దూది కంటే మెత్తని సొరకాయ చపాతీ..సూపర్ టేస్ట్..ఎలా చేసుకోవాలంటే

సొరకాయ మన ఆరోగ్యానికి అందించే ప్రయోజనాలు అన్నీ ఇన్నీ కావు. సాధారణంగా సొరకాయతో ఎక్కువగా పులుసు,ఫ్రై,గారెలు వంటివి తయారుచేస్తుంటారు. అయితే మీరెప్పుడైనా సొరకాయతో చపాతీలు ట్రై చేశారా? అద్భుతం అంటే అద్భుతమే. దీని రుచి ముందు ఇంకేదీ పనికిరాదు అంటారు. అంతేకాకుండా ఇది ఆరోగ్యానికి బోలెడంత మేలు కూడా చేస్తుంది. గంటల తర్వాత నోట్లో పెట్టుకుంటే మెత్తగా కరిగిపోతుంది. సొరకాయ చపాతీలను మీ ఇంట్లోనే దూది కంటే మెత్తగా చాలా ఈజీగా ఎలా తయారుచేసుకోవాలో ఇక్కడ చూడండి.

సొరకాయ చపాతీ తయారీకి కావాల్సిన పదార్ధాలు
-సొరకాయ
-జీలకర్ర
-కొత్తిమీర
-కరివేపాకు
-గోధుమ పిండి
-ఉప్పు
-గరం మసాలా
-ఇంగువ
-మిరియాల పొడి
-ఆయిల్

సొరకాయ చపాతీ తయారీ విధానం

-ముందుగా ఓ బౌల్ లో రెండున్నర కప్పుల గోధుమ పిండి వేయండి. ఇందులోనే కొంచెం ఉప్పు, 1 టీస్పూన్ జీలకర్ర, 1 కట్ట కొత్తిమీర తరుగు, 1 పచ్చిమిర్చి తరుగు, అర టీస్పూన్ గరం మసాలా, రెండు చిటికెళ్ల ఇంగువ, ముప్పావు టీస్పూన్ మిరియాల పొడి వేసి నీరు పోయకుండానే మెత్తగా పిండుతూ కలుపుకోండి.

-తర్వాత అందులో రెండు కప్పుల సొరకాయ తురుము వేసి గట్టిగా పిండుతూ కలుపుకోండి. ఇందులోనే ఒక రెబ్బ కరివేపాకును కట్ చేసి వేసుకోండి.

-తర్వాత అందులో చిలకరించినట్లుగా కొన్ని నీళ్లు పోసి పిండిని సెమీ సాఫ్ట్ గా కలుపుకోండి.

-అందులోనే 2 టీస్పూన్ల ఆయిల్ కూడా వేసి పిండి మిశ్రమాన్ని బాగా వత్తుకొని కనీసం పావు గంట సేపు పక్కన పెట్టుకోండి.

-తర్వాత నిమ్మకాయ సైజు అంత పిండి ముద్దలు తీసుకొని ఎక్కువగా పొడి పిండి చల్లుకుంటూ నెమ్మదిగా వత్తుకోండి.

-తర్వాత వాటిని స్టవ్ మీద వేసి రెండు వైపులా బాగా కాలనివ్వండి. కాలినవైపు ఆయిల్ కొంచెం వేసుకుంటూ బాగా కాల్చుకోండి. అంతే సొరకాయ చపాతీ రెడీ. దీనిని ఎలాంటి సైడ్ డిష్ అక్కర్లేకుండానే కేవలం పెరుగుతోనే కలిపి తింటే అద్భుతంగా ఉంటుంది.