పర్ఫెక్ట్ అల్లం టీ తయారీకి సీక్రెట్ ఇదే.. ఒక్కసారి ఇలా ట్రై చేయండి!

ఆహ్లాదకరమైన వాతావరణంలో బాల్కనీలో కూర్చుని చేతిలో వేడి వేడి అల్లం టీ కప్పు పట్టుకుని సిప్ చేస్తుంటే ఆ మజాయే వేరు. ఆస్వాదించే మనసు ఉండాలే కానీ అల్లం టీ ఇచ్చే ఆనందం అంతా ఇంతా కాదు. కొంతమందికి అల్లం టీ అంటే ఎంత ప్రాణమంటే.. శీతాకాలం, వర్షాకాలం, వేసవికాలం అనే తేడా లేకుండా ప్రతిరోజూ, అన్ని కాలాల్లోనూ దాన్ని ఎంతో ఇష్టంగా ఆస్వాదిస్తుంటారు.

ముఖ్యంగా గొంతు గరగరగా ఉన్నప్పుడు, జలుబు లేదా అలసటగా అనిపించినప్పుడు అల్లం టీ గొంతుకు అమృతంలా పనిచేసి అద్భుతమైన ఉపశమనాన్ని ఇస్తుంది. అయితే అందరూ అల్లం టీ పెడతారు కానీ ఆ టీకి అసలైన రుచి రావాలంటే ఏ సమయంలో అల్లాన్ని కలపాలో కచ్చితంగా తెలుసుకోవాలి. సరైన పద్ధతిలో అల్లం టీని తయారు చేస్తే ఆ సుగంధం, రుచి మిమ్మల్ని మంత్రముగ్ధులను చేస్తాయి.

అల్లం టీ తయారీకి కావాల్సిన పదార్థాలు

-నీరు
-అల్లం
-టీ పొడి
-చక్కెర
-పాలు

అల్లం టీ తయారీ విధానం

-ముందుగా ఒక శుభ్రమైన టీ పాత్రను స్టవ్ మీద ఉంచి అందులో సరిగ్గా 2 కప్పుల స్వచ్ఛమైన నీటిని పోయండి. ఇప్పుడు స్టవ్ వెలిగించి ఈ నీటిని బాగా మరిగించండి.

-ఒక చిన్న అల్లం ముక్కను తీసుకుని, దానిపై ఉన్న పొట్టు తీసి సన్నగా తురుముకోండి లేదా రోట్లో కచ్చాపచ్చాగా దంచండి.

-నీరు బాగా మరుగుతున్నప్పుడు ఈ తురిమిన అల్లాన్ని ఆ నీటిలో వేయాలి. ఇలా చేయడం వల్ల అల్లంలోని సహజ నూనెలు, ఘాటైన రుచి నీటిలో బాగా కలుస్తాయి.

-అల్లం వేసిన వెంటనే మంటను తగ్గించండి. తక్కువ మంట (సిమ్) మీద ఈ నీటిని నెమ్మదిగా ఉడకనివ్వండి. ఇలా చేయడం వల్ల అల్లం యొక్క పూర్తి సారం, ఘాటు, ఔషధ గుణాలు ఆ నీటిలో అద్భుతంగా ఇమిడిపోతాయి.

-అల్లం రసం నీటిలో దిగిన తర్వాత, నీటి రంగు లేత పసుపు రంగులోకి మారుతుంది. నీటి రంగు పూర్తిగా మారిన తర్వాత మాత్రమే, మీ రుచికి తగినట్లుగా నాణ్యమైన టీ ఆకులను (టీ పొడి), చక్కెరను కలపండి.

-టీ పొడి, చక్కెర వేసిన తర్వాత డికాషన్‌ ను కొంతసేపు బాగా ఉడికించండి. దీనివల్ల టీ ఆకుల రంగు, రుచి డికాషన్‌ లోకి దిగుతాయి. చక్కెర పూర్తిగా కరిగిపోయి అల్లం ఘాటుతో కలిసి అద్భుతమైన మిశ్రమంగా మారుతుంది.

-డికాషన్ పర్ఫెక్ట్‌ గా మరిగిన తర్వాత దానికి తగిన మోతాదులో చిక్కటి పాలు కలపండి. పాలు కలిపిన తర్వాత టీని 1-2 నిమిషాల పాటు తక్కువ మంట మీద నాననివ్వండి (మరగనివ్వండి). టీ అందమైన రంగులోకి మారి పొంగు రాగానే స్టవ్ ఆపేయండి.

-ఇప్పుడు ఆ వేడి వేడి టీని ఒక కప్పులోకి వడకట్టుకోండి. అంతే ఘుమఘుమలాడే అల్లం టీ రెడీ.

-అల్లం టీ ఆరోగ్యానికి ఎంత మంచిదో, దాన్ని పరిమితంగా తీసుకోవడం కూడా అంతే ముఖ్యం.