నోరూరించే వైట్ మటన్ కుర్మా..పూరీ,చపాతీలోకి అబ్బో కేక అంతే..ఎలా చేసుకోవాలో చూడండి

వీకెండ్ వస్తే చాలు చాలా ఇళ్లలో మటన్ ఘుమఘుమలు మొదలవుతాయి. అయితే ఎప్పుడూ చేసుకునే రొటీన్ మటన్ కూరతో విసుగొచ్చిందా? ఈసారి మీ రుచిని ఒక మెట్టు పైకి తీసుకెళ్లే సరికొత్త వంటకాన్ని ప్రయత్నించాలనుకుంటున్నారా? అయితే రెస్టారెంట్ స్టైల్‌ లో ఉండే వైట్ మటన్ కుర్మా ఓ సారి ట్రై చేసి చూడండి. మసాలాలు, జీడిపప్పు, బాదంల క్రీమీ టెక్స్చర్‌ తో, మృదువుగా ఉడికిన మటన్ ముక్కలతో ఈ కుర్మా రుచి అమోఘం. దీని తయారీ కూడా చాలా సులభం. వేడివేడి నాన్‌ లు, చపాతీలు, పుల్కాలు,పూరీ, బిర్యానీతో దీనిని తింటుంటే ఆ అనుభూతి మాటల్లో చెప్పలేనిది. రెస్టారెంట్ స్టైల్ లో వైట్ మటన్ కుర్మా ఎలా తయారుచేసుకోవాలో ఇక్కడ చూడండి.

కావలసిన పదార్థాలు
మటన్ ఉడికించడానికి:
-మటన్: అర కిలో
-అనాసపువ్వు: 1
-దాల్చిన చెక్క: 1 అంగుళం ముక్క
-జాపత్రి: కొద్దిగా
-పచ్చిమిర్చి: 1
-అల్లం వెల్లుల్లి పేస్ట్: అర టేబుల్ స్పూన్
-నీరు: తగినంత
మసాలా పేస్ట్ కోసం:
-నూనె: 3 టేబుల్ స్పూన్లు
-ఉల్లిపాయలు: 2
-జీడిపప్పు: 20
-బాదం: 10
-ధనియాల పొడి: పావు టేబుల్ స్పూన్
-పచ్చిమిర్చి: 2
-పాలు: 100 మి.లీ
-గట్టి పెరుగు: 2 టేబుల్ స్పూన్లు
కుర్మా తయారీకి:
-: 3 టేబుల్ స్పూన్లు
-బిర్యానీ ఆకులు: 2
-దాల్చిన చెక్క: 2 చిన్న ముక్కలు
-లవంగాలు: 5
-కసూరి మేతి: కొద్దిగా
-అల్లం వెల్లుల్లి పేస్ట్: 1 టేబుల్ స్పూన్
-గట్టి పెరుగు: 100 మి.లీ
-పాలు: 100 మి.లీ
-మిరియాల పొడి: అర టేబుల్ స్పూన్
-నిమ్మరసం: సగం చెక్క
-ఉప్పు: రుచికి సరిపడా
-కొత్తిమీర, పుదీనా: కొద్దిగా (సన్నగా తరిగినవి)

తయారీ విధానం

-ముందుగా శుభ్రం చేసుకున్న మటన్‌ ను ప్రెషర్ కుక్కర్‌ లో వేయండి. అందులోనే అనాసపువ్వు, దాల్చిన చెక్క, జాపత్రి, పచ్చిమిర్చి, అల్లం వెల్లుల్లి పేస్ట్ వేసి ముక్కలు మునిగే వరకు నీరు పోసి 8-10 విజిల్స్ వచ్చేదాకా ఉడికించి పక్కన పెట్టుకోండి.

-ఇప్పుడు మసాలా పేస్ట్ కోసం బాండీలో నూనె వేడి చేసి ఉల్లిపాయ ముక్కలు వేసి అవి బంగారు రంగులోకి మారే వరకు వేయించి, చల్లారనివ్వండి.

-చల్లారిన ఉల్లిపాయలను మిక్సీ జార్‌ లో వేసి, జీడిపప్పు, బాదం, ధనియాల పొడి, పచ్చిమిర్చి, పాలు, పెరుగు వేసి మెత్తని పేస్ట్‌ లా గ్రైండ్ చేసుకోండి.

-ఇప్పుడు కుర్మా కోసం మరో మందపాటి గిన్నెలో నూనె వేడి చేసి బిర్యానీ ఆకులు, దాల్చిన చెక్క, లవంగాలు వేసి చిటపటలాడనివ్వండి. కసూరి మేతిని కూడా నలిపి వేసి వేయించండి. తర్వాత అల్లం వెల్లుల్లి పేస్ట్ వేసి పచ్చి వాసన పోయే వరకు వేయించి 100 మి.లీ పెరుగు వేసి నూనె పైకి తేలేదాకా కలపండి.

-ఇప్పుడు ఉడికించిన మటన్‌ ను నీళ్లతో సహా అందులో వేసి గ్రైండ్ చేసుకున్న మసాలా పేస్ట్, మిగిలిన పాలు, రుచికి సరిపడా ఉప్పు వేసి బాగా కలపాలి.

-గిన్నెపై మూత పెట్టి సన్నని మంట మీద 15-20 నిమిషాలు లేదా గ్రేవీ చిక్కబడి నూనె పైకి తేలే వరకు ఉడికించండి.

-చివరగా మిరియాల పొడి, తరిగిన కొత్తిమీర, పుదీనా, నిమ్మరసం వేసి బాగా కలిపి స్టవ్ ఆఫ్ చేయండి. అంతే నోరూరించే క్రీమీ వైట్ మటన్ కుర్మా రెడీ.