి కొవ్వులో కరిగే విటమిన్లు కూడా ఉంటాయి, ఇవి రోగనిరోధక శక్తిని పెంచడానికి, ఎముకల ఆరోగ్యానికి తోడ్పడతాయి.