మనదేశపు సూపర్ ఫుడ్ తో ఇలా లంచ్ చేస్తే..గుడ్డు,పాలు,చికెన్ కన్నా ఎన్నో రెట్లు ఆరోగ్య ప్రయోజనాలు

చాలామంది అమ్మలు పిల్లలు సరిగా పాలు తాగట్లేదని బాధపడుతుంటారు. అయితే పాలు తాగడం ఇష్టం లేని పిల్లలకు పాలు కంటే ఎన్నో రెట్లు ఎక్కువ కాల్షియం ఉండి పిల్లలు ఎంతో ఇష్టంగా తినేలా మునగాకు రైస్ ట్రై చేయండి. మునగాకును సంపూర్ణ ఆయుర్వేద ఔషధంగా పరిగణిస్తారు. పోషకాల గని అయిన మునగాకుతో తయారుచేసే ఈ రైస్.. పిల్లల లంచ్ బాక్స్‌ లకు లేదా పెద్దలకు మధ్యాహ్న భోజనానికి చాలా ఆరోగ్యకరమైన, రుచికరమైన ఎంపిక.

దీని తయారీ చాలా సులువు, తక్కువ సమయంలో చేసుకోవచ్చు. ఈ వంటకం..పాలు,చికెన్,గుడ్ల తినే దానికన్నా ఎన్నో రెట్లు ఎక్కువ బలం వస్తుంది. ఎదిగే పిల్లలకే కాకుండా బరువు తగ్గాలనుకున్నోళ్లకు, షుగర్ పేషెంట్లకు కూడా ఎంతో మేలు చేసే మునగాకుతో చేసే రైస్ ను మీ ఇంట్లోనే చాలా ఈజీగా ఎలా తయారుచేసుకోవచ్చో ఇక్కడ చూడండి.

తయారీకి కావాల్సిన పదార్థాలు

-మునగకాకు
-ఉప్పు
-ఉల్లిపాయలు
-కారం
పచ్చిమిరపకాయలు
కరివేపాకు
పసుపు
ఎండబెట్టిన చింత చిగురు(లేదా గోంగూర)
ఉడకించిన అన్నం

తయారీ విధానం

2 కప్పుల మునగాకు తీసుకొని శుభ్రంగా కడిగి ఆరబెట్టుకోవాలి.

తర్వాత స్టవ్ మీద పాన్ పెట్టి 4-5 టేబుల్ స్పూన్ల ఆయిల్ వేసి వేడి చేసి ఇందులో సన్నగా కట్ చేసిన 3 మీడియం సైజ్ ఉల్లిపాయల ముక్కలు, సన్నగా కట్ చేసిన 6 పచ్చిమిరపకాయల ముక్కలు,ఒక రెమ్మ కరివేపాకు, 2 స్పూన్ల ఉప్పు వేసి కలిపి మూతపెట్టి మీడియం మంట మీద మధ్యమధ్యలో కలుపుతూ వేయించుకోవాలి.

ఉల్లిపాయలు 80శాతం వరకు వేగాక అందులో పావు స్పూన్ పసుపు, 2 స్పూన్ల కారం వేసుకొని కలిపాక కడిగి పెట్టుకున్న మునగాకుని సన్నగా తరిగి వేసుకోండి. తక్కువ మంట మీద నెమ్మదిగా కలుపుతూ వేయించుకోవాలి.

మునగాకులోని పచ్చిదనం పోయాక ఇందులో గుప్పెడు ఎండబెట్టిన చింత చిగురు వేసుకోండి. ఇది లేకుంటే ఈ స్టేజ్ లో సన్నగా తరిగిన గోంగూర అయినా వేసుకోవచ్చు. మూతపెట్టి తక్కువ మంట మీద 5-6 నిమిషాలు మగ్గనివ్వాలి.

ఇప్పుడు స్టవ్ ఆపేసి పాన్ లో ఉడికించిన అన్నం వేసి మొత్తం కలిసేలా కలుపుకోవాలి. రుచి చెక్ చేసుకొని కావాలనుకుంటే ఇప్పుడే ఉప్పు వేసి కలుపుకోవచ్చు. అంతే మునగాకు రైస్ రెడీ.

కొన్ని ప్రయోజనాలు

-మునగాకులో క్యారెట్‌ ల కంటే 4 రెట్లు ఎక్కువ విటమిన్ A ఉంటుంది, ఇది కంటి చూపుకు చాలా మంచిది.

-నారింజ కంటే 7 రెట్లు ఎక్కువ విటమిన్ C ఉంటుంది, ఇది రోగనిరోధక శక్తిని పెంచుతుంది.

-పాలు కంటే 4 రెట్లు ఎక్కువ కాల్షియం ఉంటుంది..ఇది ఎముకలు, దంతాల ఆరోగ్యానికి అవసరం.

-అరటిపండ్ల కంటే 3 రెట్లు ఎక్కువ పొటాషియం ఉంటుంది.. ఇది రక్తపోటును నియంత్రించడంలో సహాయపడుతుంది.

-పాలకూర కంటే 25 రెట్లు ఎక్కువ ఐరన్ ఉంటుంది, ఇది రక్తహీనతను నివారించడంలో కీలకం.