Prawns fry: రొయ్యల వేపుడు..జన్మలో మర్చిపోలేని టేస్ట్..ఇలా చేయండి

రొయ్యల వేపుడు. ఈ పేరు వింటేనే కొంతమందికి నోట్లో లాలాజలం ఊరిపోతుంది. ఇక మందుబాబులు గురించి అయితే ప్రత్యేకంగా చెప్పనక్కర్లేదు. సీ ఫుడ్ ఇష్టపడేవాళ్లలో అందరి ఫేవరెట్ రొయ్యల వేపుడు(prawns fry). వీకెండ్స్ లో చాలామంది రెస్టారెంట్లకు వెళ్లి రొయ్యల వేపుడు ఆర్డర్ చేసుకొని ఆస్వాదిస్తుంటారు. అయితే ఇంట్లోనే లేదా బ్యాచిలర్స్ అయినా తమ రూమ్ లోనే చాలా ఈజీగా దీనిని ప్రిపేర్ చేసుకోవచ్చు. రెస్టారెంట్ కు మించిన టేస్ట్ ఇంట్లోనే వచ్చేలా రొయ్యల వేపుడు ఎలా చేసుకోవాలి, రొయ్యల వేపుడు తయారీకి కావాల్సిన పదార్థాలు ఇక్కడ చూడండి.

రొయ్యల వేపుడు తయారీకి కావాల్సిన పదార్థాలు
-1 కేజీ రొయ్యలు
-టమాటో
-ఉల్లిపాయ
-పచ్చిమిర్చి
-పసుపు
-ఉప్పు
-కారం
-జీలకర్ర పొడి
-ధనియాల పొడి
-గరం మసాలా
-అల్లంవెల్లుల్లి పేస్ట్
-కరివేపాకు
-కొత్తిమీర
-పుదీనా
-లవంగం
-దాల్చినచెక్క
-బిర్యానీ ఆకు
-అనాస పువ్వు
-జాపత్రి
-ఆయిల్

రొయ్యల వేపుడు తయారీ విధానం

-ముందుగా 1 కేజీ రొయ్యలు తీసుకొని వాటి పైన పొట్టు మొత్తం ఒలిచేసేయాలి. దీంతో అది 400 గ్రాముల వరకు అవుతుంది.

-తర్వాత ఈ రొయ్యలను ఒక బౌల్ లో వేసి అందులోనే పసుపు, ఉప్పు,నిమ్మరసం వేసి శుభ్రంగా రొయ్యలను కడగాలి.

-ఇప్పుడు రొయ్యలలో పావు టీ స్పూన్ పసుపు, 2 టీ స్పూన్ల కారం, 2 టీ స్పూన్ల ధనియాల పొడి,అర టీ స్పూన్ గరం మసాలా,అర టీస్పూన్ జీలకర్ర పొడి,పెద్దగా కట్ చేసిన 2 మీడియం సైజ్ ఉల్లిపాయలు,పెద్దగా కట్ చేసిన 2 మీడియం సైజ్ టమాటోలు,పొడవుగా కట్ చేసిన 2 పచ్చిమిర్చి,రుచికి సరిపడా ఉప్పు, 2 టీ స్పూన్ల అల్లంవెల్లుల్లి పేస్ట్, 2 రెమ్మల కరివేపాకు,సన్నగా కట్ చేసిన కొత్తిమీర కొంచెం,కొద్దిగా పుదీనా వేసి మొత్తం రొయ్యలకు పట్టేలా చేత్తో లైట్ గా కలుపుకొని బౌల్ మీద మూతపెట్టేసి ఓ గంట పక్కన పెట్టుకోండి.

-1 గంట తర్వాత స్టవ్ ఆన్ పాన్ పెట్టి అందులో 3 టేబుల్ స్పూన్ల ఆయిల్ పోసి వేడి చేయండి. ఆయిల్ కొంచెం వేడెక్కిన తర్వాత ఇందులో 3 లవంగ మొగ్గలు,1 అనాస పువ్వు, 1 ఇంచు దాల్చిన చెక్క,1 బిర్యానీ ఆకు,కొద్దిగా జాపత్రి వేసి పేపండి.

- మసాలు దినుసులు కొద్దిగా వేగిన తర్వాత ఇందులో కలిపి ఉంచిన రొయ్యలను మొత్తం వేసేయండి. మంటను మీడియం ప్లేమ్ లో పెట్టి 3-4 నిమిషాలు కలుపుతూ ఫ్రై చేసుకోండి.

-తర్వాత పాన్ మీద మూత పెట్టేయండి. మధ్య మధ్యలో మూత తీసి కలుపుతూ ఉండండి. రొయ్యలలోని వాటర్ ఇంకిపోయి ఆయిల్ సపరేట్ అయ్యేదాకా ఫ్రై అవనివ్వండి.

-తర్వాత అందులో రెండు రెమ్మల కరివేపాకు వేసి మంటను సిమ్ లో పెట్టి రొయ్యలు కొద్దిగా డ్రైగా వచ్చేదాకా కలుపుతూ బాగా నిదానంగా వేయించుకోండి.

-తర్వాత దానిపై కొంచెం కొత్తిమీర చల్లుకొని స్టవ్ ఆఫ్ చేసుకోండి. టేస్టీ రొయ్యల వేపుడు రెడీ.