నోరూరించే బెల్లం గవ్వలు..చిన్ననాటి జ్ఞాపకాలు గుర్తుకొస్తాయ్..ఇంట్లోనే ఈజీగా ఎలా చేసుకోవాలంటే

భారతీయ సంప్రదాయంలో పండుగలు, శుభకార్యాలు, ప్రత్యేక సందర్భాలలో తీపి వంటకాలకు ఎంతో ప్రాముఖ్యత ఉంటుంది. అలాంటి సంప్రదాయ వంటకాలలో ఒకటి బెల్లం గవ్వలు. గవ్వలు అంటే అందరికీ తెలిసిందే. చిన్నప్పుడు తల్లిదండ్రులు లేదా అమ్మమ్మ, నాయనమ్మలు తయారుచేసే తీపి జ్ఞాపకాలు మనలో చాలా మందికి ఉంటాయి. వీటిని మైదా పిండితో తయారుచేసి, పంచదార పాకంలో ముంచి చేసేవారు. కానీ పంచదారకు బదులుగా బెల్లం వాడితే రుచితో పాటు ఆరోగ్య ప్రయోజనాలు కూడా పొందవచ్చు.

బెల్లం గవ్వలు కేవలం ఒక తీపి వంటకం మాత్రమే కాదు, మన సంస్కృతిలో ఒక భాగం. ఇంట్లో పిల్లల నుండి పెద్దల వరకు అందరూ ఇష్టపడే మంచి స్నాక్. పండుగలు లేదా సాధారణ రోజుల్లో కూడా ఈ బెల్లం గవ్వలను తయారుచేసుకుని ఆనందించవచ్చు. బెల్లం గవ్వలు తయారుచేయడం చాలా సులభం, ఎక్కువ సమయం కూడా పట్టదు. దీనికి కావాల్సిన పదార్థాలు ఇంట్లో ఎప్పుడూ అందుబాటులో ఉండేవే. బెల్లం గవ్వలు ఎలా తయారు చేసుకోవాలో ఇక్కడ చూడండి.

బెల్లం గవ్వల తయారీకి కావలసిన పదార్థాలు

-మైదా పిండి: 2 కప్పులు
-నెయ్యి: 2-3 టేబుల్ స్పూన్లు
-ఉప్పు: చిటికెడు
-నీరు: పిండి కలపడానికి సరిపడినంత
-నూనె: గవ్వలు వేయించడానికి సరిపడినంత
-బెల్లం: 1 కప్పు తురుము
-నీరు: పావు కప్పు
-యాలకుల పొడి: అర టీస్పూన్

తయారీ విధానం

-ముందుగా ఒక పెద్ద గిన్నెలో మైదా పిండి, చిటికెడు ఉప్పు వేసి బాగా కలపాలి. ఇప్పుడు కరిగించిన నెయ్యి లేదా నూనె వేసి పిండిలో బాగా కలిసేలా చేతితో రుద్దాలి. నెయ్యి పిండి అంతా కలిసిన తర్వాత కొద్ది కొద్దిగా నీరు పోస్తూ గట్టిగా ఉండే చపాతీ పిండిలా కలపాలి. పిండి మరీ మెత్తగా ఉండకూడదు.

-పిండిని కలిపిన తర్వాత ఒక తడి బట్టతో కప్పి 15-20 నిమిషాలు పక్కన పెట్టాలి.

-తర్వాత పిండిని చిన్న చిన్న ఉండలుగా చేసుకోవాలి. ఒక ఉండ తీసుకుని మనకు మార్కెట్లో దొరికే గవ్వల పీట లేదా ఒక కొత్త దువ్వెన వెనుక వైపున పెట్టి వేలితో సున్నితంగా నొక్కాలి. అప్పుడు అది గవ్వ ఆకారంలో చుట్టబడుతుంది. అన్ని ఉండలను ఇదే విధంగా గవ్వలుగా చేసుకోవాలి.

-ఒక కడాయిలో నూనె వేసి వేడి చేయాలి. నూనె మరీ ఎక్కువగా వేడిగా ఉండకూడదు. మధ్యస్థ వేడిలో గవ్వలను వేసి, బంగారు రంగు వచ్చేవరకు అవి క్రిస్పీగా మారే వరకు వేయించాలి. గవ్వలను తిప్పుతూ ఉండాలి, అప్పుడే అవి అన్ని వైపులా ఒకేలా వేగుతాయి.

-వేయించిన గవ్వలను నూనెలోంచి తీసి ఒక పేపర్ టవల్ ఉన్న ప్లేట్‌ లో వేయాలి. ఇలా చేస్తే నూనె ఎక్కువగా పీల్చుకోకుండా ఉంటాయి.

-ఇప్పుడు స్టవ్ మీద మరొక చిన్న గిన్నె పెట్టి అందులో తురిమిన బెల్లం, నీరు వేసి వేడి చేయాలి. బెల్లం పూర్తిగా కరిగిన తర్వాత పాకాన్ని వడకట్టాలి.

-వడకట్టిన పాకాన్ని మళ్ళీ గిన్నెలో వేసి, కొద్దిసేపు ఉడకనివ్వాలి. పాకం ముదురు అయ్యేటప్పుడు, ఒక చుక్క పాకం నీటిలో వేస్తే గట్టి ఉండలా అవ్వాలి. దీన్నే మనం ఉండ పాకం లేదా ముదురు పాకం అని అంటాం. ఈ దశలో యాలకుల పొడి వేసి బాగా కలపాలి.

-స్టవ్ ఆఫ్ చేసి వేయించిన గవ్వలను బెల్లం పాకంలో వేసి బాగా కలపాలి. గవ్వలు మొత్తం పాకంతో కప్పబడేలా జాగ్రత్తగా కలపాలి. చల్లారిన తర్వాత గవ్వలు ఒకదానికొకటి అంటుకోకుండా విడివిడిగా అవుతాయి. ఇవి పూర్తిగా చల్లారిన తర్వాత ఒక గాలి చొరబడని డబ్బాలో నిల్వ చేసుకోవచ్చు.