కరకరలాడే చిట్టి మురుకులు..పెద్దలకే కాదు, పిల్లలకు కూడా భలే నచ్చేస్తాయి..ఈజీగా చేసుకోండిలా..

సాయంత్రం వేళ ఆఫీసు నుంచి రాగానే లేదా పిల్లలు స్కూల్ నుంచి రాగానే వేడి వేడి ఛాయ్ తాగుతూ కరకరలాడే స్నాక్స్ తింటే ఆ మజాయే వేరు. అలాంటి సమయంలో అందరికీ ముందుగా గుర్తొచ్చే సాంప్రదాయకమైన, అత్యంత రుచికరమైన స్నాక్ మురుకులు. పెద్ద మురుకులు చేయడం కంటే, పిల్లలు సైతం ఎంతో ఆకర్షితమై ఇష్టంగా తినేలా చిన్న చిన్నగా ఉండే చిట్టి చిట్టి మురుకులను ఇంట్లోనే చాలా సులభంగా తయారుచేసుకోవచ్చు.

చిట్టి మురుకులు తయారీకి కావాల్సిన పదార్థాలు

-అటుకులు
-శెనగపప్పు
-కారం
-కలోంజి సీడ్స్
-జీలకర్ర
-నువ్వులు
-బియ్యం పిండి
-ఉప్పు
-నూనె
-నెయ్యి
-గోరువెచ్చని నీళ్లు

చిట్టి మురుకులు తయారీ విధానం

-ముందుగా ఒక పెద్ద ప్లేట్ లో జల్లెడ పెట్టి అందులో 2 కప్పుల బియ్యం పిండి(250 గ్రాములు)వేసి జల్లించుకోవాలి. జల్లించుకున్న పిండిని పక్కన పెట్టుకోండి.

-ఇప్పుడు మిక్సీ జార్ లో 1 కప్పు గట్టి అటుకులు(75) గ్రాములు, అరకప్పు పుట్నాల పప్పు(తినే శెనగపప్పు 55గ్రాములు) వేసి బాగా మెత్తగా గ్రైండ్ చేసుకోవాలి.

-గ్రైండ్ చేసుకున్న పిండిని పక్కన ఉంచుకున్న బియ్యం పిండిలోకి జల్లించుకోవాలి. ఇందులోనే 1 టేబుల్ స్పూన్ నువ్వులు, 1 టీస్పూన్ జీలకర్ర, 1 టీస్పూన్ కలోంజి సీడ్స్, 1 టీస్పూన్ కారం, 1 టీస్పూన్ ఉప్పు వేసి వీటన్నింటిని పిండిలో బాగా కలిసేలా కలుపుకోవాలి. కావాలనుకుంటే ఇందులో జీలకర్రకు బదులుగా వాము కూడా వేసుకోవచ్చు.

-పిండిలో అన్నీ బాగా కలుపుకున్న తర్వాత అందులోనే 2 టేబుల్ స్పూన్ల నెయ్యి వేసి పిండికి బాగా పట్టేలా చేతులతో కలుపుకోవాలి. తర్వాత పిండిలో కొంచెం కొంచెంగా వేడి నీళ్లను దాదాపు 2 కప్పులను పోసుకుంటూ గరిటతో మ్యాష్ చేసుకుంటూ ఉండాలి. కలిపాక దీనిమీద మూత పెట్టి 10 నిమిషాలు పక్కన పెట్టుకోవాలి.

-పది నిమిషాల తర్వాత మూత తీసి పిండిచి చేతులతో మరోసారి బాగా కలుపుకోవాలి. పిండిని కొంచెం గట్టిగానే కలుపుకోవాలి. మురుకుల పిండి రెడీ.

-ఇప్పుడు మురుకుల గొట్టం తీసుకొని అందులో సరిపడా పిండిని పెట్టుకొని నూనె రాసిన ప్లేట్ లో చిన్న చిన్నగా మురుకులను వత్తుకోండి. ఎక్కువ చుట్లు అక్కర్లేదు. 2 చుట్లు వేస్తే సరిపోతుంది.

-ఇప్పుడు స్టవ్ మీద బాండీ పెట్టి అందులో డీప్ ఫ్రైకి సరిపడా ఆయిల్ వేసి వేడి చేసి అందులో వత్తుకున్న మురుకులు వేసి పైన వచ్చే నురగలు తగ్గి మంచి రంగు వచ్చేవరకు మురుకులను వేయించుకోవాలి. మిగిలిన పిండితో కూడా ఇలాగే చేసుకోండి.

-అంతే క్రిస్పీ మురుకులు రెడీ. వీటిని గాలిచొరబడని డబ్బాలో పెట్టుకుంటే చాలా రోజుల వరకు నిల్వ ఉంటాయి.