Thecha recipe: మహారాష్ట్ర స్పెషల్ పచ్చిమిర్చి పచ్చడి..జన్మజన్మలకి గుర్తుండిపోయే టేస్ట్,ఇదిగో రెసిపి

మహారాష్ట్ర ప్రజలు ఎక్కువగా తేచ్చా పచ్చడి తింటారు. తేచ్చా పచ్చడిని పచ్చిమిర్చిలతో చిన్న చిన్న మార్పులు చేసి తయారుచేస్తారు. ఈ తేచ్చాని వేడి వేడి అన్నంతో లేదా రోటీలు లేదా చపాతీలతో కలిపి తింటే అద్భుతంగా ఉంటుంది. మరాఠీల ఊపిరిగా భావించే ఈ తేచ్చాని మీరు కూడా ఇంట్లో చేసుకువాలనుకుంటున్నారా? దీనిని చేయడం చాలా చాలా సింపుల్. తేచ్చా తయారుచేసుకోడానికి కావాల్సిన పదార్థాలు, తేచ్చా తయారీ విధానం ఇక్కడ చూడండి.

తేచ్చా తయారీకి కావాల్సిన పదార్థాలు
-బజ్జీ మిర్చి
-పల్లీలు
-జీలకర్ర
-వెల్లుల్లి
-నూనె
-ఉప్పు

తేచ్చా తయారీ విధానం
-ముందుగా స్టవ్ మీద పెనం పెట్టి దానిమీద 8 బజ్జీ మిర్చిలను తొడిమలు తీసి ఒక్కో మిర్చీని రెండు మూడు ముక్కలుగా చేసి పెనంమీద వేసి మిర్చిపై నల్లని మచ్చలు ఏర్పడేంతరవకు కలుపుతూ వేపుకోండి.

ఆంధ్ర స్పెషల్ పండు మిరపకాయల చట్నీ.. టిఫిన్‌కే కాదు అన్నంలోనూ అదుర్స్!

-మిరపకాయ ముక్కలమీద నల్లగా మచ్చలుగా రావడం ప్రారంభమైనప్పుడు వాటిమీద ఒకటిన్నర టేబుల్ స్పూన్ నూనె, పావు కప్పు వేరుశెనగ పప్పు, పొట్టు తీసిన 20-25 వెల్లుల్లి రెబ్బలు, 1 టీస్పూన్ జీలకర్ర వేసి మంటను సిమ్ లో పెట్టి కలుపుతూ వేయించుకోండి.

-పల్లీలు వేగుతున్న సమయంలోనే వాటిపై తగినంత ఉప్పు చల్లుకోండి.

-పల్లీలు అన్నీ బాగా వేగిన తర్వాత కొంచెం కొత్తిమీర తరుగు అందులో వేసి స్టవ్ ఆఫ్ చేసేయండి.

-ఇప్పుడు ఈ మొత్తాన్ని మిక్సీలో లేదా రోట్లో వేసి కచ్చాపచ్చాగా దంచుకోండి. రోట్లో వేసి దంచితేనే అసలు సిసలైన తేచ్చా టేస్ట్ వస్తుంది.

-ఈ తేచ్చాని వేడి అన్నంలో లేదా రోటీ,చపాతీల్లో కలిపి తింటే యమా రుచిగా ఉంటుంది.