శ్రమ తక్కువ,రుచి ఎక్కువ..బ్యాచిలర్స్ సండే స్పెషల్ సోంబేరి చికెన్..జస్ట్ 20 నిమిషాల్లోనే..!

బ్యాచిలర్స్‌ కి సండే అంటేనే చికెన్ లేదా మటన్ ఉండాల్సిందే. అయితే చాలామంది బ్యాచిలర్స్ బయట రెస్టారెంట్లలో ఆర్డర్ పెట్టుకుని తింటుంటారు. గంటల తరబడి వంటగదిలో కష్టపడాలంటేనే వారికి కాస్త బద్ధకం వస్తుంటుంది. అనేక రకాల పాత్రలు వాడటం, మసాలాలు నూరడం లాంటివి వారికి పెద్ద ప్రహసనంలా అనిపిస్తాయి. అలాంటి వారి కోసమే ఒక అద్భుతమైన, సులభమైన వంటకం సోంబేరి చికెన్.

పేరుకు తగ్గట్లుగానే దీన్ని తయారు చేయడానికి మీరు పెద్దగా శ్రమ పడాల్సిన పనే లేదు. వంటరాని వారు, వంటగదిలో ఎక్కువ సేపు గడపడానికి ఇష్టపడని బ్యాచిలర్స్ కోసం ఇది బెస్ట్ ఆప్షన్. దీన్ని తయారు చేయడానికి సుమారు 20 నుండి 25 నిమిషాల సమయం మాత్రమే పడుతుంది. రుచిలో మాత్రం ఇది అద్భుతంగా ఉంటుంది. సోంబేరి చికెన్ ఎలా తయారుచేసుకోవాలో ఇక్కడ చూడండి.

కావలసిన పదార్థాలు
చికెన్ - అర కిలో
ఉల్లిపాయలు - 2 లేదా 3
అల్లంవెల్లుల్లి పేస్ట్ - అర టీస్పూన్
కొత్తిమీర - కొద్దిగా
కరివేపాకు - ఒక టీస్పూన్
ధనియాల పొడి - ఒక టీస్పూన్
గరం మసాలా - ఒక టీస్పూన్
పసుపు - అర టీస్పూన్
కస్తూరి మేథి - అర టీస్పూన్
యాలకుల పొడి - చిటికెడు
వంట నూనె - 3 టీస్పూన్లు
ఉప్పు - మీ రుచికి సరిపడా

తయారీ విధానం

-ముందుగా అరకిలో చికెన్‌ ను తీసుకుని నీటిలో రెండు మూడు సార్లు శుభ్రంగా కడగాలి. నీరంతా పోయేలా చూసుకోవాలి.

-ఇప్పుడు ఒక గిన్నెలో కడిగి పెట్టుకున్న చికెన్, సన్నగా తరిగిన ఉల్లిపాయ ముక్కలు, అల్లంవెల్లుల్లి పేస్ట్, కొత్తిమీర, కరివేపాకు, యాలకుల పొడి, ధనియాల పొడి, గరం మసాలా, పసుపు, కస్తూరి మేథీ, తగినంత ఉప్పు, కారం, మూడు టీస్పూన్ల నూనె వేసి అన్నీ ముక్కలకు పట్టేలా బాగా కలుపుకోవాలి. ఈ మిశ్రమాన్ని 10 నిమిషాల పాటు పక్కన పెట్టుకోవాలి.

-ఇప్పుడు స్టవ్ వెలిగించి ఆ గిన్నెను పొయ్యి మీద పెట్టాలి. మంటను మీడియంలో ఉంచుకుని ఉడికించడం ప్రారంభించాలి. చికెన్ అడుగున మాడిపోకుండా మధ్యమధ్యలో గరిటతో తిప్పుతూ ఉండాలి. చికెన్ నుండి వచ్చే నీటితోనే ముక్కలు ఉడికిపోతాయి. ఒకవేళ మీకు గ్రేవీ ఎక్కువగా కావాలి అనుకుంటే కొద్దిగా నీళ్లు పోసుకోవచ్చు.

-మూత పెట్టి సుమారు 20 నుండి 25 నిమిషాల పాటు ఉడికిస్తే చాలు. ముక్క మెత్తగా ఉడికి, నూనె పైకి తేలుతుంది. అంతే ఎంతో గుమగుమలాడే రుచికరమైన సోంబేరి చికెన్ రెడీ.

-వేడి వేడి అన్నంలోకి గానీ, చపాతీ, బగారా రైస్‌ లోకి గానీ ఈ చికెన్ కలుపుకుని తింటే ఆ మజాయే వేరు.