డబ్బు ఆదా, ఆరోగ్యం పదిలం..ఇంట్లోనే కేవలం 30 నిమిషాల్లో స్వచ్ఛమైన పనీర్..ఎలా చేసుకోవాలంటే..

పనీర్ అంటే ఇష్టపడని వారు ఎవరూ ఉండరు. ముఖ్యంగా శాఖాహారులకు పనీర్ వంటకాలు అంటే ప్రాణం. అయితే మార్కెట్లో దొరికే పనీర్ ఎంతవరకు సురక్షితం అని ఎప్పుడైనా ఆలోచించారా? కల్తీ లేదా నిల్వ ఉంచిన పాత పనీర్ తినడం వల్ల మన జీర్ణవ్యవస్థ దెబ్బతిని, ఆరోగ్యంపై ప్రతికూల ప్రభావం పడుతుంది. రసాయనాలు, కృత్రిమ పదార్థాలతో తయారు చేసిన పనీర్ కొనుగోలు చేయడం కంటే, ఇంట్లోనే స్వచ్ఛమైన పనీర్ తయారు చేసుకోవడం ఎంతో ఉత్తమం.

ఇంట్లో పనీర్ తయారు చేయడం చాలా సులభం. కేవలం అరగంట వ్యవధిలో, ఏ విధమైన కల్తీ లేని ఆరోగ్యకరమైన పనీర్ మీ సొంతం చేసుకోవచ్చు.ఈ సహజసిద్ధమైన పనీర్ తయారీకి పెద్దగా ఖర్చు కూడా అవ్వదు.మీ ఇంట్లోనే పనీర్ ఎలా తయారుచేసుకోవాలో ఇక్కడ చూడండి.

కావాల్సినవి పదార్థాలు
చిక్కటి పాలు - 3 లీటర్లు
నిమ్మకాయ - సగం చెక్క
నీళ్లు - 2 టేబుల్ స్పూన్లు

తయారీ విధానం

-ముందుగా మందపాటి అడుగు ఉన్న ఒక పెద్ద గిన్నెను తీసుకోండి. అందులో 3 లీటర్ల పాలను పోసి, మీడియం మంటపై బాగా మరిగించాలి. పాలు పొంగు వస్తున్నప్పుడు గమనించుకుంటూ ఉండాలి.

-పాలు మరిగే సమయంలో గరిటెతో అప్పుడప్పుడు కలుపుతూ ఉండాలి.

-ఇప్పుడు ఒక చిన్న కప్పులో ముందుగా తీసిపెట్టుకున్న సగం నిమ్మకాయ రసాన్ని, 2 టేబుల్ స్పూన్ల నీటిని కలిపి ఉంచుకోండి.

-పాలు బాగా మరిగాక మంట తగ్గించి, ఈ నిమ్మ-నీటి మిశ్రమాన్ని కొద్దికొద్దిగా పాలలో పోయాలి.

-నిమ్మరసం వేసిన వెంటనే పాలు విరగడం ప్రారంభమవుతుంది. గరిటెతో నెమ్మదిగా కలుపుతూ ఉండండి. పాలు పూర్తిగా విరిగి, తెల్లటి పనీర్ ముద్దలు, లేత పసుపు రంగులో నీరు విడిగా కనిపించే వరకు కలుపుతూనే ఉండాలి. అవసరమైతే మరికొద్దిగా నిమ్మరసం మిశ్రమాన్ని జోడించవచ్చు.

-ఇప్పుడు ఒక వెడల్పాటి గిన్నె తీసుకుని, దానిపై పలుచటి, శుభ్రమైన కాటన్ లేదా మస్లిన్ వస్త్రాన్ని పరచండి. విరిగిన పాలను ఆ వస్త్రంలో పోసి వడకట్టండి. ఆ వెంటనే పనీర్‌ ను చల్లటి నీటితో రెండు, మూడు సార్లు బాగా కడగాలి. ఇలా చేయడం వల్ల నిమ్మకాయలోని పులుపుదనం, వాసన పనీర్ నుండి పూర్తిగా పోతాయి. ఆ తర్వాత వస్త్రాన్ని మూటలా కట్టి, అందులోని నీరంతా పోయేలా గట్టిగా పిండాలి.

-నీరంతా పిండేసిన తర్వాత ఆ పనీర్ మూటను ఒక చదునైన ప్లేట్ లేదా పీటపై ఉంచండి. అది ఒక ఆకారంలోకి రావడానికి, ఆ మూటపై ఏదైనా బరువైన వస్తువును ఉంచాలి. ఇలా సుమారు 20 నిమిషాల పాటు వదిలేయండి. దీనివల్ల పనీర్ గట్టిపడి, సరైన ఆకృతిని సంతరించుకుంటుంది.

-అరగంట తర్వాత బరువును తీసేసి వస్త్రాన్ని విప్పండి. అద్భుతమైన, స్వచ్ఛమైన పనీర్ ముద్ద రెడీ. ఇప్పుడు ఒక చాకు తీసుకుని మీకు నచ్చిన పరిమాణంలో, చతురస్రాకారపు ముక్కలుగా కట్ చేసుకోండి.

-ఈ పనీర్‌ ను గాలి చొరబడని డబ్బాలో పెట్టి ఫ్రిజ్‌ లో భద్రపరుచుకుంటే తాజాగా ఉంటుంది.