Onion Pickle: ఉల్లిపాయలతో రుచికరమైన నిల్వ పచ్చడి.. కూర లేకపోయినా అన్నంలో తినేయొచ్చు!

ఉల్లిపాయలు ప్రతి ఒక్కరి వంటింట్లో ఉండాల్సిన అతి ముఖ్యమైన పదార్థం. చిన్న చిన్న కూరల నుంచి బిర్యానీల వరకు ఉల్లిపాయలను వేసుకొని వంటలు చేసుకుంటూ ఉంటారు. ఇంట్లో కూరగాయలు లేనప్పుడు ఉల్లితో కూర వండుకున్నా సరిపోతుంటుంది. అయితే కూర వండుకునే ఓపిక సమయం లేని వ్యక్తులు ఉల్లిపాయలతో నిల్వ పచ్చడి పెట్టుకుంటారు. ఈ పచ్చడి అద్భుతమైన రుచిగా ఉండడంతో పాటు, ఎన్నో ఆరోగ్య ప్రయోజనాలను అందజేస్తుంది. ఈ ఉల్లి పచ్చడిని ఎలా నిల్వ చేసుకోవాలి? ఎలా ఈ పచ్చడిని తయారు చేసుకోవాలి? దానికి కావాల్సిన పదార్థాలు ఏంటి అనేది ఇప్పుడు తెలుసుకుందాం.

ఉల్లి నిల్వ పచ్చడికి కావాల్సిన పదార్థాలు

1. అయిదు ఉల్లిపాయలు
2. మూడు స్పూన్ల బెల్లం తురుము
3. చిన్న సైజులో చింతపండు
4. 20 ఎండుమిర్చి
5. అరకప్పు నూనె
6. ఒక స్పూన్ మినపప్పు
7. అర స్పూన్ జీలకర్ర
8. ఒక స్పూన్ ఆవాలు
9. పది వెల్లుల్లి రెబ్బలు
10. గుప్పెడు కరివేపాకు
11. చిటికెడు ఇంగువ
12. రుచికి సరిపడా ఉప్పు

ఉల్లి నిల్వ పచ్చడి తయారీ విధానం

ముందుగా ఉల్లిపాయలను తొక్క తీసేసి మీడియం సైజు ముక్కలుగా కట్ చేసుకొని పక్కన పెట్టుకోవాలి. అలాగే ఎండు మిర్చిని నీటిలో వేసుకొని ఒక అరగంట పాటు నానబెట్టుకోవాలి. మరోపక్క చింతపండును కూడా కొంచెం నీటిలో వేసుకొని నానబెట్టుకోవాలి.

అరగంట తరువాత ఎండుమిర్చి మెత్తగా నానినట్లు నిర్ధారించుకున్న తరువాత ఆ మిర్చిని మిక్సీలో వేసుకోవాలి. అందులోనే ఉల్లిపాయ ముక్కలు, బెల్లం తురుము, చింతపండు గుజ్జును కూడా అందులో వేసుకోవాలి. వాటిని మెత్తగా రుబ్బుకోవాలి. అందులోనే రుచికి సరిపడా ఉప్పు వేసుకొని ఇంకోసారి రుబ్బుకోవాలి.

ఇప్పుడు స్టవ్ ఆన్ చేసి, కడాయి పెట్టుకోవాలి. ఆ కడాయిలో కొంచెం కొద్దిగా నూనె వేసుకోవాలి. ఆ నూనెలో ఆవాలు, గుప్పెడు ఎండుమిర్చి, మినపప్పు, వెల్లుల్లి రెబ్బలు, జీలకర్ర, కరివేపాకులు వేసుకొని కొంచెంసేపు వేయించుకోవాలి. ఇప్పుడు ఆ మిశ్రమంలో ముందుగా రుబ్బుకొని పెట్టుకున్న ఉల్లి పేస్ట్‌ను వేసుకోవాలి. మంటను లోలో పెట్టుకొని ఆ మిశ్రమాన్ని వేయిస్తూనే ఉండాలి.

పచ్చడి నుంచి నూనె వేరై పైకి తేలిపోయాక, స్టవ్ ఆఫ్ చేసుకోవాలి. పచ్చడి చల్లారిన తరువాత ఆ పచ్చడిని ఓ సీసాలో వేసుకొని భద్రపరుచుకుంటే సరిపోతుంది. ఉల్లిపాయలతో నిల్వ పచ్చడి సిద్ధమైపోతుంది. దీనిని ఎలాంటి కూరలు లేనప్పుడు వర్షాకాలంలో, చలికాలంలో దీనిని తినేయొచ్చు.