మిక్సీతో పనేలేదు, మసాలా నూరక్కర్లేదు..10 నిమిషాల్లోనే సూపర్ టేస్టీ ఫిష్ కర్రీ ఎలా చేసుకోవాలంటే..

ఫిష్ కర్రీ చేయడం అంటే చాలా కష్టమైన పని అనుకుంటున్నారా? గంటల తరబడి వంటగదిలో కష్టపడాల్సిన అవసరం లేకుండా కేవలం 10 నిమిషాల్లోనే ఫిష్ కర్రీ తయారుచేసుకోవచ్చు. ఆఫీస్ నుంచి రాగానే అలసిపోయి, వంట చేయడానికి ఓపిక లేనప్పుడు కానీ ఏదైనా స్పైసీగా, రుచిగా తినాలనిపించినప్పుడు ఈ రెసిపీ మీకు పర్ఫెక్ట్ ఛాయిస్. అతి తక్కువ సమయంలో, అద్భుతమైన రుచితో తయారయ్యే ఈ ఇన్‌ స్టంట్ ఫిష్ కర్రీ ఒక్కసారి రుచి చూశారంటే దీనికి అభిమానులుగా మారిపోతారు.

ఇన్‌ స్టంట్ ఫిష్ కర్రీ తయారీకి కావాల్సిన పదార్థాలు

చేప ముక్కలు: గట్టిగా ఉండే ఏ రకం చేపలైనా
ఆవ నూనె: 3 టేబుల్ స్పూన్లు
పచ్చిమిర్చి: 2
ఉప్పు: చేపలకు పట్టించడానికి,కూరకు సరిపడా
పసుపు: అర టీస్పూన్
జీలకర్ర పొడి: 3 టీస్పూన్లు
కారం: అర టీస్పూన్

ఇన్‌ స్టంట్ ఫిష్ కర్రీ తయారీ విధానం

-ముందుగా స్టవ్ వెలిగించి ఒక వెడల్పాటి పాన్ పెట్టుకోండి. అందులో ఆవ నూనె వేసి బాగా వేడి చేయండి. ఆవ నూనె వాడితే అందులోని పచ్చి వాసన పోయేంతవరకు వేడి చేయడం చాలా ముఖ్యం. నూనె బాగా వేడెక్కిన తర్వాత మంటను కాస్త తగ్గించండి.

-శుభ్రం చేసుకున్న చేప ముక్కలకు ముందుగా కొద్దిగా ఉప్పు పట్టించి పక్కన పెట్టుకోండి. ఇప్పుడు ఆ ముక్కలను నెమ్మదిగా వేడి పాన్‌ లో వేయండి. వేసిన వెంటనే గరిటెతో తిప్పకుండా, చేప ముక్కలు పాన్‌ కి అతుక్కోకుండా ఉండేందుకు వాటిని చేతితో పాన్‌ ను పట్టుకుని మెల్లగా కదపండి. ఇలా చేయడం వల్ల ముక్కలు విరిగిపోవు.

-చేప ముక్కలు కొద్దిగా వేగుతున్న సమయంలో ముందుగా చీల్చి పెట్టుకున్న పచ్చిమిర్చిని అందులో వేయండి. వేడి నూనెలో పచ్చిమిర్చి వేగగానే వచ్చే సువాసన కూరకు అదనపు రుచిని ఇస్తుంది.

-ఇప్పుడు అసలైన మసాలాలు జోడించే సమయం. పాన్‌ లో ఉడుకుతున్న చేప ముక్కల పైనే అర టీస్పూన్ పసుపు, మూడు టీస్పూన్ల జీలకర్ర పొడి, అర టీస్పూన్ కారం, మరియు తగినంత ఉప్పు నేరుగా వేయండి.

-మసాలాలు మాడిపోకుండా ఉండేందుకు వెంటనే పాన్‌ లో ఒక చిన్న గ్లాసు నీళ్లు పోయండి. గరిటెతో చాలా సున్నితంగా, చేప ముక్కలు విరగకుండా కలపండి. ఈ మిశ్రమాన్ని మధ్యస్థ మంట మీద ఉడికించండి. నూనె నెమ్మదిగా పైకి తేలుతున్నప్పుడు కూర రంగు అద్భుతంగా మారుతుంది.

-గ్రేవీ మీకు ఏ చిక్కదనంతో కావాలో చూసుకుని, దానికి తగినట్లుగా మరికొన్ని నీళ్లు పోయండి. మూత పెట్టి, చేప ముక్కలు పూర్తిగా లోపలి వరకు ఉడికేలా సన్నని మంట మీద ఉడికించండి.

-అంతే ఎంతో రుచికరమైన ఇన్‌ స్టంట్ ఫిష్ కర్రీ కేవలం 10 నిమిషాల్లో రెడీ. వేడి వేడి అన్నంలో ఈ గ్రేవీని కలుపుకుని తింటుంటే.. ఆ రుచికి మీరు ఫిదా అవ్వాల్సిందే.