చపాతీ, అన్నంలోకి ఆల్ రౌండర్ టమాటా తొక్కు..రుచి చూస్తే వదలరు!

రోజూ చేసుకునే చట్నీలు, కూరలకు భిన్నంగా, ఎప్పుడు కావాలంటే అప్పుడు వాడుకోవడానికి వీలుగా, నోరూరించేలా ఉండే ఒక అద్భుతమైన వంటకం టమాటా తొక్కు. ఇది కేవలం అల్పాహారంలోకే కాదు, వేడివేడి అన్నంలో కాస్త నెయ్యి వేసుకుని తిన్నా స్వర్గం కనిపిస్తుంది.

అతి తక్కువ పదార్థాలతో, చాలా సులభంగా తయారు చేసుకోగల ఈ టమాటా తొక్కు మీ భోజనం రుచిని రెట్టింపు చేస్తుందనడంలో సందేహం లేదు. టమాటా తొక్కు ఎలా తయారు చేసుకోవాలో ఇక్కడ చూడండి.

కావాల్సిన పదార్థాలు
పండిన టమాటాలు - 1 కిలో
నువ్వుల నూనె- అర కప్పు
ఎండు మిరపకాయలు - 15
జీలకర్ర - 1 టేబుల్ స్పూన్
మెంతులు -అర టీస్పూన్
వెల్లుల్లి రెబ్బలు - 10- 12
చింతపండు - చిన్న నిమ్మకాయంత
నల్ల మిరియాలు - 10
ఆవాలు - 1 టీస్పూన్
ఇంగువ - పావు టీస్పూన్
కరివేపాకు - రెండు రెబ్బలు
ఉప్పు - రుచికి సరిపడా

తయారీ విధానం

-ముందుగా స్టవ్‌ పై ఒక పాన్ పెట్టి నూనె లేకుండా జీలకర్ర, మెంతులు, ఎండు మిరపకాయలు, నల్ల మిరియాలు వేసి చిన్న మంట మీద మంచి సువాసన వచ్చే వరకు దోరగా వేయించి స్టవ్ ఆపేసి చల్లారనివ్వాలి.

-ఇప్పుడు మిక్సీ గిన్నెలో వేయించి చల్లార్చినవి,వెల్లుల్లి రెబ్బలు కూడా వేసి మెత్తని పొడిగా చేసుకోవాలి. ఈ మసాలా పొడే టమాటా తొక్కుకు అసలైన రుచిని ఇస్తుంది.

-ఇప్పుడు టమాటాలను శుభ్రంగా కడిగి, చిన్న ముక్కలుగా కోసి మిక్సీ జార్‌ లో వేసుకోవాలి. దీనికి శుభ్రం చేసుకున్న చింతపండును కూడా జోడించి మెత్తని ప్యూరీలా రుబ్బుకుని పక్కన పెట్టుకోవాలి.

-ఇప్పుడు స్టవ్‌ పై మందపాటి పాన్ పెట్టి నూనె వేసి వేడెక్కిన తర్వాత ఆవాలు వేసి చిటపటలాడనివ్వాలి. ఆ తర్వాత ఇంగువ, కరివేపాకు వేసి వేయించాక సిద్ధం చేసుకున్న టమాటా-చింతపండు ప్యూరీని వేసి, రుచికి సరిపడా ఉప్పు కూడా కలపాలి.

-మీడియం మంట మీద ఉంచి మూత పెట్టి ఉడికించాలి. టమాటాలోని పచ్చి వాసన పోయి, మిశ్రమం దగ్గరపడే వరకు మధ్యమధ్యలో కలుపుతూ ఉండాలి.

-10-15 నిమిషాల తర్వాత టమాటా మిశ్రమం నుండి నూనె పైకి తేలడం ప్రారంభమవుతుంది.
ఇప్పుడు మనం ముందుగా చేసి పెట్టుకున్న మసాలా పొడిని వేసి బాగా కలపాలి. ఇప్పుడు మంటను పూర్తిగా తగ్గించి, మరో 5-7 నిమిషాల పాటు ఉడికించాలి.

-తొక్కు చిక్కబడి, పాన్‌ అంచులను వదిలి, నూనె పూర్తిగా పైకి తేలే వరకు ఉడికించి స్టవ్ ఆఫ్ చేయాలి. అంతే ఘుమఘుమలాడే, ఎంతో రుచికరమైన టమాటా తొక్కు రెడీ.

-ఇది పూర్తిగా చల్లారిన తర్వాత ఒక గాజు సీసాలో నిల్వ చేసుకుంటే నెల రోజుల వరకు తాజాగా ఉంటుంది.