మిక్సీ అక్కర్లేదు,నూనెతో పనిలేదు..బీహార్ స్టైల్ టమాటో చట్నీ..స్మోకీ ఫ్లేవర్ తో సూపర్ టేస్ట్

రోజూ తినే కూరలు, పచ్చళ్లతో బోర్ కొట్టిందా? అయితే ఈ రోజు మీ భోజనానికి ఒక కొత్త రుచిని జోడించండి. అదే బిహారీ స్టైల్ టమాటో చట్నీ. సాధారణంగా మనం టమాటోలను నూనెలో వేయించి పచ్చడి చేస్తాం.

కానీ బిహారీ స్టైల్‌ లో టమాటోలను, ఇతర దినుసులను నేరుగా మంటపై కాల్చి చేస్తారు. ఇలా చేయడం వల్ల చట్నీకి అద్భుతమైన స్మోకీ ఫ్లేవర్ వస్తుంది. ఇది అన్నం, చపాతీ, లేదా పుల్కాలోకి అద్భుతమైన కాంబినేషన్. బిహారీ స్టైల్ టమాటో చట్నీ ఎలా తయారుచేసుకోవాలో ఇక్కడ చూడండి.

కావలసిన పదార్థాలు
బాగా పండిన టమోటాలు: 2
వెల్లుల్లి: 2 చిన్న గడ్డలు
పచ్చిమిర్చి: 2-3
కొత్తిమీర: గుప్పెడు
ఉల్లిపాయ: 1
ఉప్పు: రుచికి సరిపడా
కాల్చిన జీలకర్ర పొడి: అర టీస్పూన్
ఎర్ర కారం: పావు టీస్పూన్

తయారీ విధానం

-ముందుగా స్టవ్ వెలిగించి ఒక గ్రిల్ స్టాండ్ (పుల్కాలు కాల్చే జాలి)పెట్టి దానిపై టమోటాలు, వెల్లుల్లి రెబ్బలు, పచ్చిమిరపకాయలను ఉంచండి. మీడియం మంట ఉంచి టమోటాల పై తొక్క నల్లగా మారి, లోపల గుజ్జు మెత్తబడే వరకు అన్ని వైపులా తిప్పుతూ కాల్చాలి. వెల్లుల్లి, పచ్చిమిర్చి కూడా కాలిన మచ్చలు వచ్చే వరకు వేయించండి.

-కాలిన టమోటాలు, వెల్లుల్లి, మిరపకాయలను ఒక ప్లేట్‌ లోకి తీసుకుని కాసేపు చల్లారనివ్వండి. అవి చల్లారాక టమోటాల పైన నల్లగా మాడిన తొక్కను జాగ్రత్తగా తొలగించండి. అలాగే వెల్లుల్లి పొట్టును కూడా తీసేయండి. తొక్క తీసిన తర్వాత టమోటాలను నీటితో కడగకూడదు, అలా చేస్తే ఆ స్మోకీ ఫ్లేవర్ పోతుంది.

-ఇప్పుడు ఒక రోలులో ముందుగా కాల్చిన వెల్లుల్లి రెబ్బలు, పచ్చిమిరపకాయలు వేసి కచ్చాపచ్చాగా దంచండి. రోలు లేకపోతే గిన్నెలో వేసి పప్పు గుత్తితో కూడా మెదుపుకోవచ్చు. కానీ మిక్సీలో మాత్రం వేయకండి, ఈ చట్నీ పేస్ట్‌ లా ఉంటే బాగోదు.

-వెల్లుల్లి, మిర్చి నలిగిన తర్వాత, అందులో గుప్పెడు సన్నగా తరిగిన కొత్తిమీర వేసి దంచండి. చివరగా కాల్చి, తొక్క తీసిన టమోటాలను వేసి ముతకగా మెదపండి. టమోటా ముక్కలు అక్కడక్కడా తగులుతూ ఉంటేనే రుచి బాగుంటుంది.

-ఇప్పుడు ఈ మిశ్రమాన్ని ఒక గిన్నెలోకి తీసుకోండి. దీనికి సన్నగా తరిగిన ఉల్లిపాయ ముక్కలు, రుచికి సరిపడా ఉప్పు, కొంచెం ఎర్ర కారం, వేయించిన జీలకర్ర పొడిని జత చేయండి. వాటన్నింటినీ బాగా కలపండి. బిహారీ ఒరిజినల్ రుచి కోసం ఈ దశలో ఒక చెంచా పచ్చి ఆవనూనె కలిపితే రుచి ఇంకాస్త పెరుగుతుంది.

-అంతే ఎంతో రుచికరమైన, నోరూరించే బిహారీ స్టైల్ టమాటో చట్నీ రెడీ.