Moringa Rice: పోషకాల ఘని..వందల రోగాలను ఫసక్ చేసే మునగాకు అన్నం..ఎలా చేసుకోవాలంటే

మునగ చెట్టు మన ఆరోగ్యానికి మేలు చేసే సంజీవని అని చెప్పడంలో ఎలాంటి డౌట్ అక్కర్లేదు. మునగ ఆకుల దగ్గర నుంచి దాని కాయలు, దాని బెరడు సహా అన్నీ మన ఆరోగ్యానికి అనేక రకాలుగా మేలు చేసేవే. మునగ ఆకులకి 300కి పైగా రోగాలను నయం చేసే శక్తి ఉందని చెబుతున్నారు. దీని పవర్ అంతా ఇంతా కాదు. అలాంటి మునగాకు ఉపయోగించి మంచి టేస్టీ రైస్ తయారుచేసుకుంటే ఇక మన శరీరాన్ని ఏ వ్యాధులు ఏం చేయలేవ్. మునగాకు అన్నంని తయారుచేయడం కూడా నిమిషాల్లో పని. దీన్ని మునగాకు అన్నం అనే కంటే పోషకాల రైస్ అని చెప్పవచ్చు. బ్యాచిలర్స్ కూడా సింపుల్ గా చేసుకోగలిగే వంటకం ఇది. మునగాకు అన్నంని మీ ఇంట్లోనే సింపుల్ గా ఎలా తయారుచేసుకోవాలో ఇక్కడ చూడండి.

మునగాకు అన్నం తయారీకి కావాల్సిన పదార్థాలు

-ఎండుమిర్చి
-ధనియాలు
-జీలకర్ర
-జీడిపప్పు
-మునగాకు
-ఆవాలు
-పచ్చి శెనగపప్పు
-ఆయిల్
-నువ్వులు
-వెల్లుల్లి
-మిరియాల పొడి

మునగాకు అన్నం తయారీ విధానం

-ముందుగా స్టవ్ మీద బాండీ పెట్టి అందులో 1 టీస్పూన్ జీలకర్ర, 1 టేబుల్ స్పూన్ నువ్వులు, 1 ఎండుమిర్చి, 1 టేబుల్ స్పూన్ ధనియాలు వేసి ఆయిల్ లేకుండానే వేయించాలి.

-నువ్వులు చిట్లిన తర్వాత అందులో శుభ్రంగా కడిగి నీడన ఆరబెట్టిన 50 గ్రాముల మునగాకులు వేసి చెమ్మ ఆరిపోయేంతవరకు వేయించాలి. మంటను మీడియంలో ఉంచాలి.

-మునగాకు కొంచెం పొడిపొడిగా అయిన తర్వాత అందులో 4-5 వెల్లుల్లి రెబ్బలు వేసి వేయించాలి.

-బాగా వేగిన తర్వాత స్టవ్ ఆఫ్ చేసేసి బాండీలోని మిశ్రమం మొత్తాన్ని మిక్సీ గిన్నెలో వేసి మెత్తని పొడిగా గ్రైండ్ చేసుకోవాలి.

-తర్వాత స్టవ్ మీద బాండీలో 2 టేబుల్ స్పూన్ల నువ్వుల నూనె లేదా శెనగ నూనె వేసి వేడి చేసి అందులో 1 టీస్పూన్ ఆవాలు వేసి చిట్లనిచ్చాక 1 టీస్పూన్ మినపప్పు, 2 ఎండుమిర్చి ముక్కలు, 1 టీస్పూన్ పచ్చి శెనగపప్పు,4 దంచిన వెల్లుల్లి, 15 జీడిపప్పు పలుకులు వేసి ఎర్రగా వేసుకోవాలి.

-ఇప్పుడు తాళింపులో ఒకటిన్నర కప్పు పొడి పొడిగా వండిన అన్నం వేయండి. ఇందులోనే గ్రైండ్ చేసుకున్న మునగాకు పొడి, రుచికి సరిపడా ఉప్పు వేసి మొత్తం కలిసేలా బాగా కలపండి. పెద్ద మంట మీద ఒక నిమిషం అటు ఇటూ కలబెడుతూ ఉండండి.

-చివరిగా అందులో మిరియాల పొడి వేసి బాగా కలిసేలా కలపండి. అంతే టేస్టీ మునగాకు అన్నం రెడీ.