Ramzan Delicious Dishes: రంజాన్ అంటే హలీమ్ ఒక్కటే కాదు, లొట్టలేసే వంటకాలు చాలానే ఉన్నాయి

రంజాన్ నెల నడుస్తోంది. హైదరాబాద్ లో ఏ వీధి చూసిన హలీమ్ సెంటర్ లు వెలిశాయి. అలా రోడ్లపై వెళ్తూ ఉంటే ఫుడ్ లవర్స్‌ను హలీమ్ ఘుమఘుమలు ఉక్కిరిబిక్కిరి చేసేస్తున్నాయి. అయితే రంజాన్ అంటే హలీమ్ ఒక్కటే కాదు.

రంజాన్ నెలలో హలీమ్‌తో పాటు నోరూరించే ఎన్నో ఐటెమ్స్ తో హైదరాబాద్ హోటళ్లు సిద్ధమైపోతాయి. హైదరాబాదీ హలీమ్ మాత్రమే కాకుండా ఈ రంజాన్ నెలలో తప్పక రుచి చూడాల్సిన ఇతర ఆహార పదార్థాలు ఏమిటో ఇప్పుడు చూద్దాం.

1. నిహరి & కుల్చా

బిర్యానీ, హలీమ్ తర్వాత హైదరాబాదీలు చాలా ఇష్టంగా తినేది నిహరి & కుల్చాను. బీఫ్, మటన్, చికెన్ తో దీనిని తయారు చేస్తారు. నిహరి ని సాధారణంగా కుల్చా లేదా రోటీతో కలిపి తింటారు. మంచి ఇరానీ హోటళ్లలో ఇది లభిస్తుంది. చార్మినార్ సమీపంలోని హోటల్ నయాబ్ లో నిహరి & కుల్చా తప్పకుండా టేస్టు చేయండి.

2. పథర్ కా గోష్

వెడల్పాటి రాయిపై మటన్ ముక్కలతో పథర్ కా గోష్ తయారు చేస్తారు. మాంసం రంగు లేత గోధుమ రంగులోకి వచ్చేంత వరకు కాలుస్తారు. తర్వాత మంచి ఘాటైన మసాలాలు జోడిస్తారు.

3. దహి వడ

రంజాన్ నెలలో ఎక్కువ మంది తినే వంటకం దహి వడ. ఓల్ట్ సిటీతో పాటు హైదరాబాద్ లోని చాలా ప్రాంతాల్లో దహి వడ లభిస్తుంది. పెరుగులో వడను నానబెట్టి తయారు చేస్తారు. కొత్తిమీర, దానిమ్మ, ఆమ్చూర్ పౌడర్ ను జోడిస్ారు.

4. షాహి తుక్డా

పాలు, బ్రెడ్ స్లైసులు ప్రధాన పదార్థాలుగా తయారు చేసే ప్రసిద్ధ వంటకం షాహి తుక్డా. పాలు, చక్కెర, యాలకుల పొడి, బాదం, పిస్తా అన్ని వేసి మరిగి దగ్గరకు వచ్చాక అందులో నెయ్యిలో వేయించిన బ్రెడ్ స్లైసులు వేస్తారు. కొద్దిగా డబుల్ కా మీతా తరహాలో ఉండే షాహి తుక్డా రుచి అద్భుతంగా ఉంటుంది.

5. షీర్ ఖుర్మా

రంజాన్ రోజు షీర్ ఖుర్మా తాగనిదే అసలు పండగలా అనిపించదు. రంజాన్ మాసం అంతా హలీమ్ తో సరిసమానంగా షీర్ ఖుర్మా అమ్మకాలు జరుగుతాయి. చాలా మంది తీపి ప్రియులను ఆకట్టుకుంటుంది షీర్ ఖుర్మా.